އިނގިރޭސިވިލާތް ވިލާތުގެ އިއްތިހާދުން ވަކިކުރުމާ ބެހޭގޮތުން ދެ ފަރާތުން ޤާއިމުކުރި އެއްބަސްވުމަށް އިނގިރޭސި ޤާނޫނު ހަދާ މަޖިލީހުގައި އަންގާރަ ދުވަހު ލިބުނު ނާކާމިޔާބީއަށްފަހު ވިލާތުގެ އިއްތިހާދުގެ މެމްބަރެއްގެ ގޮތުގައި ދެމި އޮތުމާމެދު އިނގިރޭސިވިލާތުން ވިސްނަންޖެހޭ ކަމަށް ވިލާތުގެ އިއްތިހާދުގެ މަޖިލީހުގެ ރައީސް ޑޮނަލްޑް ޓުސްކް ވިދާޅުވެއްޖެއެވެ.
މިއަހަރުގެ މާރިޗު މަހުގެ 29 ވަނަ ދުވަހު އިނގިރޭސިވިލާތް ވިލާތުގެ އިއްތިހާދުން ވަކިކުރުމަށްފަހު، ދެން އެ ޤައުމާއި ވިލާތުގެ އިއްތިހާދުގެ މެމްބަރުންނާ މެދު އެކި ދާއިރާތަކުން މުއާމަލާތުތައް ކުރާނޭ ގޮތާމެދު ކަނޑައަޅާފައިވާ މި އެއްބަސްވުމާ ދެކޮޅަށް ޤާނޫނު ހަދާ މަޖިލީހުގެ ހަތަރު ސަތޭކަ ބައްތިރީސް މެމްބަރުން ވޯޓު ދެއްވިއިރު، މި އެއްބަސްވުމާ އެއްކޮޅަށް ވޯޓު ދީފައިވަނީ ދުއިސައްތަ ދެ މެމްބަރުންނެވެ.
މި ވޯޓަށް ފަހު ކުރެއްވި ޓްވީޓެއްގައި ޓުސްކް ވިދާޅުވީ، މިކަމުގައި އެއްބަސްވުމެއް އެކުލަވާލުމަކީ ކުރެވޭނެ ކަމަކަށް ނުވާ ހިނދު، އެއްބަސްވުމަކާ ނުލައި އިނގިރޭސިވިލާތަށް ވިލާތުގެ އިއްތިހާދުން ވަކިނުވެވޭނެކަމަށެވެ. އަދި މި ކަމަށް ދެން އޮތް ހަމައެކަނި ހައްލަކީ، ވިލާތުގެ އިއްތިހާދުގެ މެމްބަރެއްގެ ގޮތުގައި ދެމިހުރުންކަމަށް ވެސް ޓުސްކް ވިދާޅުވިއެވެ.
އަނެއްކޮޅުން، ވިލާތުގެ އިއްތިހާދުގެ ރައީސް ޖޯން ކްލޯދް ޔުންކަރ ވިދާޅުވެފައިވަނީ ވިލާތާއެކު އެއްބަސްވުމެއް ހެދުމަށް އިނގިރޭސިވިލާތަށް ލިބިފައިވާ ވަގުތު ކުޑަތަންވަމުންދާކަމަށެވެ. އަދި މިކަމުގައި އިނގިރޭސިވިލާތުން ބޭނުންވާ ގޮތް ވީ އެންމެ އަވަހަކަށް ސާފުކޮށްދެއްވުމަށް ވެސް ޔުންކަރ ގޮވާލެއްވިއެވެ.