ހެނދުނުގެ ނާސްތާ ހިލޭ ދިނުމުގެ ޕްރޮގްރާމް ހުރިޙާ ސްކޫލެއްގައި ދެވަނަ ޓާމުގައި ފަށަން ތައްޔާރުވަނީ
މިއަހަރުގެ ދެވެނަ ޓާމުގައި ރާއްޖޭގެ ހުރިހާ ސްކޫލެއްގައި ހެނދުނުގެ ނާސްތާ ހިލޭ ދިނުމުގެ ޕްރޮގްރާމް ފެށުމަށް ތައްޔާރުވަމުންދާކަމަށް އެޑިއުކޭޝަން މިނިސްޓަރ ޑރ. ޢާއިޝަތު ޢަލީ ވިދާޅުވެއްޖެއެވެ.
ޤައުމީ މަންހަޖު މުރާޖާކުރުމަށް ބާއްވާ ސިމްޕޯޒިއަމް ފެށުމަށް ދަރުބާރުގޭގައި މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން އެޑިއުކޭޝަން މިނިސްޓަރ ޑރ. ޢާއިޝަތު ޢަލީ ވިދާޅުވީ، ރާއްޖޭގެ ތަޢުލީމީ ދާއިރާ އިތުރު ހަރުފަތަކަށް ގެންދިއުމަށް ކުރަމުންދާ މަސައްކަތްތަކަށް މިހާރުގެ ސަރުކާރުން މުހިއްމު ބޮޅެއް އިތުރުކުރުމަށް ތައްޔާރުވަމުންދާކަމަށެވެ. އެގޮތުން ޕައިލެޓް ޕްރޮޖެކްޓެއްގެ ގޮތުގައި ފަށާފައިވާ ދަރިވަރުންނަށް ހެނދުނުގެ ނާސްތާ ހިލޭ ދިނުމުގެ ޕްރޮގްރާމް މިއަހަރުގެ 2 ވަނަ ޓާމުގެ ތެރޭގައި ރާއްޖޭގެ ހުރިހާ ސްކޫލެއްގައި ތަންފީޒުކުރެވިގެންދާނެކަމަށް މިނިސްޓަރ ވިދާޅުވިއެވެ.
އެޑިއުކޭޝަން މިނިސްޓަރ ޑރ. ޢާއިޝަތު ޢަލީ ވިދާޅުވީ، މިހާރު ކުރަމުންދަނީ މި ޕްރޮގްރާމުގައި ހުރި މައްސަލަތަކަކީ ކޮބައިކަން ދެނެގަނެ، ޕްރޮގްރާމް އިތުރަށް ކުރިއަށްގެންދެވޭނެ ގޮތްތަކާ ގުޅޭ ދިރާސާތައް ކުރުމުގެ މަސައްކަތްކަމަށެވެ. އަދި މި ޕްރޮގްރާމް ރާއްޖޭގެ ހުރިހާ ސްކޫލެއްގައި ތަންފީޒުކުރަން ފެށުމުން، އެކަމުގެ ހެޔޮ ބަދަލު ކުރިއަށް އޮތް 6 އަހަރުގެ ތެރޭގައި ފެނިގެންދާނެކަމަށްވެސް އެޑިއުކޭޝަން މިނިސްޓަރ ވިދާޅުވިއެވެ.
ސްކޫލްތަކުގެ ދަރިވަރުންނަށް ހެނދުނުގެ ނާސްތާ ދިނުމުގެ ޕައިލެޓް ފްރޮގްރާމް އެޑިއުކޭޝަން މިނިސްޓްރީން ފަށާފައިވަނީ މިދިޔަ މަހުގެ 13 ވަނަ ދުވަހުއެވެ. ސަރުކާރުގެ 100 ދުވަހުގެ ވަޢުދުތަކުގެ ތެރޭގައި ހިމެނޭ ސްކޫލް ކުދިންނަށް ހެނދުނުގެ ނާސްތާ ދިނުމުގެ ޕައިލެޓް ޕްރޮޖެކްޓް ރާއްޖޭގައި 25 ސްކޫލެއްގައި ދަނީ ހިންގަމުންނެވެ. ސްކޫލް ދަރިވަރުންނަށް ހެނދުނުގެ ނާސްތާ ދިނުމުގެ ޕައިލެޓް ޕްރޮޖެކްޓްގެ ދަށުން ޔުނިސެފްގެ އެހީއާއެކު އެޑިއުކޭޝަން މިނިސްޓްރީން ވަނީ ނާސްތާއަށް 10 މެނޫއެއްވެސް ތައްޔާރުކޮށްފައެވެ.