ބޮމުގެ ހަމަލާތަކުގައި އެއްވެސް ދިވެއްސަކަށް ގެއްލުންވިކަމުގެ މަޢުލޫމާތެއް އަދި ނުލިބޭ- ފޮރިން މިނިސްޓްރީ
ސްރީލަންކާގެ ކޮލަމްބޯގައި ދިން ބޮމުގެ ހަމަލާގައި އެއްވެސް ދިވެއްސަކަށް ގެއްލުންވިކަމުގެ މައުލޫމާތު މިހާތަނަށް ލިބިފައި ނުވާކަމަށް ފޮރިން މިނިސްޓްރީން ވިދާޅުވެއްޖެއެވެ.
ފޮރިން މިނިސްޓްރިއާއި، ސްރީ ލަންކާގައި ހުންނަ ދިވެހިރާއްޖޭގެ އެމްބަސީ ގުޅިގެން ގެންދަނީ ލަންކާގައި ދިރިއުޅެމުންދާ ދިވެހިންގެ ޙާލަތު ވަރަށް ގާތުން ބަލަމުނެނެވެ.
ބޮން ގޮއްވުމުގެ ހާދިސާތައް ހިނގާފައިވަނީ ކޮލަމްބޯގައި ހުންނަ ޝަންގްރިލާ ހޮޓަލާއި ސިނަމަން ގްރޭންޑް ހޮޓެލްގެ އިތުރުން ޗަރޗުތަކެއްގައި ކަމަށް މަޢުލޫމާތު ލިބެއެވެ. މި ސަރަަޙައްދުތަކަކީ ދިވެހިންވެސް ގޮސްއުޅޭ ސަރަޙައްދުތަކެކެވެ.
މިކަމާއި ގުޅިގެން ސްރީލަންކާގައި ދިރިއުޅޭ ދިވެހިން ބޭރަށް ނިކުމެ ނޫޅުމަށްވެސް ފޮރިން މިނިސްޓްރީއިންވަނީ އިލްތިމާސްކޮށްފައެވެ. އަދި އެހީއެއް ބޭނުންވާނަމަ، ލަސްނުކޮށް ފޮރިން މިނިސްޓްރީ ނުވަތަ، ލަންކާގައި ހުންނަ ދިވެހި އެމްބަސީއަށް އެންގުމަށްވަނީ އެދިފައެވެ.
ބޮންގޮއްވުމުގެ ޙާދިސާގައި މިހާތަނަށް 130އަށްވުރެ ގިނަ މީހުން މަރުވެފައިވާއިރު، 200އަށްވުރެ ގިނަ މީހުން ޒަޙަމްވެ ހޮސްޕިޓަލްތަކުގައި ދަނީ ފަރުވާދެމުންނެވެ.
މިކަމާއިގުޅިގެން ރައީސުލްޖުމްހޫރިއްޔާ އިބްރާޙިމް މުޙައްމަދު ސާލިޙްވަނީ މި ޙާދިސާ ހަރުކަށި އިބާރާތުން ކުއްވެރިކޮށް، ގެއްލުންވި އާއިލާތަކަށް ތަޢުޒޒިޔާވެސް ފޮނުއްވަވާފައެވެ. އަދި މިފަދަ ޓެރަރިސްޓް ހަމަލާތަކާ ދެކޮޅަށް އަބަދުވެސް ރާއްޖެއިން ދެމިތިބޭނެކަމަށްވެސް ރައީސް ވަނީ ވިދާޅުވެފައެވެ.
ލަންކާގައި ހިނގި ބޮންގޮވުމުގެ ޙާދިސާއާއި ގުޅިގެން ސްރީލަންކާގެ ބައެއް ކޮލެޖުތައްވެސްވަނީ ބަންދުކޮށްފައެވެ.
މީގެ އިތުރުން ކްރިކެޓް މެޗެއް ކުޅުމަށް މިހާރު ލަންކާއަށްގޮސްތިބި ރާއްޖޭގެ 19އަހަރުން ދަށުގެ ކްރިކެޓް ޓީމުގެ ސަލާމަތީ ކަންކަންވެސް މިހާރު ވަނީ ވަރުގަދަކޮށްފައެވެ. ދިވެހި ޒުވާން ކްރިކެޓް ޓީމް ތިބި ހޮޓަލުގެ ސަލާމަތީ ކަންކަން މިވަގުތު ބަލަހައްޓަމުންދަނީ ލަންސާ ސިފައިންނެވެ.
ރާއްޖޭގައި މުވާސަލާތީ ޚިދުމަތްދޭ ކުންފުނިތަކުންވެސް ވަނީ ސްރީލަންކާއަށް އަގުހެޔޮކޮށް ގުޅޭނެގޮތް މިހާރު ހަމަޖައްސާފައެވެ.