މާލެއަށް މިނީބަހުގެ ޚިދުމަތް ދިނުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ އާއި ހަވާލުކޮށްފިއެވެ.
ސަރުކާރުގެ 100 ދުވަހުގެ ވައުދުތަކުގެ ތެރޭގައި ހިމެނޭ މާލެއަށް މިނީބަހުގެ ޚިދުމަތް ދިނުމަށް އެމްޓީސީސީ އާއި ހަވާލުކޮށް އެކަމުގެ އެއްބަސްވުމުގައި ސޮއިކޮށްފައިވަނީ، ޓްރާންސްޕޯޓް މިނިސްޓްރީގައި އެކަމަށްޓަކައި ބޭއްވި ރަސްމިއްޔާތުގައެވެ. މި އެއްބަސްވުމުގައި ޓްރާންސްޕޯޓް މިނިސްޓްރީގެ ފަރާތުން ސޮއިކުރެއްވީ މިނިސްޓަރު އާއިޝަތު ނަހުލާއެވެ. އަދި އެމްޓީސީސީގެ ފަރާތުން އެއްބަސްވުމުގައި ސޮއިކުރެއްވީ އެކުންފުނީގެ ސީއީއޯ ހަސަން ޝާހްއެވެ.
މި އެއްބަސްވުމުގައި ސޮއިކުރެއްވުމަށްފަހު މިނިސްޓަރު ނަހުލާ ވިދާޅުވެފައިވަނީ ޕަބްލިކް ޓްރާންސްޕޯޓުގެ ޚިދުމަތް އިތުރަށް ހަރުދަނާކޮށް، ދަތުރުފަތުރު ކުރުމުގައި އާއްމުންނަށް ދިމާވާ ދަތިތަކަށް ހައްލު ހޯދައިދިނުމަކީ ސަރުކާރުގެ އަމާޒެއްކަމަށެވެ. އަދި މާލެއަށް އަލަށް ތަޢާރަފުކުރާ މިނީބަހުގެ ޚިދުމަތާއެކު އާއްމުންނަށް ލުއިފަސޭހަތަކެއް ވެގެންދާނެކަން މިނިސްޓަރު ވިދާޅުވިއެވެ.
"އަޅުގަނޑު ގަބޫލު ކުރަނީ މާލެއަށް މިނީބަހުގެ ހިދުމަތް ދޭން ފެށުމުގެ ސަބަބުން އާންމުނަށް ލުއި ފަސޭހަ ތަކެއް ވެގެންދާނެ. ސަރުކާރުގެ އަމާޒަކަށް ވާނީ ޕަބްލިކް ޓްރާންސްޕޯޓް އިތުރަށް ހަރުދަނާކޮށް ދަތުރުފަތުރުގެ ނިޒާމްގައި މިހާރު އާންމުނަށް ދިމާވާ ދަތިތަކަށް ހައްލު ހޯދައި ދިނުން،" މިނިސްޓަރު ނަހުލާ ވިދާޅުވިއެވެ.
މި އެއްބަސްވުމުގެ ދަށުން 120 ދުވަހުގެ ތެރޭގައި މާލެއަށް މިނީބަސް ތައާރަފްކޮށް، އެ ޚިދުމަތް އާންމުނަށް ދޭން ފަށަންވާނެކަމަށް ޓްރާންސްޕޯޓް މިނިސްޓްރީން ބުނެއެވެ. އެމްޓީސީސީއާއެކު ވެވުނު އެއްބަސްވުމުގެ ދަށުން ބަސް ގެނެއުމަށް ސީދާ ވަކި އަދަދެއް ކަނޑައެޅިފައި ނެތްނަމަވެސް، ޚިދުމަތް ފެށުމުގެ ގޮތުން 20 ބަސް ގެނެއުމަށް އެކުންފުންޏަށް އަންގާފައިވާކަމަށްވެސް ޓްރާންސްޕޯޓު މިނިސްޓްރީން ބުނެއެވެ. އަދި މި ޚިދުމަތް ދިނުމަށްޓަކާ ގެންނަ ބަސްތަކަކީ ގިނަވެގެން 24 މީހުންގެ ޖާގައިގެ ތިމާވެއްޓާއި ރައްޓެހި ބަސްތަކެއްކަމަށް ވާންޖެހޭކަމަށްވެސް އެ މިނިސްޓްރީން ބުނެއެވެ.