ހުޅުމާލޭގައި ސީލައިފް ގްލޯބަލް ޕްރައިވެޓް ލިމިޓެޑުން އަޅަން ނިންމި އެޕާޓްމަންޓްތައް ގަތުމަށް އެކުންފުންޏަށް ފައިސާދެކި ގިނަ ޢަދަދެއްގެ މީހުން އަތުންނެގި ފައިސާ އަނބުރާ ހޯދުމަށް ސިވިލް ކޯޓަށް ހުށައެޅި މައްސަލަ އެކޯޓުން ބަލައިގެންފިއެވެ.
ހުޅުމާލޭ ފުރަތަމަ ފިޔަވަހީގައި ސީލައިފުން 300 އެޕާޓްމަންޓް ހަދަން ހުޅުވައިލުމުން 280 އަށް ވުރެ ގިނަ މީހުން ރަޖިސްޓްރޭޝަން ފީގެ ގޮތުގައި ފަންސާސް ހާސް ރުފިޔާ ވަނީ ދައްކައިފައެވެ. އަދި ބައެއް ފަރާތްތަކުން ޑައުންޕޭމަންޓްގެ ގޮތުގައި 20 ޕަސެންޓަށް ވާ ފައިސާ ވެސް އެ ކުންފުންޏަށް ދައްކާފައިވެއެވެ. އެތައް ބައެއްގެ އަތުން ފައިސާ ނެގުމަށް ފަހު ގިނަ ދުވަސްތަކެއް ވީއިރުވެސް އެޕާޓްމަންޓްތަކުގެ މަސައްކަތް ކުރިއަށް ނުގެންގޮސް އެފައިސާތަކަށް ވީގޮތެއް އެކުންފުނިން އަންގާފައިނުވާއިރު، 203 މީހެއްގެ އަތުން 22 މިލިއަށް ވުރެ ގިނަ ރުފިޔާ އެކުންފުނިން ނަގާފައިވާކަމަށް ވަނީ ތުހުމަތުކޮށްފައެވެ.
މި ފައިސާ ހޯދުމަށް ސިވިލް ކޯޓަށް މައްސަލަ ހުށައެޅުއްވި ޤާނޫނީ ވަކީލް މަރިޔަމް ޝުނާނާ ވިދާޅުވީ އެ މައްސަލަ ކޯޓަށް ހުށައަޅަފައިވަނީ، ސީލައިފްއަށް ފައިސާ ދެއްކި މީހުންނަށް ގެއްލުންވީ އެއިރުގެ ސަރުކާރުގެ ފަރާތުން އެޗްޑީސީއާއި، އިކޮނޮމިކް މިނިސްޓްރީން އަމަލުކުރި ގޮތަކުން ކަމަށްވާތީ، އެމީހުން ދެއްކި ފައިސާ އަނބުރާ ހޯދުމަށެވެ. ޝުނާނާ ސިވިލް ކޯޓަށް ހޫށައެޅި މި މައްސަލަ ބަލައިގަނެ ރަޖިސްޓްރީ ކޮށްފައިވާކަމަށް ޝުނާނާ ވިދާޅުވިއެވެ. ހުޅުމާލޭގައި ތިންހާސް ހައުސިން ޔުނިޓް އެޅުމަށް ސަރުކާރުން ސީލައިފްއާ ހަވާލުކުރީ 02 އޭޕްރީލް 2014 ވަނަ އަހަރުއެވެ.