މާލެ ސިޓީގެ އެކި ސަރަހައްދުތަކުގައި އަނެއްކާވެސް ޓެކްސީ ސްޓޮޕްތަށް ޤާއިމުކޮށް، އެކަން ތަންފިޒުކުރުމުގެ މަސައްކަތް ކުރުމަށް މާލެ ސިޓީ ކައުންސިލުން ނިންމަވައިފިއެވެ.
ރަމަޟާން މަހު މާލޭގެ މަގުތަކުގެ ކަރޫބާރޫ ކުޑަކުރަން މާލެ ސިޓީ ކައުންސިލުން ކުރާ މަސައްކަތްތަކުގެ މަޢުލޫމާތު ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ޙިއްސާކުރައްވަމުން، މާލެ ސިޓީ ކައުންސިލްގެ މެމްބަރ އަހުމަދު ޒަމީރު ވިދާޅުވީ، މާލޭގެ ޓްރެފިކް ބާރުބޮޑުވުމުގައި ޓެކްސީތައް ޤަވައިދާ ޙިލާފަށް އެކި ސަރަހައްދުތަކުގައި މަޑުކުރުމުގެ މައްސަލަ ފާހަގަކުރެވިފައިވާކަމަށެވެ.
އެގޮތުން ޓެކްސީތަކަށް ޢާންމުން އަތް ނެގުމުން ކަފިހި ހުރަސްތަކާއި، މަގުތަކުގެ ކަންމައްޗަށް ހުއްޓުމުން، މާލޭގެ ޓްރެފިކްގެ ބާރު ބޮޑުވާކަން ޒަމީރު ފާހަގަކުރެއްވިއެވެ.
މި މައްސަލަ ހައްލުކުރުމަށް، މާލެ ސިޓީގެ އެކި ސަރަހައްދުތަކުގައި އޮފިޝަލުން ބައިތިއްބައިގެން ޓެކްސީ ސްޓޮޕްތަށް އަލުން ޤާއިމުކުރުމުގެ މަސައްކަތް ކުރަމުންދާކަމަށް އަހުމަދު ޒަމީރު ވިދާޅުވިއެވެ. އަލަށް އަމަކުރާ އުސޫލުގެ ދަށުން ޓެކްސީ ސެންޓަރުތަކަށް ގުޅައިގެން ނުވަތަ ޓެކްސީ ސްޓޮޕްތަކުގައި ތިބެގެން ނޫންގޮތަކަށް ޓެކްސީ ނުނެގޭގޮތަށް ހެދުމަށް މަސައްކަތް ކުރަމުންދާކަމަށްވެސް ޒަމީރު ވިދާޅުވިއެވެ.
"އަޅުގަނޑުމެންނަށް ބައެއް ޓެކްސީތަށް ދެ ކޮޅަށް ދުއްވާ މަގުގެ ކަނާއަތުގެ މަޑުކުރުމާއި، ޒިބްރާ ކްރޮސްގައި މަޑުކުރުން ފަދަ ކަންކަން މެދުވެރިވޭ. މަގުތަކުގައި ހަރުކުރާ ޓެކްސީ ސްޕޮޓް ބޯޑުތަކުގެ ސަބަބުން މަގުމަތިން ޓެކްސީ ނެގުމުގައި އާއްމުންނަށް ދިމާވާ ދަތިތަކަށް ލުޔެއް ލިބިގެންދާނެ. އަދި ކުރިން ޓެކްސީ ސްޓޮޕްތަކާއި ޚިލާފަށް މިފަހަރު އެތަން ބަލަހައްޓަން މީހުން ބަހައްޓާނަން." އަހުމަދު ޒަމީރު ވިދާޅުވިއެވެ.
ރާއްޖެ މިއަދު ޕްރޮގްރާމްގައި ވާހަކަފުޅުދައްކަވަމުން މޯލްޑިވްސް ޕޮލިސް ސަރވިސްގެ ހެޑް އޮފް ޓްރެފިކް އޮޕަރޭޝަންސް ޔުނިޓް، ސަބް އިންސްޕެކްޓަރ އޮފް ޕޮލިސް މުހައްމަދު ލުޠުފީ ވިދާޅުވީ، މާލެ ސިޓީގައި ޓެކްސީ ދުއްވާ ފަރާތްތަކުން ޤަވަޢިދާ ޚިލާފުވެގެން ގިނަ ޝަކުވާތަކެއް އެއިދާރާއަށް ހުށަހަޅާކަމަށެވެ. އެގޮތުން ޕާކް ކުރުން މަނާ ސަރަހައްދުތަކުގައި ޕާކުކުރުމާއި، ޤަވައިދާ ޚިލާފަށް ޓެކްސީ ދަތުރު ނެގުމުގެ ސަބަބުން ދިމާވާ ދަތިތަށް ލުޠުފީ ފާހަގަކުރެއްވިއެވެ.
"ޓެކްސީ ޑްރައިވަރުންނަށް ވަކި ޚާއްސަ ތަމްރީނެއް ދީގެން މިޓެކްސީ ދުއްވެނީވެސް. އެފަރާތްތަށް ޤަވާއިދާއި ޤާނޫނުތަށް ރަނގަޅަށް އެބަ އެނގޭ. އެހެންނަމަވެސް މިރަމަޟާން މަހުވެސް މިސްކިތަށް ކައިރި ޓެކްސީ ޕާކްކުރުމާއި ޤަވަޢިދާ ޚިލާފަށް ޓެކްސީ ދަތުރު ނެގުމުގެ މައްސަލަ ފާހަގަކޮއްލެވޭ." މުހައްމަދު ލުތުފީ ވިދާޅުވިއެވެ.
މާލެ ސިޓީ ކައުންސިލުން މާލޭގައި ޓެކްސީ ސްޓޮޕްތަށް ޤާއިމުކުރުމުގެ މަސައްކަތް ކުރަމުންދާއިރު، 2014ވަނަ އަހަރު ޢަމަލުކުރަންފެށި ޓެކްސީ ޤަވައިދާއި ގުޅިގެން މާލޭގެ މަގުތަކުގައި ޓެކްސީ ސްޓޮޕްތަށް ޤާއިމުކުރިނަމަވެސް، މި ސްޓޮޕްތަކަށް އާންމުންގެ މާބޮޑު މަޤުބޫލުކަމެއްވަނީ ނުލިބިފައެވެ.