ބާސެލޯނާ އަށް ފަހަކަށް އައިސް ބައެއް މެޗުތަކުގައި ނަތީޖާ ނުނެރެވިފައިވަނީ ކުޅުންތެރިން ދަނޑުމަތީގައި ވާހަކަ ނުދައްކާތީ ކަމަށް ފޯވަޑް ލުއިސް ސުއަރޭޒް ބުނެފި އެވެ.
އޭނާ މިހެން ބުނީ އެތްލެޓިކް ކުލަބު އަތުން ވެސް އެއްވަރުވެ ޓޭބަލުގައި ހަ ޕޮއިންޓަށް ލީޑް ހަނިވި މެޗަށް ނިސްބަތްކޮށެވެ.
"އަހަރުމެން ދަނޑުމަތީގައި ވާހަކަ ނުދައްކާ ތިބީ. އެއީ އެންމެ ބޮޑު މައްސަލައަކީ. އޭގެ ސަބަބުން އުނދަގޫވި ނަތީޖާނެރެން. ބޯޅަ ހޯދަން އެކަކު އަނެކަކު ވާހަކަ ދައްކަންޖެހޭ. ގިނަ މެޗުތަކުގައި އަހަރުމެން ފަހަތުން އަރައި ނަތީޖާ އަނބުރަން. އެކަމަކު ކޮންމެ މެޗެއްގައި އެއީ ވާނެ ކަމެއްނޫން،" ސުއަރޭޒް ބުންޏެވެ.
އޭނާ ބުނީ ގާތްގާތުގައި ގިނަ މެޗުތަކެއް ކުޅެން ޖެހުމަކީ ޓީމަށް ލޮޑުކަން އިހުސާސްވާ ކަމެއް ކަމަށެވެ. ކުދި ޓީމުތަކާއެކު ކުޅޭއިރު ބާސެލޯނާ އަށް ބައެއް ފަހަރު ނަތީޖާ ނެރެން ދަތިވަނީ ބިޒީ ޝެޑިއުލާއި ވަރުބަލިކަމުގެ ސަބަބުން ކަމަށެވެ.