ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމުގެ އަރިހަށް، އޭޝިޔަން ޑިވެލޮޕްމަންޓް ބޭންކް (އޭ.ޑީ.ބީ)ގެ އެގްޒެކެޓިވް ޑިރެކްޓަރ މުޙަންމަދު ސާމީ ސަޢީދު، އިޙްތިރާމުގެ ޒިޔާރަތެއް ކުރައްވައިފިއެވެ.މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި އޮތް މިބައްދަލުކުރެއްވުމުގައި، އޭ.ޑީ.ބީ ގެ އެހީގައި ރާއްޖޭގައި ހިނގަމުންދާ ތަރައްޤީގެ މަޝްރޫޢުތަކާ ބެހޭގޮތުންނާއި، އިޤްތިޞާދީ އަދި އެހެނިހެން ދާއިރާތަކުން އޭ.ޑީ.ބީ ގެ އެހީތެރިކަން ރާއްޖެއަށް ފޯރުކޮށްދެއްވުމާ ބެހޭގޮތުން ދެބޭފުޅުން މަޝްވަރާކުރެއްވިއެވެ.ރައީސުލްޖުމްހޫރިއްޔާގެ ވާހަކަފުޅުގައި، ތަރައްޤީގެ ރޮނގުން ރާއްޖެއިން ކުރަމުންދާ ހުރިހާ މަސައްކަތެއްގައިވެސް އޭ.ޑީ.ބީ.ގެ ފަރާތުން ލިބެމުންދާ އެހީތެރިކަމާއި އެއްބާރުލުން ފާހަގަކުރައްވައި، އެކަމަށްޓަކައި ޝުކުރު އަދާކުރެއްވިއެވެ.އޭ.ޑީ.ބީގެ އެގްޒެކެޓިވް ޑިރެކްޓަރ ދެއްކެވި ވަހާކަފުޅުގައި، ޤައުމުގެ އިޤްތިޞާދު ފުޅާކުރެއްވުމަށްޓަކައި ރައީސް ޔާމީނުގެ ސަރުކާރުން އަޅުއްވަމުން ގެންދަވާ ހަރުދަނާ ފިޔަވަޅުތަކުގެ މައްޗަށް އަލިއަޅުއްވައިލައްވައި، އެކަމަށްޓަކައި އެމަނިކުފާނަށް ތަޢުރީފުކުރެއްވިއެވެ. އަދި، ޤައުމުގެ ތަރައްޤީއާއި ކުރިއެރުމަށްޓަކައި ސަރުކާރުން ކުރައްވާ މަސައްކަތުގައި އޭ.ޑީ.ބީގެ އެއްބާރުލުމާއި އެހީތެރިކަން އަބަދުވެސް ލިބެމުންދާނެކަމުގެ ޔަޤީންކަން ރައީސުލްޖުމްހޫރިއްޔާއަށް ދެއްވިއެވެ.މިބައްދަލުކުރެއްވުމުގައި، މިނިސްޓަރ އޮފް ފިނޭންސް އެންޑް ޓްރެޜަރީ ޢަބްދުﷲ ޖިހާދު ބައިވެރިވެވަޑައިގެންނެވިއެވެ.