ހޮޓެލިއަރ މޯލްޑިވްސްއިން އިންތިޒާމުކޮށްގެން ބޭއްވުމަށް ހަމަޖެހިފައިވާ 4 ވަނަ ޖެނެރަލް މެނޭޖަރ ފޯރަމްގެ ޕްލެޓިނަމް ސްޕޮންސަރަކަށް އެސް.އެން.އެސް ގުރޫޕް ހަމަޖައްސައިފިއެވެ.
މިއީ މިދިޔަ އަހަރުގެވެސް ޖީއެމް ފޯރަމްގެ ޕްލެޓިނަމް ސްޕޮންސަރެވެ. އެސް.އެން.އެސް ގުރޫޕަކީ ދުބާއީގެ ކުންފުންޏެކެވެ. މި ކުންފުންޏަކީ ފަތުރުވެރިކަމުގެ ދާއިރާގައި ބޭނުންކުރާ ފަރުނީޗަރު އުފައްދާ ކުންފުންޏެކެވެ. މި ކުންފުނީގެ އުފެއްދުންތައް ޔޫރަޕް، އޭޝިޔާ އަދި މެދުއިރުމައްޗަށް އަންނަނީ މާކެޓްކުރަމުންނެވެ.
ޖީއެމް ފޯރަމަކީ ރާއްޖޭގެ ރިސޯޓުތަކުގައި ޖެނެރަލް މެނޭޖަރުންގެ މަޤާމުގައި އެ ދާއިރާގައި މަސައްކަތްކުރާ މީހުންނަށް އަމާޒުކޮށްގެން ކުރިއަށް ގެންދާ އެއް ދުވަހުގެ ފޯރަމެކެވެ. މިއަހަރުގެ ޖީއެމް ފޯރަމް، އޭޕްރިލް މަހުގެ 3 ވަނަ ދުވަހު، ބަނޑޮސް އައިލެންޑް ރިސޯޓުގައި ކުރިއަށް ގެންދިއުމަށް ހަމަޖެހިފައިވާއިރު، ފެބްރުއަރީ މަހުގެ ނިޔަލަށް ފޯރަމްގައި ރަޖިސްޓަރވުމުގެ ފުރުސަތުވަނީ ހުޅުވާލާފައެވެ.
ހޮޓެލިއަރ މޯލްޑިވްސްއިން ބުނީ، މި ފޯރަމްގެ މަޤްޞަދަކީ ރިސޯޓުތަކުގެ ޖެނެރަލް މެނޭޖަރުން އެއް ތަނަކުން ބައްދަލުވެ، ފަތުރުވެރިކަމުގެ ދާއިރާގައި ހުރި މައްސަލަތައް ފާހަގަކޮށް އެކަންކަމަށް ޙައްލު ހޯދުން ކަމަށެވެ. އަދި މި ފޯރަމްގައި، ފަތުރުވެރިކަމުގެ ސިނާޢަތާއި ގުޅުންހުރި މުހިއްމު މައުޟޫތަކަށް އަލިއަޅުވާލައި، މަޝްވަރާތައް ކުރިއަށް ގެންދިއުމަށްވަނީ ހަމަޖެހިފައެވެ.