އެމްއެމްޕީއާރުސީގެ ކޮރަޕްޝަނާއި ގުޅޭގޮތުން ޕީޕަލްސް ނޭޝަނަލް ކޮންގްރެސް ޕާޓީގެ ރައީސް ޢަބްދުއްރަހީމް ޢަބްދުﷲ ދެއްކެވި ވާހަކަތަކާއި ގުޅިގެން އޭނާ އެންޓި-ކޮރަޕްޝަން ކޮމިޝަނަށް ހާޒިރުކޮށްފިއެވެ.
އެމްއެމްޕީއާރުސީގެ ފައިސާ ލިބުނު ފަރާތްތަކުގެ ލިސްޓް އެނގިވަޑައިގަންނަވާކަމަށް ވިދާޅުވެ، ޢަބްދުއްރަހީމް ދާދި ފަހުން ވާހަކަ ދައްކަވާފައިވާއިރު، ޕީޕީއެމްގެ ތަރުޖަމާން، ކެލާ ދާއިރާގެ މެންބަރު ޢަލީ ޢާރިފްވެސް ވަނީ ޚިޔާނާތުގެ ފައިސާ ނެންގެވި މެންބަރުން އެނގިވަޑައިގަންނަވާކަމަށް ވިދާޅުވެ ވާހަކަ ދައްކަވާފައެވެ.
އެ ތުހުމަތުތަކާއި ގުޅިގެން ޢަބްދުއްރަހީމް ޢަބްދުﷲގެ އިތުރުން ޢަލީ ޢާރިފްވެސް ވަނީ އޭސީސީއަށް ޙާޒިރުކޮށްފައެވެ.
ކުރީގެ ރައީސް ޔާމީންގެ މައްޗަށް ތުހުމަތުކުރާ މަނީ ލޯންޑަރިންގެ މައްސަލާގައި ޝަރީޢަތް ނިމެންދެން އެމަނިކުފާނު ބަންދުގައި ބެހެއްޓުމަށް ކޯޓުން ކުރި ހުކުމާއި ގުޅިގެން ޕީޕީއެމާއި ޕީއެންސީގެ ލީޑަރޝިޕުން ގެންދަނީ އެމްއެމްޕީއާރުސީގެ ޚިޔާނާތުގެ ފައިސާ މިހާރުގެ ސަރުކާރުގައި ތިއްބެވި ބައެއް ފަރާތްތަކުންވެސް ނެންގެވިކަމަށް ތުހުމަތުކުރައްވަމުންނެވެ.
އެމްއެމްޕީއާރުސީގެ ޚިޔާނާތުގެ މައްސަލަ ތަޙްޤީޤްކޮށް އޭސީސީން ނެރުނު ރިޕޯޓްގައި، 155 މީހެއްގެ އެކައުންޓަށް ޚިޔާނާތުގެ ފައިސާ ވަދެފައިވާކަމަށް ފާހަގަކޮށްފައި ވެއެވެ.