މިދިޔަ ހުކުރު ދުވަހު ލ. ކައްދޫ އިން ފުރައިގެން މާމެންދޫއަށް ދަތުރުކުރި ޑިންގީއެއް ބަންޑުން ޖަހާލި ހާދިސާގައި ގެއްލިގެން ހޯދަމުންދާ 19 އަހަރުގެ ޝިމާ ފާއިޒް ހޯދުމުގެ މަސައްކަތް ހުއްޓުމެއްނެތި ކުރިއަށްދާއިރު، އޭނާގެ އާއިލާއާއި ގާތްއެކުވެރިން އަދިވެސް ތިބީ ޝިމާ ފެންނާނެ ކަމުގެ އުންމީދުގައެވެ.
ގދ. ފިޔޯރީ ޢުމުރުން 19 އަހަރުގެ ޝިމާ ގެއްލިފައިވަނީ މިމަހުގެ 22 ވަނަ ދުވަހުގެ އިރުއޮއްސުނު ވަގުތު އޭނާއާއި އިތުރު މީހަކު ލ.ކައްދޫއިން ފުރައިގެން އެއަތޮޅު މާމެންދޫއަށް ދަތުރު ކުރަމުންދިޔަ ޑިންގީ ގާދޫ ކަނޑުއޮޅިއަށް ބަންޑުން ޖަހާލުމާ ގުޅިގެންނެވެ.
ޑިންގީ ބަންޑުން ޖަހާލީ ޕެޓްރޯލް ހުސްވެގެން، ޕެޓްރޯލް އަޅަން މަޑުކޮށްފައި އޮއްވާ ނެގި ރާޅަކާއެކު ކަމަށް ޑިންގީގައި ދަތުރުކުރި ފިރިހެން މީހާ ވަނީ ފުލުހުންނަށް މަޢުލޫމާތު ދީފައެވެ. އަދި ޑިންގީ ބަންޑުން ޖަހާލުމުން އޭނާ އެހީތެރިކަމެއް ހޯދުމަށް ފަތާފައިގޮސް އެއަތޮޅު ގާދޫ ކައިރީ އޮތް ސިކްސް ސެންސަސް ލާމު ރިސޯޓަށް އެރީ ޝިމާއަށް ކަނޑުމަތީގައި އޮވެވޭނެގޮތް ހެދުމަށްފަހު ކަމަށްވެސް އޭނާ ވަނީ ބުނެފައެވެ. މި ހާދިސާ ފުލުހުންނަށް ރިޕޯޓްކޮށްފައިވަނީ ހުކުރު ދުވަހުގެ ރޭ 21:30 ހާ އިރުއެވެ.
ކައްދޫއާއި މާމެންދޫއާއި ދެމެދު ފެރީއާއި ލޯންޗު ދަތުރުކުރޭ!
ޝިމާ ދަތުރުކުރި ޑިންގީއަކީ ފައިބަރުން ހަދާފައިވާ ގާތްގަނޑަކަށް 12 ފޫޓު ދިގު ޑިންގީއެކެވެ. އަަދި ބުނެވޭގޮތުގައި އޭގައި އަޅާފައިވަނީ އެންމެ 3 ހޯސްޕަވަރުގެ އިންޖީނެކެވެ. ކައްދޫއިން މާމެންދޫއަށް ސްޕީޑް ލޯންޗާއި، ފެރީ ދޯނިވެސް ދަތުރުކުރެއެވެ. ކައްދުއާއި މާމެންދުއާ ދެމެދު 14 ކިލޯމީޓަރަށްވުރެ ދިގު ރާސްތާއެއް ހުރަސްކުރަންޖެހޭއިރު، ގަދަ ކަނޑުއޮޅިއެއްވެސް ހިމެނޭ އެ ސަރަޙައްދު ހުރަސްކޮށް އާދައިގެ ކުޑަކުޑަ ޑިންގީއެއްގައި ޝިމާ ދަތުރުކުރަންޖެހުނު ސަބަބު އަދިވެސް ސާފެއް ނުވެެއެވެ.
ޕީ.އެސް.އެމް ނިއުސްއަށް މަޢުލޫމާތުދެއްވަމުން މާމެންދޫ ކައުންސިލްގެ ރައީސް ޢަބްދުލްމުޙުސިން މުޙައްމަދު ވިދާޅުވިގޮތުގައި، ކައްދޫ އެއަރޕޯޓާއި މާމެންދުއާ ދެމެދު، ހުކުރު ދުވަހާއި ހޯމަ ދުވަސް ފިޔަވައި ހަފްތާގެ ކޮންމެ ދުވަހަކުވެސް ފެރީ ދަތުރުކުރެއެވެ. ފެރީން ދަތުރުކުރާނަމަ ކައްދޫއިން މާމެންދޫއަށް ގަޑިއިރަކުން ދެވޭއިރު، ސްޕީޑް ލޯންޗުގައި 15 ވަރަކަށް މިނެޓުން ދެވެއެވެ.
