ވޯޓުކަރުދާހުގައި ކުރަހައިފިނަމަ ވޯޓު ބާޠިލްވާގޮތަށް ހުށަހެޅި އިޞްލާހަކީ އިންތިޚާބު ކައިރިވެފައިވަނިކޮށް އިންތިޚާބު ގަޑުބަޑުކުރަން ހުށައެޅި އިޞްލާޙުތަކެއްކަމަށް ވިދާޅުވެ މެންބަރުންގެ ވަރުގަދަ ބަހުގެ ހޫނު ހަމަލާތަކެއް ރައްދުކޮށްފިއެވެ. އިންތިޚާބުތަކާބެހޭ ޢާންމު ޤާނޫނަށް ހުޅުދޫ ދާއިރާގެ މެންބަރު މުޙައްމަދު ޝާހިދު ހުށަހެޅުއްވި އިޞްލާޙުގައިވަނީ، އިންތިޚާބުތަކުގައި ބޭނުންކުރާ ވޯޓުކަރުދާހުގައި ކެނޑިޑޭޓާ ދިމާގައި ރަނގަޅު ފާހަގަފިޔަވައި، އިތުރު އެހެން އެއްވެސް ކުރެހުމެއް ކުރަހައިފިނަމަ ވޯޓު ބާޠިލްވާނެކަމަށެވެ.
އިންތިޚާބުތަކާ ބެހޭ ޢާންމު ޤާނޫނަށް ހުށައެޅުއްވި އިޞްލާޙުގެ މަޤްޞަދުގައި ބުނެފައިވަނީ، ވޯޓު ކަރުދާހުގައި އެމީހަކަށް ފެންނަ ކެނޑިޑޭޓަކާ ދިމާގައި ރަނގަޅު ފާހަގަޖެހުމުގެ އިތުރުން، ވޯޓުދޭ ފަރާތް އެނގޭނެހެން އިތުރު އެހެން ފާހަގަޖަހައި ނުވަތަ ކުރެހުން ކުރަހާފައި ހުންނާތީ ވޯޓުދިން ފަރާތުގެ ސިއްރުކަން ގެއްލޭކަމަށެވެ.
މި އިޞްލާހަށް ވާހަކަ ދެއްކެވި އިދިކޮޅު ޕީޕީއެމަށް ނިސްބަތްވެވަޑައިގަންނަވާ މެންބަރުން ވިދާޅުވީ، ވޯޓު ސިއްރުކުރުމަކީ މިނިވަން އިންސާފުވެރި އިންތިޚާބަކަށް މަގުފަހިކޮށްދޭކަމަކަށްވަތީ ޤާނޫނަށް ހުށައަޅާފައިވާ އިޞްލާހަކީ މުހިންމު އިޞްލާހެއްކަމަށެވެ. އިންތިޚާބުގެ ކުރިންވެސް އަދި ފަހުންވެސް ވޯޓުގެ ސިއްރުކަން ކަށަވަރުކޮށްދޭ އިޞްލާހަކީ އިންތިޚާބަކާހަމައަށް ދާއިރު ކޮންމެހެންވެސް އޮންނަންޖެހޭނެ އިޞްލާހެއްގެ ގޮތުގައި އިދިކޮޅު މެންބަރުން ވިދާޅުވިއވެ. ބައެއް މެންބަރުން ވިދާޅުވީ، ވޯޓު ކަރުދާހުގައި ވަކިކުރެހުމެއް ކުރެހުމަކީ ވަކިބަޔަކަށް މާލީގޮތުން ފައިދާތަކެއް ހޯދައިދިނުމަށް މަގުފަހިކޮށްދޭކަމެއްކަމަށާއި، ވޯޓުގެ ޞައްހަކަންވެސް ގެއްލޭކަމެއްކަމަށެވެ. މިއިޞްލާހަށް ޖުމްހޫރީ ޕާޓިގެ ބައެއް މެންބަރުންވެސް އަދި ޢަދާލަތު ޕާޓީންވެސް ތާޢީދުކުރައްބައި ވާހަކަފުޅުދެއްކެވިއެވެ.
