އަންނަ ރޯދަމަހު ރޯދަ ހަދިޔާއެއްގެ ގޮތުގައި ރ އުނގޫފާރުގެ ހުރިހާ ގެޔަކަށް ހިލޭ ކަރަންޓް ދިނުމަށް އެ ރަށު ކައުންސިލުން ނިންމައިފިއެވެ. ރ އުނގުފާރު އިންޖިޏުގެ އަލކޫ އެރަށު ރައްޔިތުން ހިންގަމުން އަންނަ ތަނެކެވެ.
އުނގޫފާރު ކައުންސިލް މެބަރު ހުސެއިން އާސިފް ވިދާޅުވީ މި ފަހަރުވެސް ރޯދަ ހަދިޔާއެއްގެ ގޮތުން އަންނަ މަހުގެ 6 ވަނަދުވަހުން ފެށިގެން ޖޫންމަހުގެ ނިޔަލަށް އެއްވެސް ގެއަކުން ބޭނުންކުރާ ކަރަންޓަށް ބިލް ނުކުރާނެކަމަށެވެ. އަދި މި އިނާޔަތް ދޭން ނިންމާފައިވަނީ ރަށުގެ ހުރިހާ ގޭބިސީއަކަށްކަމަށާއި ދައުލަތުގެ މުވައްސައްސާތަކުން އޮންނަ އުސޫލުން ކަރަންޓް ބިލަށް ޗާޖުކުރަމުން ގެންދާނެކަމަށްވެސް އާސިފް ވިދާޅުވިއެވެ. އަދި މި މުއްދަތުގެ ތެރޭގައި ބިދޭސީން އުޅޭ ތަންތަނުންވެސް ކަރަންޓް ބިލަށް ފައިސާ ނުނަގާނެކަމަށްވެސް އާސިފް ވިދާޅުވިއެވެ.
" މީ ރައްޔިތުންގެ ނަމުގައި ހުންނަ އިންޖީނުގެއެއް. މި މުއްދަތުގެ ތެރޭގައި ގާތްގަޑަކަށް 8 ލައްކަވަރަކަށް ރުފިޔާ އަރާނެ. އެހެންނަމަވެސް ސަރުކާރުގެ މުވައްސަސާތަކަށް ހަމަ ޗާޖްކުރާނެ އެހެންވީމާ ކޮންމެވެސް ވަރެއް ލިބޭނެ ގެއްލުމެއް ނުވާނެ " ހުސެއިން އާސިފް ވިދާޅުވިއެވެ.
މީ ރޯދަމަހާއި ދިމާކޮށް އުނގޫފާރު ރައްޔިތުންނަށް ކަރަންޓް ހިލޭ ދޭ ތިންވަނަ ފަހަރުއެވެ. 2016 ވަނަ އަހަރުން ފެށިގެން ކޮންމެ ރޯދަމަހަކުވެސް އުނގޫފާރު ކައުންސިލުން އަންނަނީ ހުރިހާ ގޭބިސީއަކަށް ކަރަންޓް ހިލޭ ދެމުންނެވެ.