އެސްއެމްއީ ބޭންކު މެދުވެރިކޮށް އެންމެ ގިނަ އަދަދަކަށް ލޯނަށް އެދެނީ ރަށު ފަތުރުވެރިކަން ނުވަތަ ލޯކަލް ޓޫރިޒަމްގެ ދާއިރާއިންކަމަށް އެ ބޭންކުން ހާމަކޮށްފިއެވެ.
ކުދި އަދި މެދުފަންތީގެ ވިޔަފާރިތަކަށް ޙާއްސަކޮށްގެން އެސްއެމްއީ ބޭންކުގެ ނަމުގައި ބޭންކެއް ހުޅުވާފައިވަނީ މިދިޔަ މަހުގެ 18 ވަނަ ދުވަހުއެވެ. އެސްއެމްއީ ބޭންކު ހިންގުމަށްޓަކައި އުފައްދާފައިވާ އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަން (އެސްޑީއެފްސީ) އިން މައިގަނޑު ހަތަރު ދާއިރާއަކުން ލޯނު ދޫކުރުމަށް ވަނީ ހަމަޖެހިފައެވެ.
އެ ހަތަރު ދާއިރާއަކީ ރަށްރަށުގައި ފަތުރުވެރިކަން ކުރިއެރުވުމަށް ދޫކުރާ "ރަށު ފަތުރު ލޯން ސްކީމް" އާއި، ވިޔަފާރިތަކަށް ދުވަހުން ދުވަހަށް ބޭނުންވާ މާލީ އެހީތެރިކަން ފޯރުކޮށްދިނުމަށް ދޫކުރާ "ވިޔަފާރިއެހީ ލޯން ސްކީމް" އެވެ. އަދި ވިޔަފާރިތަށް ފުޅާކުރުމަށް ބޭނުންވާ މުދާ ގަތުމަށް ދޫކުރާ "ހަރު މުދާ ލޯން ސްކީމް" އާއި ދަނޑުވެރިކަން ކުރިއެރުވުމަށް "ދަނޑުވެރި ނަފާ"ގެ ނަމުގައި ދޫކުރާ ލޯން ސްކީމެވެ.
އެސްޑީއެފްސީ މެދުވެރިކޮށް ލޯނަށް އެދުމުގެ ފުރުސަތު މިދިޔަ މަހުގެ ފަހުކޮޅުން ފެށިގެން ހުޅުވާލާފައިވާއިރު، މި ހަތަރު ދާއިރާގެ ތެރެއިން އެންމެ ގިނައިން ލޯނަށް އެދެނީ ރަށު ފަތުރުވެރިކަން ނުވަތަ ލޯކަލް ޓޫރިޒަމްގެ ދާއިރާއިންކަމަށް އެ ބޭންކުން ވަނީ ހާމަކޮށްފައެވެ. ކުރިއަށް އޮތްތަނުގައި އިތުރު ލޯނު ސްކީމްތައް ތަޢާރަފްކުރާނެކަމަށް އެސްޑީއެފްސީ އިން ބުނެއެވެ.
މި ލޯންތަކާ ގުޅޭ އިތުރު މައުލޫމާތު، އެސްޑީއެފްސީގެ ވެބްސައިޓުން ލިބެން ހުންނާނެ ކަމަށް އެ ބޭންކުން ބުނެއެވެ. އެސްޑީއެފްސީ މެދުވެރިކޮށް ލޯނު ދޫކުރުމުގެ ކުރިން ދެފުށް ފެންނަ ގޮތަކަށް އިވެލުއޭޓްކުރާނެއެވެ. މިގޮތުން ލޯނު ދޫކުރާބީ ހުށަހަޅާ ޕްރޮޕޯސަލަށާއި، ޤާބިލްކަމަށް ބެލުމަށްފަހު ކަމަށް އެ ބޭންކުން ބުނެއެވެ. މި ބޭންކުން ލޯނު ދެމުން ދާނީ ވިޔަފާރި ކާމިޔާބުވާ މިންވަރަކަށް ބަލައިގެން ކަމަށް މީގެ ކުރިން އިކޮނޮމިކް މިނިސްޓްރީން ވަނީ ހާމަކުރައްވާފައެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ރާއްޖޭގައި ރަޖިސްޓްރީކޮށްގެން 531 ގެސްޓްހައުސް އަންނަނީ ހިންގަމުންނެވެ. މި ގެސްޓްހައުސްތަކުގެ ބެޑް ކެޕޭސިޓީ 8،733 އަށް އަރައެވެ.