ޑިންގީ ބަންޑުން ޖަހާލުމާގުޅިގެން ގެއްލިގެން ހޯދަމުންދާ ޝިމާ ނާފިޒް ހޯދުމުގެ މަސައްކަތަތުގައި ޑައިވިންގ ރޮބޯޓް ބޭނުންކުރަން ފަށައިފިއެވެ.
ގދ. ފިޔޯރީ އުމުރުން 19 އަހަރުގެ ޝިމާ ގެއްލިފައިވަނީ މިދިޔަ ހުކުރު ދުވަހުގެ ރޭ އޭނާއާއި އިތުރު މީހަކު ލ. ކައްދޫއިން ފުރައިގެން އެއަތޮޅު މާމެންދޫއަށް ދަތުރު ކުރަމުންދިޔަ ޑިންގީ ގާދޫ ކަނޑުއޮޅިއަށް ބަންޑުން ޖަހާލުމާ ގުޅިގެންނެވެ. ޝިމާ ހޯދުމުގެ މަސައްކަތް ވަޔާއި ކަނޑުގެ މަގުން ސިފައިން އަންނަނީ ކުރަމުންނެވެ. އަދި މި މަސައްކަތުގައި މިވަގުތު ރާއްޖޭގައި ލިބެންހުރި ހުރިހާ ވަސީލަތެއްގެ ބޭނުން ކުރަމުންދާ ކަމަށްވެސް ސިފައިން ބުނެއެވެ.
އެގޮތުން މި މަސައްކަތުގައި އެމް.އެންޑީ.އެފްގެ ޑައިވަރުންނާއި، ސްނޯކްލިންގ ޓީމުތަކާއި އެފް.އައި.ސީއާއި، ހާބަރ ކްރާފްޓާއި، ގަލްފް ކްރާފްޓާއި، ސިކްސް ސެންސަސް ރިސޯޓާއި، ލ. ގަމު ރައިވެރީސް ގެސްޓް ހައުސްގެ ފަރާތުން އަންނަނީ ހަރަކާތްތެރިވަމުންނެވެ. އަދި ހެލިކޮޕްޓަރު ބޭނުންކޮށްގެންނާއި އެމް.އެން.ޑީ.އެފްގެ ފާސްޓަރ އިންޓަރސެޕްޓަރ ކްރާފްޓް ލޯންޗުގެ ނައިޓް ވިޝަން ކެމެރާގެ އެހީގައި ކަނޑުގެ ސަރަޙައްދު ބަލާފައިވާކަމަށްވެސް ސިފައިން ބުނެއެވެ. މީގެ އިތުރުން ޝިމާ ގެއްލުނު ކަމަށް ބެލެވޭ ސަރަޙައްދުގައި ކޯސްޓް ގާޑު ޝިޕް ޝަހީދު ޢަލީ ހަރަކާތްތެރިވަމުންދާ ކަމަށާއި، މި މަސައްކަތުގައި ޑައިވިންގ ރޮބޯޓް ބޭނުންކުރަމުންދާކަމަށްވެސް ސިފައިން ބުނެއެވެ.
ޝިމާ ހޯދުމަށް ސިފައިން ކުރަމުންދާ މަސައްކަތުގައި އޭނާއާއި އެނާ ދަތުރު ކުރި ޑިންގީގެ އެއްވެސް ޚަބަރެއް މިހާތަނަށް ވެފައިނުވާއިރު، ޑިންގީ ބަންޑުން ޖަހާލި ސަރަޙައްދުން ދަތުރުކުރާ އުޅަނދުތަކުންވެސް ޑިންގީއާއި ޝިމާގެ ޙަބަރެއްވޭތޯ ބަލައިދިނުމަށް ސިފައިން ވަނީ އިލްތިމާސްކޮށްފައެވެ.
މިދިޔަ ހުކުރު ދުވަހުގެ އިރުއޮއްސުނު ވަގުތު ހިނގި މި ޙާދިސާގައި ޑިންގީ ބަންޑުން ޖަހާލުމުން އޭގައި ހުރި ފިރިހެން މީހާ ފަތާފައި ގޮސް ސިކްސް ސެންސަސް ރިސޯޓަށް އަރައި އެހީތެރިކަމަށް އެދިފައިވާކަމަށް ފުލުހުން ބުނެއެވެ. އަދި ޑިންގީ ބަނޑުން ޖަހާލާފައިވަނީ ޕެޓްރޯލް ހުސްވެގެން ޕެޓްރޯލް އަޅަމުންދަނިކޮށް ޖެހި ރާޅަކާއެކުކަމަށްވެސް ފުލުހުން ބުނެއެވެ. ގެއްލިގެން ހޯދަމުން އަންނަ ޒުވާނާއަށް ފަތަން ނޭގޭކަމަށާއި ފަތާފައި އައި ފިރިހެން މީހާ ގޮސް ރިސޯޓަށް އެރީ އޭނާ އާއެކު ދަތުރުކުރި ޒުވާނާއަށް ކަނޑުމަތީގައި އޮވެވޭނެހެން ހަމަކާއި ފޯނެއް ދީފައި ކަމަށްވެސް ފުލުހުން ބުނެފައިވެއެވެ.