"ވޯޓު ކަރުދާހުގައި ކުރެހުމާއިި ހަމައަށް ވޯޓު ދޭ މީހާވެސް މި ގެންދަނީ ބަޔަކު ރާވައިގެން. އޭނާގެ މަޖުބޫރީ ހާލަތްތަކުން ފައިދާނަގައިގެން ކޮންމެސް މާލީ ފަިދާތަކެއްދީގެން އޭނާއަށް މަޖުބޫރުވޭ ވޯޓުދޭ ދުވަހު ވަކި ގޮތަކަށް ކުރަހާ ދައްކަން." ޕީޕީއެމްގެ ޕާލިމަންޓްރީ ގްރޫޕްގެ ލީޑަރު އަޙްމަދު ނިހާން ޙުސައިން މަނިކު ވިދާޅުވިއެވެ.
މިކަމާމެދު ވާހަކަފުޅުދައްކަވަމުން މަކުނުދޫ ދާއިރާގެ އަދާލަތުޕާޓިގެ މެންބަރު އަނާރާ ނަޢީމް ވިދާޅުވީ "ވޯޓު އެއީ ސިއްރު ވޯޓެއްގެ ގޮތުގައި ބޭއްވޭފަހދަ ގޮތަކަށް މި އިޞްލާޙުތައް ގެނައުން އެއީ ކިތަންމެ ފަހުވަގުތެއްގައި ގެންނަންޖެހުނަސް ގެނައުން އެއީ މުހިންމުކަމެއްކަމަށް ފާހަގަކޮށްލަން." ކެމަށެވެ.
އިންތިޚާބުތަކާބެހޭ ޢާންމު ޤާނޫނަށް ހުށަހަޅުއްވާފައިވާ މިއިޞްލާޙަކީ މީގެކުރިންވެސް މަޖިލީހަށް ހުށަހަޅުއްވައި ބަދަލުތަކެއް ގަނައުމަށް މަސައްކަތްކޮށްފައިވާ އިޞްލާހެކެވެ. އެކަމަށް ފާޑު ވިދަޅުވެ އެމްޑީޕީގެ މެންބަރުން ވަނީ ވަރަށް ބޮޑަށް ނުރުހުން ފާޅުކޮށް ވާހަކަފުޅުދައްކަވާފައެވެ. އެ މެންބަރުން ވިދާޅުވީ، އިންތިޚާބު ކުޑަތަންވަމުންދަނިކޮށް އިންތިޚާބާގުޅޭ އިޞްލާޙުތައް ގެނައުމަކީ ޤަބޫލުކުރެވޭނެކަމެއް ނޫންކަމަށާ، މިއީއިންތިޚާބު ގަޑުބަޑުކުރުމަށް ކުރާ މަސައްކަތްތަކެއްކަމަށެވެ.
"ވޯޓު ކަރުދާސްކޮޅުގައި ކުރެހޭތީ ނުކުރެހޭގޮތް ހައްދަވަންވެސް މި ހުށައަޅުއްވނީ ހަމަ ޕީޕީއެމް. ވޯޓު ކަރުދާސްކޮޅުގައި ނުކުރެހޭތީ ކުރަހާ ގޮތް ހައްދަވަންވެސް މި ހުށައަޅއުްވަނީ ޕީޕީއެމް މެންބަރުން." މާފަންނު އުތުރު ދާއިރާގެ އެމްޑީޕީ މެންބަރު އިމްތިޔާޒް ފަހުމީ ވިދާޅުވިއެވެ.
އަދި ގަލޮޅު އުތުރު ދާއިރާގެ މެންބަރު އީވާ ޢަބްދުﷲ ވިދާޅުވީ "އިހަކަށްދަވަހު މަޖިލީހަށް ހުށައެޅީ ވޯޓު ކަރުދާސްކޮޅުގައި ކުރެހޭނޭ. މިއަދު ހުށައަޅަނީ ނުކުރެހޭނޭ އަނެއްކާވެސް މާދަމާ ހުށައަޅާނެ ކުރެހޭނޭ އަނެއްކާ އަނެއްދުވަހު ނުކުރެހޭނޭ."ކަމަށެވެ.
އިންތިޚާބުތަކާބެހޭ ޤާނޫނަށް މިއިޞްލާޙު ހުށަހަޅުއްވާފައިމިވަނީ، ރައްޔިތުންގެ މަޖިލީހުގެ އިންތިޚާބަށް އިލެކްޝަންސް ކޮމިޝަނުން ތައްޔާރުވަމުން އަންނަ ދުވަސްވަރެއްގައެވެ.