ފުޅާ ދާއިރާއެއްގައި މަސްތުވާ ތަކެތީގެ ވިޔަފާރި ކުރަމުންދިޔަ ހަތަރު ދިވެއްސަކު ސްރީލަންކާއިން ހައްޔަރުކޮށްފިއެވެ.މިއަދު އިސްކަންދަރު ކޮށީގައި ނޫސްވެރިންނާއި ބައްދަލްކުރައްވާ ޑްރަގް އެންފޯސްމަންޓް ޑިޕާޓްމަންޓްގެ ހެޑް، ސުޕްރިންޓެންޑެންޓް އޮފް ޕޮލިސް އަޙްމަދު ޝިފާން ވިދާޅުވީ، އެމީހުން ލަންކާއިން ހައްޔަރުކޮށްފައިވަނީ ސްރީލަންކާ ފުލުންހުންނާއި ގުޅިގެން ހިންގި ޚާއްސަ އޮޕަރޭޝަނެއްގައި ކަމަށެވެ.ހައްޔަރުކުރި މީހުންގެ އަތުން ސަތޭކަ ފަސްދޮޅަސް ފަސް ގްރާމް ހެރޮއިނާއި ދިހަ ހާސް އެމެރިކާ ޑޮލަރުގެ އިތުުރުން އެއްލައްކަ ފަންސަވީސް ހާސް ލަންކާ ރުޕީސް ފެނިފައިވާ ކަމަށް ޝިފާން ވިދާޅުވިއެވެ.އެމީހުން މަސްތުވާތަކެތީގެ ނެޓްވޯކް ހިންގަނީ ލަންކާގެ ބަޔަކާ ގުޅިގެން ކަމަށާއި، އެ މައްސަލާގައި ދިވެހިންގެ އިތުރުން އެ ގައުމުންވެސް ބަޔަކު ހައްޔަރުކޮށްފައިވާ ކަަމަށް ޝިފާން ވިދާޅުވިއެވެ.މީގެ އިތުރުން ޝިފާން ވިދާޅުވީ، މަސްތުވާތަކެތި ހުއްޓުވުމަށް ކުރާ މަސައްކަތުގެ ދަށުން، އާދީއްތަ ދުވަހުން ފެށިގެން މާލެ ތެރެއިން ފުލުހުން ހިންގާ ތަމްރީންތަކުގައި ކުއްތާތައް ބޭނުންކުރަން ރޭވެމުންދާކަމަށެވެ.