ހުޅުމާލޭގައި ރޭ ޒުވާން އަންހެނަކު މަރުވެފައިވާ މައްސަލައެއް ފުލުހުން ބަލަން ފަށައިފިއެވެ.
މަޢުލޫމާތު ލިބިފައިވާގޮތުގައި މަރުވެފައިވަނީ، ހުޅުމާލޭ މުރަކަ 7، އާއިޝަތު ވިޝާމާއެވެ. ފުލުހުންގެ މީޑިއާ އޮފިޝަލް ވިދާޅުވީ، ހުޅުމާލޭގައި އަންހެނަކު މަރުވެގެން ޓްރީޓޮޕް ހޮސްޕިޓަލަށް ގެންދިޔަކަމުގެ މަޢުލޫމާތު ފުލުހުންނަށް ރިޕޯޓްކޯށްފައިވަނީ މިއަދު ހެނދުނު ނުވަގަޑި ތިރީސް ހާއިރުކަމަށެވެ.
މިއީ ފުލުހުން ތަޙްޤީޤްކުރަމުންދާ މައްސަލައަކަށްވާތީ އިތުރު މަޢުލޫމާތު ފުލުހުން ހާމަކޮށްފައެއްނުވެއެވެ. އަންހެން މީހާ ހޮސްޕިޓަލަށް ގެންދިޔައިރުވެސް މަރުވެފައިވާކަމަށާއި، ބޭރުފުށުން އެއްވެސް އަނިޔާއެއްގެ ނިޝާނެއް ފެންނަންނަން ނެތްކަމަށް ފުލުހުން ވިދާޅުވެއެވެ.
މީގެ އިތުރުން މިއަދު މާލޭގެ ގެއެއްގެ ތެރޭގައިވެސް މީހަކު މަރުވެފައި އޮއްވާ ވަނީ ފެނިފައެވެ. އުމުރުން 27 އަހަރުގެ ފިރިހެނަކު މަރުވެފައި އޮއްވާ ފެނުނީ މ.ރަމާގުލްޝަން ގެއިން ކަމަށާއި، ފުލުހުންނަށް އެކަން ރިޕޯޓްކޮށްފައިވަނީ ހަވީރު ހަތަރުގަޑި ތިރީހުގައިކަމަށް ފުލުހުން މަޢުލޫމާތުދެއެވެ. ނަމަވެސް އޭނާ މަރުވެފައިވަނީ ކީއްވެކަމެއް އަދި ސާފެއްނުވެއެވެ.