ޢަބްދުލްމުޙުސިން ވިދާޅުވިގޮތުގައި 12 ފޫޓުގެ ޑިންގީއަކީ އެފަދަ ދުރުމިނެއްގައި ދަތުރުކުރުމަށް އެންމެ އެކަށީގެންވާ ވަރުގެ އުޅަނދެއް ނޫންކަަމަށާއި، އެ ސައިޒުގެ އުޅަނދުތައް ފަޅުތެރޭގައި މަސް ބޭނުމަށްވެސް އެރަށުގެ މީހުން ބޭނުން ނުކުރާކަމަށެވެ. އަދި އެފަދަ ދޭތެރެއެއްގައި ދަތުރުކުރުމަށް އެރަށުގެ މީހުންވެސް ޑިންގީ ބޭނުންނުކުރާ ކަމަށާއި، ޝިމާ ދަތުރުކުރި ޑިންގީއަކީ އެއަތޮޅު ފޮނަދޫގައި އުޅޭ ގާދޫ މީހެއްގެ ޑިންގީއެއްކަމަށްވެސް ކައުންސިލް ރައީސް ވިދާޅުވިއެވެ.
ޝިމާ ހޯދާތާ 3 ދުވަސް، އަދިވެސް ޙަބަރެއް ނުވޭ!
ޝިމާ ހޯދުމުގެ މަސައްކަތް ވަޔާއި ކަނޑުމަގުން ސިފައިން މިހާރުވެސް އަންނަނީ ހުއްޓުމެއްނެތި ކުރަމުންނެވެ. އަދި މި މަސައްކަތުގައި ރާއްޖޭގައި މިވަގުތު ލިބެންހުރި ހުރިހާ ވަސީލަތެއްގެ ބޭނުން އަންނަނީ ކުރަމުންނެވެ. އެމް.އެންޑީ.އެފްގެ ޑައިވަރުންނާއި، ސްނޯކްލިންގ ޓީމުތަކާއި، އެފް.އައި.ސީއާއި، ހާބަރ ކްރާފްޓާއި، ގަލްފް ކްރާފްޓާއި، ސިކްސް ސެންސަސް ރިސޯޓާއި، ލ.ގަމު ރައިވެރީސް ގެސްޓް ހައުސްގެ ފަރާތުން ޝިމާ ހޯދުމުގެ މަސައްކަތުގައި އަންނަނީ ހަރަކާތްތެރިވަމުންނެވެ. ހެލިކޮޕްޓަރު ބޭނުންކޮށްގެންނާއި، ފާސްޓަރ އިންޓަރސެޕްޓަރ ކްރާފްޓް ލޯންޗުގެ ނައިޓް ވިޝަން ކެމެރާގެ އެހީގައި ކަނޑުގެ ސަރަޙައްދުވެސް ދަނީ ބަލަމުންނެވެ. އަދި ޝިމާ ގެއްލުނު ކަމަށް ބެލެވޭ ސަރަޙައްދުގައި ކޯސްޓް ގާޑު ޝިޕް ޝަހީދު ޢަލީ ހަރަކާތްތެރިވަމުންދާއިރު، މި މަސައްކަތުގައި ޑައިވިންގ ރޮބޯޓްވެސް އަންނަނީ ބޭނުންކުރަމުންނެވެ.
ޝިމާ ހޯދާތާ މިއަދަށް 3 ދުވަސް ވެފައިވާއިރު، މި މަސައްކަތުގައި މިއަދު އެކަނިވެސް އޭނާ ގެއްލުނުކަމަށް ބެލެވޭ ކަނޑުގެ ސަރަހައްދުން ފެށިގެން 5 މޭލުގެ ސަރަޙައްދެއް ވައިގެ މަގުން ވަނީ ބަލާފައެވެ. ނަމަވެސް ޝިމާއާއި، ބަންޑުން ޖަހާލިކަމަށް ބުނާ ޑިންގީގެވެސް އެއްވެސް ޙަބަރެއް ނުވާކަމަށް ސިފައިން ބުނެއެވެ.
ޝިމާގެ ކުއްލި ގެއްލުމާއެކު އެތަކެއް ސުވާލުތަކެއް!
