ކުރިއަށް އޮތް ރައްޔިތުންގެ މަޖިލީހުގެ އިންތިޚާބަށް ޖުމްހޫރީ ޕާޓީން ކުރީގެ ރައީސް ޔާމީނާގުޅިގެން މަސައްކަތް ނުކުރާނެކަމަށް ކޯލިޝަންގެ ޖޮއިންޓް ޕާލިމަންޓްރީ ގްރޫޕްގެ ލީޑަރު ޢަބްދުﷲ ރިޔާޒް ވިދާޅުވެއްޖެއެވެ. އޭނާ މިހެން ވިދާޅުވެފައިމިވަނީ ޖުމްހޫރީ ޕާޓީން ރައީސް ޔާމީނާއެކު ކޯލިޝަން ހަދާނެކަމުގެ އިޝާރާތެއް އެޕާޓިގެ ލީޑަރު ޤަސިމް އިބްރާހީމް ކުރައްވާފައިވާ ދަނޑިވަޅެއްގައެވެ.
ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި އެމްޑީޕީ ނޫން އެހެން ޕާޓީތަކާއެކު ކޯލިޝަން ހަދަން ތައްޔާރަށް އޮތްކަމަށް، އެމްޑީޕީއާއެކު ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީގެ ލީޑަރ ޤާސިމް އިބްރާހިމް ދާދިފަހުން ވަނީ ވިދާޅުވެފައއެވެ. ޖޭޕީއާ ގުޅިގެން މަޖިލީހުގެ ދާއިރާތަކަށް ކުރިމަތިލުމަށް ހުރިހާ ފަރާތްތަކާ ވާހަކަދައްކަން ތައްޔާރަށް އޮތްކަމަށްވެސް އޭނާ ވިދާޅުވެފައިވެއެވެ. މިކަމާއި ގުޅިގެން ސަރުކާރު ކޯލިޝަންގައި ހިމެނޭ މެންބަރުންގެ މެދުގައި ވަނީ ޚިޔާލުތަފާތުވުން އުފެދިފައެވެ.
މި ޚިޔާލުތަފާތުވުން އުފެދިފައިވަނީ ކޯލިޝަނުން އެއްބަސްވިގޮތާއި ޚިލާފަށް އެމްޑީޕީން ހުރިހާ ދާއިރާއަކަށް ވާދަކުރުމަށް ނިންމުމާއި ގުޅިގެންނެވެ. މި މައްސަލައަށް ޕީއެސްއެމް ނުއސްގެގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން ޖޮއިންޓް ޕާލިމަންޓްރީ ގްރޫޕްގެ ލީޑަރު އަދި ޖުމްހޫރީ ޕާޓީގެ ޑެޕިއުޓީ ލީޑަރު ޢަބްދުﷲ ރިޔާޒް ވިދާޅުވީ، ކުރީގެ ރައީސް ޢަބްދުﷲ ޔާމީނާއެކު މަސައްކަތްކުރައްވަންޖޭ ހާލަތެއް ނާންނާނެކަމަށެެވެ. ކުރިއަށްއޮތް ފަސްއަހަރުދުވަހުވެސް ކުރިއަށްދާނީ ރައީސް އިބްރާހީމް މުޙައްމަދު ޞާލިޙާއެކުކަމަށް ރިޔާޒް ވިދާޅުވިއެވެ.
"އަޅުގަނޑަކަށް ނުފެނޭ އެމަންޒަރެއް. ރައީސް ޔާމީނާއެކު މަސައްކަތްކުރަންޖެހޭ އެއްވެސް ޙާލަތެއް ނާންނާނެ. ރައީސް ޞަލިޙާއެކު ފަސްއަހަރު ކޮންޓިނިއުކުރާނެ އިނގޭތޯ." ޢަބްދުﷲ ރިޔާޒް ވިދާޅުވިއެވެ.
ކިނބިދޫ ދާއިރާގެ މެންބަރުކަންވެސް ކުރައްވާ ޢަބްދުﷲ ރިޔާޒް ވިދާޅުވީ، އިންތިޚާބަކަށްދާއިރު ހުރިހާ ޕާޓީތަކުންވެސް މަސައްކަތްކުރާނީ އެންމެ ގިނަ ގޮނޑި ކާމިޔާބުކުރަންކަމަށާ، އެކަމަށް ހުރިހާ ޕާޓީތަކާއި ލީޑަރުންގެ ތާޢީދު ބޭނުންވާނެކަމަށެވެ. އެތާޢީދު ބޭނުންވުމަކީ އަދި އެބަޔަކާއެކު މަސައްކަތްކުރުން ނޫންކަމަށާއި، ރައިސް ޔާމީން އިދިކޮޅު ލީޑަރަށް ވެގެންދާއިރު، ސަރުކާރުގައި ތިބިބަޔަކުވެސް އެއްވެސްބަޔަކާ ޒާތީވެގެންނުވާނެކަމަށެވެ. އެބަޔަކާއެކުވެސް މަޖިލީހުގެ ތެރެއިން ކުރަންޖެހޭ މަސައްކަތް ނުކުރެވެންވީ ސަބަބެއް ނެތްކަމަށް ރިޔާޒް ވިދާޅުވިއެވެ.
"ޖުމްހޫރީ ޕާޓީގެ ލީޑަރަކީ ހަމައެކަނި އެޕާޓީގެ ލީޑަރެއް ނޫން. މަޖިލީހުގެ ރައިސްވެސްމެ. މަޖިލިސް ރަނގަޅަށް ފަންކުޝަންކުރުމަށްޓަކައި މިވަގތު ޕީޕީއެމް މެންބަރުންގެ އެހީތެރިކަންވެސް ބޭނުންވޭ. އެމީހުންގެ ނަންބަރތައްވެސް ބޭނުންވޭ. ބައެއްބިލްތައް ފާސްކުރުމަށް ޢަދަދު ހަމަކުރުމަށް އެމެންބަރުންވެސް ހިމަނަންޖެހޭ. އެއެހީތެރިކަން ހޯދުމަށް މަޖިލީހުގެ ރައިސްގެ ހައިސިއްޔަތުން އެ މަޝްވަރާކުރާނެ." ޢަބްދުﷲ ރިޔާޒް ވިދާޅުވިއެވެ.
ކޯލިޝަންގައި އުފެދިފައިވާ ޚިޔާލުތަފާތުވުމާއި ގުޅިގެން ރައީސުލްޖުމްހޫރިއްޔާ އިބްރާހީމް މުޙައްމަދު ޞަލިޙް ވިދާޅުވީ، ކުރިއަށް އޮތް މަޖިލީހުގައި އެމަނިކުފާނު ބޭނުންފުޅުވަނީ ސަރުކާރު ކޯލިޝަންގައި ހިމެނޭ ހަތަރު ޕާޓީއަށް މެޖޯރިޓީއޮތް މަޖިލީހެއް ކަމަށެވެ.
ރައީސް ވިދާޅުވީ، ކޯލިޝަން ދެމިއޮންނާނެކަމުގެ ފުރިހަމަ ޔަޤީންކަން އެބައޮތް ކަމަށެވެ. އަދި ކޯލިޝަން ދެމެހެއްޓުމަށް ހަތަރު ލީޑަރުންވެސް މަސައްކަތްކުރައްވާނެ ކަމަށާއި، ޖޭޕީއިން ޕީޕީއެމާ ކޯލިޝަން ނުހަދާނެކަމަށެވެ.