މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތައް ޙިމާޔަތްކުރުމުގެ ބިލަށް ޙިޔާލު ހުށައެޅުމަށް ހުޅުވާލައިފި
މުދާ ގަންނަ ފަރާތްތަކާއި ޚިދުމަތް ލިބި ގަންނަ ފަރާތްތައް ޙިމާޔަތްކުރުމުގެ ބިލަށް ޙިޔާލު ހުށައެޅުމަށް ހުޅުވާލައިފިއެވެ.
މި ބިލަށް ޢާންމުންގެ ޚިޔާލު ހޯދުމަށް އިކޮނޮމިކް މިނިސްޓްރީން ހުޅުވާލާފައިވަނީ މިމަހުގެ 11 ވަނަ ދުވަހުގެ ނިޔަލަށެވެ. ބިލަށް ހިޔާލު ހުށައަޅަން ބޭނުންވާ ފަރާތްތަކުން އިކޮނޮމިކް މިނިސްޓްރީގެ އީމެއިލް އެޑްރެހަށް މެއިލް ކުރުމަށް އެ މިނިސްޓްރީން އެދެއެވެ.
މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތައް ޙިމާޔަތްކުރުމުގެ ބިލުގެ މައިގަނޑު މަޤްސަދުތަކުގެ ތެރޭގައި، މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތަކުގެ ޙައްޤުތައް ކަނޑައެޅުމާއި، ވިއްކާ މުދަލެއްގައި ނުވަތަ ދެވޭ ޚިދުމަތެއްގައި ހުންނަންޖެހޭ ޝަރުޠުތައް ކަނޑައެޅުން ހިމެނެއެވެ. އަދި މުދާ ވިއްކާ ފަރާތްތަކާއި ޚިދުމަތްދޭ ފަރާތްތަކުގެ ޙައްޤުތަކާއި ޒިންމާތައް ކަނޑައެޅުމާއި، މުދާ ވިއްކުމުގައި ނުވަތަ ޚިދުމަތެއްދިނުމުގައި ކުރުން މަނާކަންކަން ބަޔާންކުރުމާއި، މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތަކަށް ލިބިފައިވާ ބަދަލުތައް ކަނޑައެޅުން ހިމެނެއެވެ.
މީގެ އިތުރުން، މި ބިލުގެ ސަބަބުން ރާއްޖޭގައި ފުރަތަމަ ފަހަރަށް، އިންޓަނެޓް މެދުވެރިކޮށް މުދާ ވިއްކާ ފަރާތްތަކާއި ޚިދުމަތް ދޭ ފަރާތްތަކުން ޢަމަލުކުރަންޖެހޭ އުޞޫލުތައް ބަޔާންކުރުމަށް ލާޒިމުކުރެވޭނެއެވެ.
މިބިލު ފަރުމާ ކުރެވިފައިވަނީ، ކޯޓުން ބޭރުގައި މައްސަލަ ހައްލުކުރެވޭނެ އިންތިޒާމެއް ހިމެނޭ ގޮތަށެވެ.
މުދާ ގަންނަ ފަރާތްތަކާއި ލިބިގަންނަ ފަރާތްތައް ހިމާޔަތް ކުރުމުގެ ގާނޫނެއް މިހާރު ވެސް އޮވެ އެވެ. ނަމަވެސް މި ބިލް ފާސްވުމުން އެ ޤާނޫނު އުވިގެންދާނެއެވެ.
އިކޮނޮމިކް މިނިސްޓްރީން ބުނީ، މި ބިލަކީ ކުރީގެ ޤާނޫނަށްވުރެ މާ ފުރިހަމަ ޤާނޫނަކަށް ވެގެންދާނެކަމަށެވެ.