މި ޙާދިސާގައި މީޑިއާތަކަށް މިހާތަނަށް ތިލަވެފައިވާ މަޢުލޫމާތުތަކަށް ބަލާނަމަ، ޝިމާއަށް ފަތަން ނޭނގޭކަން އޭނާއެކު ޑިންގީގައި ދަތުރުކުރި މީހާއަށް އެނގެއެވެ. އެހީ ހޯދުމަށްކަމަށްބުނެ އެންމެ ކައިރީ އޮތް ރިސޯޓަށް ފަތާފައި ދިއުމުގެ ކުރިން، ޝިމާ ގެނބުނަ ނުދީ ކަނޑުމަތީގައި އޮތުމަށް ހަމެއް އޭނާ ޝިމާއަށް ދީފައިވެއެވެ. އަދި ފޯނެއްވެސް ޝިމާއަށް ދިންކަމަށް އޭނާ ވަނީ ބުނެފައެވެ. ނަމަވެސް މިއީ މިކަން ހިނގާދިޔަ ގޮތްކަމަށް ގިނަ ބަޔަކަށް ޤަބޫލުކުރަން އަދިވެސް ދަށްޗެވެ. މި ޙާދިސާއާއި ގުޅުވައިގެން ތަފާތު ގިނަ ވާހަކަތަކެއް އަންނަނީ ދެކެވެމުންނެވެ. ހުސް ޝައްކާއި ކުށްހީގެ ވާހަކަތަކެވެ.
ޝިމާއަށް ފަތަން ނޭނގޭ ހާލު އޭނާ ކަނޑުމައްޗަށް އެކަނިދޫކޮށްލީ ކީއްވެހެއްޔެވެ؟ ކަނޑުމައްޗަށް ޝިމާ އަމިއްލަ ހާލައިގެން ދޫކޮށްލުމުގެ ބަދަލުގައި، އޭނާ ސަލާމަތްކުރުމަށް އެއަށްވުރެ ޒިންމާދާރުކަން ބޮޑުގޮތެއްގައި މަސައްކަތް ނުކުރީ ކީއްވެހެއްޔެވެ؟ ފޯނެއް އޮތްކަން އެނގިހުރެ ފަތާފައި ރިސޯޓަށް އެރުމުގެ ބަދަލުގައި އެންމެ ފުރަތަމަވެސް ކަމާބެހޭ ފަރާތްތަކަށް ނުގުޅުނީ ކީއްވެހެއްޔެވެ؟ ޑިންގީ ބަންޑުން ޖަހާލިކަމަށް ބުނާ ގާދޫ ކަނޑުއޮޅިން މީހަކަށް ފަތާފައިގޮސް ރިސޯޓަށް އެރިދާނެހެއްޔެވެ؟ ފްލޯޓްކުރުމަށް ޝިމާއަތަށް ހަމެއްދޭނެހާ ވަގުތު އޭނާއަށް ލިބުނުއިރު، އެނާއާއެކު ޝިމާ ރިސޯޓަށް ގެންދަން މަސައްކަތް ނުކުރީ ކީއްވެހެއްޔެވެ؟ ޙާދިސާ ހިނގިކަމަށް ބުނަނީ 18:30 ހާއިރެވެ. ނަމަވެސް ގެއްލިގެން ރިޕޯޓުކޮށްފައިވަނީ 9 ޖަހާވެސް ބޮޑުވިފަހުންނެވެ. ރިޕޯޓްކުރުން ލަސްވީ ކީއްވެހެއްޔެވެ؟ މިއީ ހައްތަހާވެސް މީހުން އުފައްދަމުންދާ ސުވާލުތަކެވެ.
އުއްމީދު ކަނޑައެއްނުލަން - ޝިމާ މަންމަ
ރިސޯޓެއްގައި މަސައްކަތް ކުރަމުންދިޔަ ޝިމާ، މާމެންދޫއަށް ދިޔައީ އޭނާގެ ތުއްތު ދަރިފުޅު ދެކެލުމަށެވެ. ބުރާސްފަތި ދުވަހުގެ ފަތިހުގެ ވަގުތެއްގައި ކައްދޫ އެއަރޕޯޓަށް ދިއުމަށްފަހު ރަށަށް ދާންއޮތް ފެރީ "މިސްވުމުން" ޖެހިގެންއައި ހުކުރު ދުވަހު މާމެންދޫއަށް ދިއުމަށް ދަތުރު ފެށިއެވެ. ދަމުން ޝިމާގެ މަންމައަށް އެރަށަށް ދިއުމަށް ނައްޓާލީކަމަށްބުނެ މެސެޖެއްވެސް ކޮށްފައިވެއެވެ.
ޕީ.އެސް.އެމް ނިއުސްއާއި ވާހަކަދައްކަމުން ޝިމާގެ މަންމަ ބުނެފައިވަނީ މިކަމުގައި ސުވާލު އުފެދޭ އެތައް ކަމެއް އެބަހުރިކަމަށާއި، އެންމެ ބޮޑު ކަންބޮޑުވުމަކީ އެހާ ކުޑަ ޑިންގީއެއްގައި އަމުދުން އިރުއޮއްސުނު ފަހުން ދަތުރުކޮށްފައި އައުން ކަމަށެވެ. ޝިމާ ގެއްލުނުކަމުގެ ޙަބަރު އޭނާގެ މަންމައަށް ލިބުނީ ޝިމާ ރައްޓެހިވެގެންއުޅޭ ކުއްޖާގެ ފަރާތުންކަމަށް އޭނާގެ މަންމަ ބުންޏެވެ.
