ޓޮޓެންހަމަކީ ޗެމްޕިއަންސް ލީގުގެ ކުއާޓާ ފައިނަލަށް ދެވޭ ފެންވަރުހުރި ކުލަބެއް ކަމަށް އެ ޓީމުގެ ޑިފެންޑަރު ޔޭން ވާޓޮންގެން ބުނެފިއެވެ.
އޭނާ މިހެން ބުނީ މުބާރާތުގެ ދެ ވަނަ ބުރުގެ ފުރަތަމަ މެޗުގައި މިރޭ ޖަރުމަނުގެ ބޮރޫޝިޔާ ޑޯޓްމުންޑާ ދެކޮޅަށް މެޗުގެ ކުރިން ވާހަކަ ދައްކަމުންނެވެ. ވާޓޮންގެން ބުނީ ޑޯޓްމުންޑަކީ ވަރުގަދަ ޓީމެއް ކަމަށާއި ހާއްސަކޮށް އެޓީމުގައި ތިބި ކުޅުންތެރިންނަކީ ވަރަށް ޖޯޝާއެކު ކުޅޭ ބައެއް ކަމަށެވެ.
ވާޓޮންގެން ބުނީ މިދިޔަ އަހަރު ވެސް ކުއާޓާ ފައިނަލް ކުޅެވޭނެކަން އޭނާގެ ޓީމު ދައްކުވައިދީފި ކަމަށާއި، ކުއާޓާގައި އޭނާގެ ޓީމު ރެއާލް މެޑްރިޑާ ދެކޮޅަށްރަނގަޅު ވާދައެއްކުރިކަމަށެވެ. އެހެންކަމުން މިފަހަރު އެކަން ނުވާންވީ ސަބަބެއްނެތް ކަމަށްވެސް އޭނާ ބުންޏެވެ.
ކޯޗު މައުރީސިއޯ ޕޮޗެޓީނޯ ބުނީ މި މެޗުގައި ޑޯޓްމުންޑްގެ އިނގިރޭސި ވިންގަ ޖޯޑަން ސަންޗޯ މޮޅަށް ކުޅޭނެ ކަމަށް އެންމެންވެސް އުއްމީދު ކުރާ ކަމަށެވެ. ޕޮޗެޓީނޯ ބުނީ ސަންޗޯ އަކީވަރަށް ހުނަރުވެރި ކުޅުންތެރިއެއްކަމަށާއި، މަޑުމަޑުން ކުރިއަރަމުން އަންނަ ކުރިމަގު އޮތް ކުޅުންތެރިއެއްކަމަށެވެ. އަދި އޭނާ ހަމަ ބިމުގައި ބަހައްޓަން މަސައްކަތްކުރަންޖެހޭނެ ކަމަށްވެސް ޕޮޗެޓީނޯ ބުންޏެވެ.
ޗެންޕިއަންސް ލީގުގައި މި ދެޓީމު ބައްދަލުކުރާ މެޗު ފަށާނީ މިރޭ ރާއްޖެގަޑިން ދަންވަރު އެކެއް ޖަހާއިރު އެވެ.