ރާއްޖޭގެ ފިލްމީ ދާއިރާއާ އަބަދުވެސް ގާތްގުޅުމެއް ބާއްވަވާނެކަމަށާއި، ފަންނާނުންގެ ކަންބޮޑުވުންތަކަށް ޙައްލު ހޯދައިދިނުމުގެ ގޮތުން ޚާއްޞަ ކޮމިޓީއެއް އެކުލަވާލައްވާނެކަމަށް މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ޔުމްނާ މައުމޫން ވިދާޅުވެއްޖެއެވެ. މިނިސްޓަރ ޔުމްނާ މިހެން ވިދާޅުވީ ރާއްޖޭގެ ފިލްމީ ދާއިރާގައި މަސައްކަތް ކުރާ ފަރާތްތަކަށް އަމާޒުކޮށްގެން ބޭއްވި ފަންނާނުންގެ ފޯރަމްގައި ވާހަކަފުޅުދައްކަވަމުންނެވެ.
ރާއްޖޭގެ ފިލްމީ ދާއިރާގައި މަސައްކަތްކުރާ ފަރާތްތަކަށް އަމާޒުކޮށްގެން މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖާއި، ނެޝެނަލް ސެންޓަރ ފޯ ދި އާޓްސް ގުޅިގެން އޮލިމްޕަހުގައި ކުރިއަށްގެންދިޔަ "ފަންނާނުންގެ ފޯރަމް 2019" ގައި ރާއްޖޭގެ ފިލްމް އިންޑަސްޓްރީގައި މަސައްކަތް ކުރަމުންދާ ގިނަ ފަރާތްތަކަކުން ވަނީ އެފަރާތްތަކުގެ ކަންބޮޑުވުންތައް ޙިއްޞާކޮށްފައެވެ.
މީގެ ތެރެއިން އެންމެ ގިނަ ފަރާތްތަކުން ކަންބޮޑުވުން ފާޅުކޮށްފައިވަނީ އޮލިމްޕަހުގެ މިހާރުގެ ހާލަތާއި، އަތޮޅުތަކުގައި ދިވެހި ފިލްމީ އުފެއްދުންތައް އެޅުވުމުގައި ހުރި ގޮންޖެހުންތަކާއި ގުޅޭގޮތުންނެވެ. އަދި މީގެ ކުރިން ފިލްމް އިންޑަސްޓްރީގައި މަސައްކަތް ކުރާ ފަރާތްތަކާމެދު ސަރުކާރުން ވަރަށް ބޮޑަށް އިޙުމާލުވެފައިވާކަމަށާއި، އެކި ފަންނުތަކުގެ މެދުގައި ތަފާތުކުރުން ގެންގުޅޭކަމަށްބުނެ މި ފޯރަމްގައި ބައިވެރިވި ބައެއް ފަރާތްތަކުން ވަނީ ކަންބޮޑުވުން ފާޅުކޮށްފައެވެ.
މީގެ އިތުރުން ފިލްމް އުފެއްދުމުގައި މާލީ އެހީތެރިކަން ބޭނުންވާ ފަރާތްތަކަށް ސަރުކާރުގެ ތެރެއިން ފަސޭހަ އިންތިޒާމެއް ހަމަޖައްސައިދިނުމާއި، އެންސީއޭއާއި ފިލްމް އެސޯސިއޭޝަންގެ މަސައްކަތްތައް މިހާރަށްވުރެ ހަރުދަނާކޮށްދިނުމާއި، އެ ދާއިރާގައި ހުރި ފުރުޞަތުތައް އިތުރަށް ފުޅާކޮށްދިނުމަށް މި ފޯރަމްގައި ބައިވެރިވި ފަރާތްތަކުން ވަނީ މިނިސްޓަރގެ ކިބައިން އެދިވަޑައިގެންފައެވެ.
ފިލްމީ ދާއިރާގައި މަސައްކަތްކުރާ ފަރާތްތަކުގެ ކަންބޮޑުވުންތައް އަޑުއެއްސެވުމަށްފަހު މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ޔުމްނާ މައުމޫން ވިދާޅުވީ، ފާޅުކުރާ ޚިޔާލެއްގެ ސަބަބުން، އެއްވެސް ފަރާތަކާމެދު ތަފާތު ކުރުމެއް މި ސަރުކާރުން ނުގެންގުޅުއްވާނެކަމަށެވެ. އަދި ކަންކަމުގައި ޚިޔާލާއި މަޝްވަރާ ހޯދުމުގެ އެންމެ ބޮޑު ބޭނުމަކީވެސް މައްސަލަތައް ދެނެގަނެ އެކަންކަމަށް ޙައްލު ހޯދައިދިނުންކަމަށް މިނިސްޓަރ ވިދާޅުވިއެވެ. މިނިސްޓަރ ޔުމްނާ ވިދާޅުވީ ދިވެހި ފިލްމް އިންޑަސްޓްރީއާ ގާތް ގުޅުމެއް ބާއްވަވާނެކަމަށާއި، ފިލްމީ ދާއިރާގެ ހުރި ކަންބޮޑުވުންތަކަށް އަވަސް ޙައްލެއް ގެނައުމަށް ޚާއްޞަ ކޮމިޓީއެއް އެކުލަވާލައްވާނެކަމަށެވެ.
ފިލްމް އިންޑަސްޓްރީގައި ހުރި މައްސަލަތަކަށް ހޯދިދާނެ ހައްލުތަކާ ގުޅޭގޮތުންވެސް މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖުގެ ފަަރާތުން ވަނީ "ފަންނާނުންގެ ފޯރަމް" ގައި ބައިވެރިވި ފަރާތްތަކުގެ ޚިޔާލު ހޯދާފައެވެ. އެގޮތުން އަތޮޅުތަކުގައި ޤާއިމުކޮށްފައިހުރި އިޖްތިމާއީ މަރުކަޒުތަކުގައި ސިނަމާ ހޯލެއް ހެދުމާއި، އެ ދާއިރާގައި މަސައްކަތް ކުރާ ފަރާތްތަކަށް ލުއިލޯން ސްކީމެއް ތަޢާރަފުކޮށްދިނުން ފަދަ ކަންކަން އެ ފަރާތްތަކުން ވަނީ ސަރުކާރަށް ހުށަހަޅާފައެވެ.