"އަޅުގަނޑުގެ މައްސަލައަކީ އެހާ ކުޑަ ޑިންގީއެއްގައި އެހާގަދަ އިރުގައިވެސް ރޭގަނޑު 6 ޖަހާބޮޑުވިފަހުން ފުރީ.. ޙާދިސާ ހިނގިކަމަށް ބެލެވެނީ 6:30 ހާއިރު.. ނަމަވެސް އެކަމުގެ މަޢުލޫމާތު ލިބުނީ އެރޭ 9 ޖަހާވެސް ބޮޑުވި ފަހުން.." ޝިމާ މަންމަ ބުންޏެވެ.
ޝިމާ މަންމަ ބުނީ އެ ޙާދިސާއަށްފަހު ޑިންގީ ދުންވަން އިން މީހާ އޭނާއާއި ފޯނުން ގުޅާ، ކަން ހިނގާދިޔަ ގޮތް ކިޔައިދިންކަމަށެވެ. ޑިންގީ ބަންޑުން ޖަހާލުމާއެކު ދެ މީހުން ކަނޑަށް ވެއްޓުމުން، ޝިމާ ނަގާ ބަންޑުން ޖެހިފައިއޮތް ޑިންގީ މައްޗަށް ދެ ފަހަރު މަތިން އެރުވިކަމަށާއި، ދެ މީހުންނަށްވެސް ލޮނުގެ އަސަރު ވަރަށް ބޮޑަށް ކުރިކަމަށް އޭނާ ކިޔައިދިންކަމަށް ޝިމާގެ މަންމަ ބުންޏެވެ.
"އޭނަ ބުނީ ޑިންގީ ބަންޑުންޖަހާލުމާއެކު ޝިމާ ދިޔައީ ޑިންގީގެ ދަށަށޭ.. ތިމަންނަ އޭނަ ނަގާ ޑިންގީ މަތީ ބެހެއްޓީމޭ.. އަނެއްކާވެސް ކަރުފެނާ ހިސާބަށް ވެއްޓުމުން ނަގާ އެރުވީމޭ.. ހަމެއްވެސް ދިންކަމަށާއި ޝިމާއަށާއި ތިމަންނައަށްވެސް ވަރަށް ބޮޑަށް ލޮނު ބޮވުނޭ.. ޝިމާއަތަށް ހަމެއްދީފައި ބައްދާލައިގެން އޮންނާށޭ ބުނި.. ދެން ތިމަންނަ ހަކަތަނެތިގެން ލޮނުގަނޑުމަތީ އޮތީއޭ.. ދެން އޮޔާ އެހެން ދަމުންދަމުން، ކުޑަކޮށް ގައިގައި ވަރުޖެހުނީމަ ފަތާފަ ރިސޯޓަށް ދިޔައީ.." ޝިމާ މަންމަ ކިޔައިދިނެވެ.
މި ޙާދިސާއާއި ގުޅޭގޮތުން މީޑިއާގައި އެކި ވާހަކަތައް ދެކެވެމުންދާއިރު، އާއިލާގެ އެދުމުގެ މަތިން މާމެންދޫ ކައިރިން އޮންނަ ފަޅު ދެ ރަށްކަމަށްވާ ލ. މީދޫ އާއި ހުޅުމެންދޫވެސް ވަނީ ބަލައި ފާސްކޮށްފައެވެ. ނަމަވެސް މިހާތަނަށް އެއްވެސް ކުރިއެރުމެއް ލިބިފައެއްނުވެއެވެ.
ޝިމާ ހޯދުމުގެ މަސައްކަތް ހުއްޓުމެއްނެތި މިހާރުވެސް ކުރިއަށްދާއިރު އޭނާގެ އާއިލާގެ ހުރިހާވެސް އުއްމީދަކީ ޝިމާ ހެޔޮ ހާލުގައި ގަދަވެ ސަލާމަތުން ފެނުމެވެ. ޝިމާ ހޯދާތާ މިހާރު 3 ދުވަހާއި 25 ގަޑިއިރަށްވުރެ ގިނައިރު ވެފައިވާއިރު އާއިލާއާއި އެންމެންގެވެސް އުންމީދަކީ ޝިމާ ދިރިހުއްޓާ ފެނުމެވެ. ބޭނުންވަނީ ހުރިހާ އެންމެންގެވެސް ހެޔޮ ދުޢާއެވެ.