ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ސަރުކާރުގެ ފުރަތަމަ 30 މަސައްކަތު ދުވަހުގެ ނިޔަލަށް ޙާސިލްކުރަން ކަނޑައަޅުއްވާފައިވާ 67 ކަމެއްގެ ތެރެއިން 56 ކަމެއް ފުރިހަމަކުރެވިފައިވާކަމަށް ސަރުކާރުން ހާމަކުރައްވައިފިއެވެ.
ސަރުކާރުން ވަނީ ރައީސް ޞާލިޙްގެ ވެރިކަމުގެ ފުރަތަމަ ސަތޭކަ ދުވަހުގެ ތެރޭގައި ކުރުމަށް ގިނަ ކަންތައްތަކެއް ކަނޑައަޅުއްވަފައެވެ. މިގޮތުން ފުރަތަމަ 30 ދުވަހު ކުރުމަށް 67 ކަމެއް ކަނޑައަޅުއްވާފައި ވާއިރު ތިރީސް ދުވަސް ހަމަވެފައިވަނީ މިއަދުގެ ނިޔަލަށެވެ. މި މުއްދަތުގެ ތެރޭގައި ކުރައްވަން ނިންމަވާފައިވާ 67 ކަމެއްގެ ތެރެއިން 56 ކަމެއް ނުވަތަ އެކަންކަމުގެ %82 ފުރިހަމވެފައިވާކަމަށް ރައީސް އޮފީހުން ވިދާޅުވިއެވެ.
މީގެ ތެރޭގައި ތަފާތު 19 ދާއިރާއަކާގުޅޭ ކަންކަން ހިމެނެއެވެ. ޚާއްޞަ ގޮތެއްގައި މަތީ ތަޢުލީމާއި ކޮރަޕްޝަން ނައްތާލުމާއި، ސިއްޙީ ދާއިރާއާއި، ދަތުރުފަތުރާއި، ޑިމޮކްރެސީ އާއި އިންސާނީ ޙައްޤުތަކާ ގުޅޭ ކަންކަން ހިމެނެއެވެ.
ސަރުކާރުގެ ފުރަތަމަ 30 ދުވަހުގެ މަސައްކަތްތަކުން އެންމެ ބޮޑަށް ފާހަގަ ކޮށްލެވޭ އެއްކަމަކީ ދުސްތޫރީ ވެރިކަމަކަށް ރުޖޫޢަވެވުމާއި، ޑިމޮކްރެސީއެއްގައި ރައްޔިތުންނަށް ލިބިދޭންޖެހޭ ޙައްޤުތައް ކަށަވަރު ކޮށްދިނުންކަމަށާއި، މިރޮނގުން ފާހަގަ ކޮށްލެވޭ މުހިންމު ކާމިޔާބީތަކުގެ ތެރޭގައި، މިނިވަން ނޫސްވެރިކަމަށާއި ޚިޔާލުފާޅުކުރުމުގެ މިނިވަންކަމަށް ހުރަސް އެޅޭގޮތަށް މީގެ ކުރިން ފާސްކޮށްފައިވާ "އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ޤާނޫނު އުވާލުމުގެ ބިލް"، ރައްޔިތުންގެ މަޖިލީހުން ފާސްކުރައްވައި ރައީސުލްޖުމްހޫރިއްޔާ އެބިލް ތަޞްދީޤު ކުރައްވާފައިވާކަން ސަރުކާރުން ފާހަގަކުރެއެވެ.
ތަންފީޒީ އިދާރާތަކަށް ގެއްލިފައި އޮތް ރައްޔިތުންގެ އިތުބާރު އަލުން ހޯދުމަށް އިސްކަން ދެއްވައިގެން ސަރުކާރުންވަނީ ފުލުހުންގެ އިދާރާއަށް މިދިޔަ 30 ދުވަހުގެ ތެރޭގައި އިސްލާހީ ހެޔޮ ބަދަލުތަކެއް ގެންނަވާފައިކަމަށާއި، ވޭތުވެދިޔަ އަހަރުތަކުގެ ތެރޭގައި ހިނގާފައިވާ ހަގީގަތް ނޭނގޭ މަރުތަކާއި މީހުން ގެއްލުވައިލުމުގެ ހާދިސާތަކުގެ މިނިވަން ތަހުގީގެއް ހިންގުމަށްޓަކައި، "މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަޙުޤީގުކުރާ ކޮމިޝަން" ރައީސުލްޖުމްހޫރިއްޔާ އެކުލަވާލައްވައި، އެ ކޮމިޝަނުން ވަނީ ބޮޑެތި ކުރިއެރުންތަކެއް ހޯދައިފައިކަމަށް ރައީސް އޮފީހުން ވިދާޅުވިއެވެ.
