ނޫސްވަރިކަމުގެ އެވޯޑަށް ކުރިމަތިލުމުގެ އުސޫލަށް ބަދަލުގެނެސް، އެވޯޑަށް ކުރިމަތިލުމުގެ މުއްދަތު އިތުރުކޮށްފިއެވެ.
މޯލްޑިވްސް މީޑިއާ ކައުންސިލުން ކުރިން ކުރި ޢިއުލާނުގައި ވާގޮތުން ނޫސްވެރިކަމުގެ އެވޯޑަށް ކުރިމަތިލުމުގެ މުއްދަތު މިއަދުގެ ނިޔަލަށް ހަމަވާނެއެވެ. އެހެންނަމަވެސް މިހާރުވަނީ މި މުއްދަތު މިމަހުގެ 31ގެ ނިޔަލަށް އިތުރުކޮށްފައެވެ.
މުއްދަތު އިތުރުކޮށް އެވޯޑަށް ގެނައި ބަދަލުތަކާގުޅޭ މަޢުލޫމާތު ޙިއްސާކުރައްވަމުން، މޯލްޑިވްސް މީޑިއާ ކައުންސިލްގެ ނައިބްރައީސް އަޙްމަދު އާޒިފް ވިދާޅުވީ މި ބަދަލާއެކު، އެހެން ދާއިރާތަކުން އެވޯޑަށް ކުރިމަރިލާ ފަރާތްތަކަށް ކުރިއާ ޚިލާފަށް ފީޗަރގެ ބަޔަށް ކުރިމަތިލެވޭގޮތަށް މިހާރު ބަދަލު ގެނެސްފައިވާކަމަށެވެ. އަދި އެވޯޑަށް ކުރިމަތިލާއިރު، ހުށައަޅަންޖެހޭ ފީޗަރ ލިޔުންތަކުގެ ޢަދަދު މިހާރުވަނީ ތިނަކަށް ދަށްކޮށްފައިކަމަށް އޭނާ ވިދާޅުވިއެވެ.
އާޒިފް ވިދަޅުވީ އެވޯޑަށް ކުރިމަތިލުމަށް ހުށަހަޅާ ލިޔުންތަކާއި، ވީޑިއޯތަކަކީ، ކޮންއިރެއްގެ އުފެއްދުމެއްކަން އަންގައިދޭގޮތަށް އެ ނޫސްވެރިޔަކު މަސައްކަތްކުރާ އިދާރާގެ އިސްވެރިއެއްގެ ސޮޔާއެކު ލިޔުމެއްވެސް ހުށައަޅަންޖެހޭނެކަމަށެވެ. މީގެއިތުރުން އެވޯޑަށް ކުރިމަތިލާ ފަރާތުގެ ފުރިހަމަމަޢުލޫމާތު ދެނެގަތުމަށް ކޮންމެފަރާތަކުންވެސް ސީވީ ހުށައަޅަންޖެހޭ ގޮތަށްވަނީ ބަދަލުގެނެސްފައެވެ.
"މިބަދަލުތަކާއެކު، އެވޯޑަށް ކުރިމަތިލާ ހުރިހައި ކެންޑިޑޭޓުންނާވެސް ފަނޑިޔަރުންގެ ޕެނަލްއިން މިހާރު އިންޓަރވިއު ކުރާނެ. ނަމަވެސް އުންމީދީ ނޫސްވެރިޔާ ހޮވާނީ ކައުންސިލްގެ ރައީސް އެކުލަވާލާ ޕެނަލް އިންޓަވިއުއަކުން." އާޒިމް ވިދާޅުވިއެވެ.
އާޒިމް ވިދާޅުވީ މިހާތަނަށް އެވޯޑަށް ކުރިމަތިލުމަށްއެދި ހުށައަޅާފައިވާ ފަރާތްތަކަށްވެސް، ސީވީއާއި، އެޑިޓަރުގެ ސޮޔާއެކު ލިޔުންހުށައެޅުމުގެ ފުރުސަތު ދޭނެކަމަށެވެ. ނޫސްވެރިކަމުގެ އިނާމު ދިއުން އޮންނާނީ އޮގަސްޓްމަގު 29ވަނަ ދުވަހުކަމަށް މީޑިއާ ކައުންސިލުން ވިދާޅުވެއެވެ.
ނޫސްވެރިކަމުގެ ދާއިރާއިން ދޭ އިނާމު މިއަހަރު ނުވަ ދާއިރާއަކުން ދިނުމަށް ހަމަޖެހިފައިވެއެވެ. މީގެއިތުރުން މީޑިއާކައުންސިލުންދޭ ޚާއްސަ އިނާމުގެ ބައިގައި ނޫސްވެރިކަމުގެ ރަންގަލަން 15 ބޭފުޅަކަށް، ނޫސްވެރިކަމުގެ އަލިމަސް ޝަރަފްގެ ގަލަން 6 ބޭފުޅަކަށް ދޭން މިފަހަރުވަނީ ނިންމާފައެވެ.