ތުތި ބޯވަދިލަ މަހުގެ މަސްވެރިކަން ކުރަން ބޭނުންވާ ސާމާނު މަސްވެރިންނަށް ދޫކުރާނެ އުސޫލެއް ފިޝަރީޒް މިނިސްޓްރީން ކަނޑައަޅައިފިއެވެ.
ފިޝަރީޒް މިނިސްޓްރީން ބުނީ ތުތި ބޯވަދިލަ މަހުގެ މަސްވެރިކަން ކުރަން ބޭނުންވާ ފަރާތްތަކަށް އެކަމާ ގުޅޭ ސާމާނު ފޯރުކޮށް ދިނުމުގެ ގޮތުން ހިންގާ ޕްރޮގްރާމަށް އާއްމުކޮށް ހުރިހާ ފަރާތަކަށްވެސް ކުރިމަތިލެވޭނެކަމަށެވެ. މިގޮތުން ތުތި ބޯވަދިލަމަހުގެ މަސްވެރިކަންކުރުމަށް ބޭނުންވާ އާލާތްތައް ހިމެނޭ 10 ސެޓެއް ދޫކުރުމަށް ނިންމާފައިވާކަމަށެވެ.
ފިޝަރީޒް މިނިސްޓްރީން ބުނީ މަހުން މަހަށް ފައިސާ ދައްކާ އުސޫލުން ފޯރުކޮށްދޭ ސެޓުތަކުގެ އަގު ދުއިސައްތަ ސާޅީސް ނުވަހާސް ރުފިޔާއަށް އަރާކަމަށެވެ. މިގޮތުން މި ތަކެތި ފޯރުކޮށްދޭ އުސޫލުގެ ދަށުން ކޮންމެ މަހަކު ދައްކަންޖެހެނީ ހަތަރު ހާސް ހަތަރު ސަތޭކަ ސާޅީސް ހަ ރުފިޔާއެވެ. އަދި މި ތަކެތި ދޫކުރުމުގައި ޒުވާން މަސްވެރިންނަށް އިސްކަން ދޭނެކަމަށް ފިޝަރީޒް މިނިސްޓްރީން ބުނެއެވެ.
ތުތި ބޯވަދިލަ މަހުގެ މަސްވެރިކަން ކުރަން ބޭނުންވާ ފަރާތްތަކުން އެކަމަށް އެދި ހުށަހަޅާ ފޯމާއި، އުޞޫލު އެ މިނިސްޓްރީގެ ރިސެޕްޝަނުންނާއި ވެބްސައިޓުން ލިބެން ހުންނާނެއެވެ. މިތަކެއްޗަށް އެދި ހުށަހަޅުމުގެ ފުރުސަތު މި މަހުގެ ނިޔަލަށް ވަނީ ހުޅުވާލާފައެވެ.
ފިޝަރީޒް މިނިސްޓްރީން ބުނީ ތުތި ބޯވަދިލަމަހުގެ މަސްވެރިކަން ކުރުމަށް ދޫކުރާ ތަކެތި ބަލާލަން ބޭނުންވާ ފަރާތްތަކަށް ހުޅުމާލޭ އިންޑަސްޓްރިއަލް އޭރިޔާގައި ހުންނަ އެ މިނިސްޓްރީގެ ފެޑް ސެންޓަރުން ސަރުކާރު ބަންދު ނޫން ކޮންމެ ދުވަހަކު ހެނދުނު 9:00 އިން 12:00 އަށް ފެންނަން ހުންނާނެ ކަމަށެވެ.
ތުތި ބޯވަދިލަމަހުގެ މަސްވެރިކަމަކީ ރާއްޖޭގެ މަސްވެރިކަމުގެ ދާއިރާގައި މަސައްކަތް ކުރާ ފަރާތްތަކަށް މަންފާކުރާނެ ވިޔަފާރިއެއްކަމަށާއި، ބައިނަލްއަޤްވާމީ ބާޒާރުގައި ތުތި ބޯވަދިލަމަހަށް ރަނގަޅު އަގެއް ލިބޭ ކަމަށް ފިޝަރީޒް މިނިސްޓްރީން ބުނެއެވެ. ތުތި ބޯވަދިލަ މަހުގެ މަސްވެރިކަން ރާއްޖެއަށް ތަޢާރަފްކުރުމަކީ ރައީސް އިބްރާހިމް މުހައްމަދު ސާލިހުގެ ރިޔާސީ ވައުދެކެވެ.