ކަނޑުމަގުން މުދާ އެތެރެކުރުމަށް ރާއްޖޭގައި މިހާރު ޤާއިމުކުރެވިފައިވާ ޕޯޓަކީ، ސަރަހައްދީ ފެންވަރުގައިވެސް ފާހަގަކޮށްލެވޭ ފަދަ، ކޮލިޓީ ޚިދުމަތެއް ފޯރުކޮށްދެމުންދާ ޕޯޓެއްކަމަށް އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވެއްޖެއެވެ.އިކޮނޮމިކް މިނިސްޓަރ މިހެން ވިދާޅުވީ، ދުނިޔޭގެ ސިއްޙަތު ދުވަސް ފާހަގަކުރުމަށް ރޭ ބޭއްވި ޚާއްސަ ޖަލްސާ ޝަރަފުވެރިކޮށްދެއްވާ ވާހަކަފުޅުދައްކަވަމުންނެވެ.ދުނިޔޭގެ ސިއްޙަތު ދުވަސް ފާހަގަކުރުމަށް ބޭއްވި ޚާއްސަ ޖަލްސާ ޝަރަފުވެރިކޮށްދެއްވާ، ވާހަކަފުޅު ދައްކަވަމުން، އިކޮނޯމިކް މިނިސްޓަރ މުހައްމަދު ސައީދު ވިދާޅުވީ، ރައްކާތެރި ކާނާ ރާއްޖެ އެތެރެކޮށް، އެތަކެތި ވިއްކުމުގެ ފުރުސަތު ވިޔަފާރިވެރިންނަށް ފަހިކޮށްދިނުމުގައިވިޔަފާރި ބަނދަރުތަކަކީ، ޒިންމާދާރު، ފެންވަރު ރަނގަޅު ޙިދުމަތެއް ފޯރުކޮށްދޭ ބަޔަކަށް ވާންޖެހޭނެކަމަށެވެ.ތަފާސް ހިސާބުތައް ދައްކާގޮތުން ރާއްޖޭގައި ކެއުން ބުއިމުގައި ބޭނުންކުރާ ސާމާނުތަކުގެ ނުވަދިހަ އިންސައްތައަކީ ކަނޑުމަގުން ނުވަތަ ވައިގެން މަގުން ރާއްޖޭ އިންޕޯޓްކޮށްގެން ބޭނުންކުރެވޭ ތަކެތިކަމުން، އެތަކެތީގެ ރައްކާތެރިކަމާއިމެދު ކަމާބެހޭ އިދާރާތަކުން ޚާއްސަ ސަމާލުކަމެއް ދެއްވަންޖެހޭކަމަށާއި، ރާއްޖެއަށް ގެންނަން ބޭނުންވާ އިޤްތިސާދީ ބަދަލުތަކާއި، އާއްމުންގެ ސިއްހަތާއިވެސް ވަރަށް ބޮޑަށް ގުޅިފައިވާކަން މިނިސްޓަރގެ ވާހަކަފުޅުގައި ފާހަގަކުރެއްވިއެވެ.މި ރަސްމިއްޔާތުގައި ވާހަކަފުޅުދައްކަވަމުން ހެލްތް މިނިސްޓަރ އަހުމަދު ޒުޙޫރު ވިދާޅުވީ، ރާއްޖެއަކީ ގިނަ އަދަދަކަށް ކާނާ އެތެރެކުރާ ޤައުމަކަށްވުމާއެކު، އެތެރެކުރެވޭ ކާބޯތަކެއްޗަކީ ރައްކާތެރި ކާބޯތަކެތިކަމުގައި ކަށަވަރުކުރުމަށްޓަކައި، ކަމާގުޅުންހުރި މުއައްސަސާތަކާއި، ކާބޯތަކެތި އެތެރެކުރާ ވިޔަފާރިވެރިންނާއި ގުޅިގެން ޚާއްސަ މަސައްކަތްތަކެއް ހެލްތް މިނިސްޓްރީން ކުރަމުންދާކަމަށެވެ. އަދި ރާއްޖޭގެ ސިއްޚީ ނިޒާމާއިމެދު އާއްމުންގެ އިތުބާރު ދެމެހެއްޓުމަށްޓަކައި ސަރުކާރުން ހުއްޓުމެއް ނެތި މަސައްކަތް ކުރައްވަމުންދާކަމަށް މިނިސްޓަރ ޒުޙޫރު ވިދާޅުވިއެވެ.މި ރަސްމިއްޔާތުގައި ސިއްޙީ ދާއިރާގެ ކުރިއެރުމަށާއި ތަރައްޤީއަށް މަސައްކަތް ކުރާ ފަރާތްތަކުގެ އަގުވަޒަން ކުރުމުގެ ގޮތުން ހެލްތް މިނިސްޓްރީން ދޭ އެވޯރޑް ތިން ފަރާތަކުން ވަނީ ޙާސިލްކޮށްފައެވެ. އަދި ސިއްޙީ ދާއިރާ ކުރިއެރުވުމަށް ޤައުމީ ފެންވަރެއްގައި އެކުލަވާލެވޭ ރިސާރޗް ބުލެޓިންގެ ދެވަނަ އެޑިޝަން ހެލްތް މިނިސްޓްރީން ވަނީ ނެރެފައެވެ.މީގެ އިތުރުން، ރައްކާތެރި ކާނާ އުފެއްދުމަށް ދަނޑުވެރިން އަޙުލުވެރިކުރުވުމުގެ ގޮތުން ދަނޑުވެރިކަމުގެ ވުޒާރާއާއި ގުޅިގެން އަލަށްފަށާ "ގުޑް އެގްރިކަލްޝަރަލް ޕްރެކްޓިސަސް"، ގެޕް ޕްރޮގްރާމްވެސް ވަނީ އިފްތިތާޙްކޮށްފައެވެ.ކޮންމެ އަހަރެއްގެވެސް އޭޕްރިލް މަހުގެ 7 ވަނަ ދުވަސް ފާހަގަކުރަމުންދަނީ ދުނިޔޭގެ ސިއްޚަތު ދުވަހުގެ ގޮތުގައެވެ. އެގޮތުން މިއަހަރުގެ ސިއްޙަތު ދުވަހުގެ ޝިޢާރެއްގެ ގޮތުގައި ދުނިޔޭގެ ސިއްޙަތު ޖަމިއްޔާ ޑަބްލިއު.އެޗް.އޯއިން ކަނޑައަޅާފައިވާ ޝިޢާރަކީ، "ދަނޑުން ސުފުރާޔަށް – ކާނާ ރައްކާތެރިކުރަމާ" މި ޝިޢާރެވެ.މި އަހަރުގެ ޝިޢާރު މައިގަނޑުގޮތެއްގައި އަމާޒުކުރެވިފައިވަނީ ކާނާއާއި، ކާބޯތަކެތި ރައްކާތެރިކަމާއެކު ބޭނުންކުރުމުގެ މައްޗަށެވެ.