ގެއްލިގެން ހޯދަމުންދާ ޢުމުރުން 19 އަހަރުގެ ޝިމާ ނާފިޒުގެ ކޮއްކޮ ގޮވައިގެން ބަޔަކު މީހުން ފިލަން އުޅެނިކޮށް ފުލުހުން ހުއްޓުވައިފިއެވެ.
ޕީ.އެސް.އެމް ނިއުސްއަށް މަޢުލޫމާތުދެމުން ޝިމާގެ ބޭބެ އަޙްމަދު ޝައިނީ ބުނީ، ޝިމާގެ ކޮއްކޮ ގޮވައިގެން ފިލަން މަސައްކަތް ކުރީ ޝިމާވެސް ދަތުރުކުރި ޑިންގީ ދުއްވަންއިން މުޙައްމަދު ފަޒީލާއި، އިތުރު 2 މީހަކު ކަމަށެވެ. އަދި އެމީހުން ތިބީ މޫނު ނިވާކޮށްގެންކަމަށާއި، ޝިމާގެ ކޮއްކޮ ގޮވައިގެން ފިލަން އުޅުނީ ރަށުގެ އަތިރިފަރާތުން ޑިންގީއެއް ކައިރިކުރުމަށްފަހު އެއަށް އަރުވައިގެންކަމަށެވެ. ނަމަވެސް ފުލުހުންގޮސް އެމީހުން ހުއްޓުވައި ފުލުހުންގެ ބެލުމުގެދަށަށް ގެންގޮސްފައިވާކަމަށް ޝައިނީ ބުންޏެވެ.
"ފަޒީލާއި 2 މީހަކު މޫނު ނިވާކޮށްގެން ތިބެ އެކަން ކުރަން އުޅުނީ. އެމީހުން ފުރަން އުޅުނީވެސް ރަށުގެ ޖެޓީ ސަރަޙައްދަކުންވެސް ނޫން. ކުޑަ ޑިންގީއެއްގައި ރަށުގެ އަތިރި ފަރާތަށް ކައިރިކޮށްގެން އެއަށް ޝިމާ ކޮއްކޮ އަރުވައިގެންދާން އުޅުނީ. އެކަމު ފުލުހުންގޮސް ހުއްޓުވީ." ޝައިނީ ބުންޏެވެ.
ފުލުހުންވެސް ވަނީ މިކަން ކަށަވަރުކޮށްދީފައެވެ. އެގޮތުން މިއަދު ހަވީރު 16:00 ހާއިރު، 16 އަހަރުގެ އަންހެން ކުއްޖަކު ގޮވައިގެން 3 މީހަކު ޅ.މާމެންދޫއިން ފުރައިގެން ޑިންގީއެއްގައި ދަނިކޮށް ސިކްސް ސެންސަސް ރިސޯޓުކައިރިން ހުއްޓުވާ ފުލުހުންގެ ބެލުމުގެ ދަށަށް ގެންގޮސްފައިވާކަމަށް ފުލުހުން ބުނެފައިވެއެވެ.
މުޅި މާމެންދޫ، ޝިމާ ފެންނާނެ އިރެއްގެ އިންތިޒާރުގައި!
ޝިމާގެ ކޮއްކޮ ގޮވައިގެން އެމީހުން ދާން އުޅުނީ ސީދާ ކޮންތަނަކަށްކަމެއް އަދި މިކަމާއި ޝިމާ ގެއްލުމުގެ ޙާދިސާއާއި ސީދާ ގުޅުމެއްވާކެމެއް އަދިވަނީ ސާފުވާގޮތް ނުވެފައެވެ.
ލ. ކައްދޫއިން ފުރައިގެން އެއަތޮޅު މާމެންދޫއަށް ޑިންގީއެއްގައި ދަތުކުރަމުންދަނިކޮށް ޑިންގީ ބަންޑުން ޖަހާލާ، އޭގެން ދަތުރުކުރި އުމުރުން 19 އަހަރުގެ ޝިމާ ފާއިޒް ގެއްލިފައިވަނީ މިދިޔަ މަހުގެ 22 ވަނަ ދުވަހެވެ. އޭނާ ހޯދުމުގެ މަސައްކަތް ސިފައިން ކުރާތާ 2 ހަފްތާއަށްވުރެ ގިނަ ދުވަސްވެފައިވާއިރު، މިހާތަނަށް އައިއިރުވެސް ޝިމާއާއި އޭނާ ދަތުރުކުރިކަމަށް ބުނާ ޑިންގީގެ އެއްވެސް ޚަބަރެއް ވެފައެއް ނުވެއެވެ. ޝިމާ ހޯދުމުގެ މަސައްކަތް ސިފައިންގެ ސަރޗް އެންޑް ރެސްކިއު ޓީމުން ގެންގުޅޭ އުސޫލާ އެއްގޮތަށް މިހާރުވެސް ކުރިއަށްދާކަމަށް އެމް.އެން.ޑީ.އެފްގެ މީޑިއާ އޮފިޝަލް ކެޕްޓަން އިބްރާހީމް ޢާޒިމް ވަނީ ޕީ.އެސް.އެމްއަށް މަޢުލޫމާތުދީފައެވެ.
ޝިމާ ގެއްލުނު ޙާދިސާއާއެކު އެތައް ސުވާލެއް!
ޝިމާ ގެއްލުނު ޙާދިސާގައި ސުވާލު އުފެދޭ އެތައްކަމެއް ހުރިކަމަށްބުނެ އޭނާގެ އާއިލާއިން ވަނީ ކަންބޮޑުވުން ފާޅުކޮށްފައެވެ. އަދި ޝިމާއާއެކު ޑިންގީގައި ދަތުރުކުރި ލ.ގަމު މުޙައްމަދު ފަޒީލުގެ ޢަމަލުތަކާއި އޭނާ މީޑިއާތަކަށް ކިޔައިދީފައިވާ ކަންކަމާއި ގުޅިގެން އޭނާގެ މައްޗަށް ބޮޑެތި ތުޙުމަތުތަކެއްވެސް އަންނަނީ ކުރަމުންނެވެ.