ދިވެހިރާއްޖެއިން އިންޑިއާ އަށް ކަނޑައެޅުއްވި އައު ސަފީރު ޢާއިޝަތު މުޙައްމަދު ދީދީ، އެ ކަމަނާގެ ސަފީރުކަމުގެ ފަތްކޮޅު އިންޑިއާ ގެ ރައީސް ރާމް ނާތު ކޯވިންދް އަށް މިއަދު އަރުވައިފިއެވެ.
ޢާއިޝަތު މުޙައްމަދު ދީދީ، އެ ކަމަނާގެ ސަފީރުކަމުގެ ފަތްކޮޅު އިންޑިއާ ގެ ރައީސްއަށް އެރުވީ މިއަދު އިންޑިއާ ގެ ރައީސްގެ ގަނޑުވަރު ކަމުގައިވާ "ރަޝްތްރަޕަތީ ބަވަން" ގައި ބޭއްވި ޚާއްޞަ ރަސްމިއްޔާތެއްގައެވެ. މި ރަސްމިއްޔާތަށްފަހު އިންޑިއާ ގެ ރައީސް ކޯވިންދް، އެ ކަމަނާއާ ބައްދަލުކުރައްވައި ވަނީ މަރުހަބާ ދަންނަވާފައެވެ. އަދި ރާއްޖޭގެ ރައީސުލްޖުމްހޫރިއްޔާގެ އިތުރުން ސަރުކާރަށާއި ދިވެހިންނަށް ވެސް އުފާފާގަތިކަން ލިބުމަށް އެދޭކަމަށް އިންޑިއާގެ ރައީސް ވަނީ ވިދާޅުވެފައެވެ.
މި ބައްދަލުކުރެއްވުމުގައި ސަފީރު ދެއްކެވި ވާހަކަފުޅުގައި ދިވެހިރާއްޖޭގެ ތަރައްޤީއަށް އިންޑިއާ އިން ދެމުންގެންދާ އެހީތަކަށް ޝުކުރުއަދާ ކުރައްވައި، އެ ކަމަނާގެ ސަފީރުކަމުގައި ކުރިއަށް އޮތް ދުވަސްތަކުގައި ދެ ޤައުމުގެ ގުޅުން އިތުރަށް ބަދަހިކުރެއްވުމަށް މަސައްކަތްޕުޅު ކުރައްވާނޭކަމުގެ ޔަޤީންކަން އެރުވިއެވެ.
ރާއްޖެއިން އިންޑިއާއަށް ކަނޑައެޅުއްވި ސަފީރު ޢާއިޝަތު މުޙައްމަދު ދީދީ އަކީ 1 ނޮވެމްބަރު 1965 ގައި އިންޑިއާ އާއި ދިވެހިރާއްޖެއާ ދެމެދު ސިޔާސީގުޅުން ޤާއިމްކުރުމަށްފަހު، އިންޑިއާގައި ރާއްޖެ ތަމްސީލް ކުރެއްވުމަށް ކަނޑައެޅުއްވި 5 ވަނަ ސަފީރެވެ. އަދި އެންމެ ފުރަތަމަ އަންހެން ސަފީރުވެސްމެއެވެ.