ސަރުކާރުގެ ފުރަތަމަ 30 މަސައްކަތު ދުވަހުގެތެރޭގައި ޚާއްޞަ އަހަންމިއްޔަތުކަމެއް ދެއްވައިގެން ކުރިއަށް ގެންދެވި އަނެއް ދާއިރާއަކީ ޒުވާނުންނާއި ގުޅުންހުރި ދާއިރާ ޚާއްޞަކޮށް ޒުވާނުންނަށްޓަކައި ތައުލީމު އުނގެނުމުގައި ލުއިފަސޭހަތަކެއް ވަނީ ފޯރުކޮށްދެއްވައިފައިކަމަށް ރައީސް އޮފީހުން ވިދާޅުވެއެވެ. މިގޮތުން ރާއްޖޭގައި ހިންގާ މަތީ ތައުލީމުގެ ހުރިހާ މަރުކަޒުތަކަކުން ބެޗެލާސް ޑިގްރީއާ ހަމައަށް ހިލޭ ކިޔެވުމުގެ ފުރުސަތު ތަނަވަސްކޮށްދެއްވުމަށް ވެފައިވާ ވައުދު ފުއްދާފައިވާއިރު، ރާއްޖެއިން ބޭރުގައި ކިޔަވަން ބޭނުންވާ ފަރާތްތަކަށް ލުއިފަސޭހަ ކޮށްދިނުމުގެ ގޮތުން މަތީ ތައުލީމުގެ ލޯނުގެ އިންޓްރެސްޓް 3 އިންސައްތައަށް ކުޑަކޮށް، ލޯން އަނބުރާ ދެއްކުމަށް ހަމަޖައްސަވާފައިވާ މުއްދަތު 25 އިންސައްތައަށް ކުޑަކޮށްދީފައިވާކަމަށް ރައީސް އޮފީހުން ވިދާޅުވެއެވެ.
މީގެ އިތުރުން، މަތީ ސާނަވީ އިމްތިހާނުގައި އެންމެ ރަނގަޅު ނަތީޖާ ހާސިލުކުރާ ކުދިންގެ ސްކޮލަޝިޕް، އޯ.އީ.ސީ.ޑީ. ޤައުމުތަކުގެ އުނިވަރސިޓީތަކުން ހޯދޭނެ މަގު ފަހިކޮށްދީފައިވާކަމަށްވެސް ރައިސް އޮފީހުން ވިދާޅުވެއެވެ.
މީގެ އިތުރުން ފާހަގަ ކޮށްލެވޭ މުހިންމު ކާމިޔާބީތަކުގެ ތެރޭގައި، ދިވެހިރާއްޖެއިން ކޮމަންވެލްތުގައި އަލުން ބައިވެރިވުމަށް ރަސްމީކޮށް ހުށަހެޅުއްވުމާއި، ލާމަރުކަޒީ ޤާނޫނުގެ ދަށުން ސިޓީ ކައުންސިލްތަކަށް ލިބިދީފައިވާ ބާރުތަކުގެ ތެރެއިން މީގެ ކުރިން ސަރުކާރަށް ނަންގަވާފައިވާ ބާރުތައް އަލުން އަނބުރާ ސިޓީ ކައުންސިލްތަކަށް ދިނުން ހިމެނެއެވެ.
ތިމާވެށީގެ ދާއިރާއިން ސަރުކާރުން ހާސިލުކުރައްވާފައިވާ ކަންކަމުގެ ތެރޭގައި، ހއ.ބާރަށާއި ހއ.ނޭކުރެންދޫގައި ޙިމާޔަތްކޮށްފައިވާ ސަރަހައްދުތަކެއް ކަނޑައެޅުއްވުމާއި ހއ.ކޭލަކުނަކީ ޙިމާޔަތްކޮށްފައިވާ ރަށެއްގެ ގޮތުގައި ކަނޑައެޅުއްވުންވެސް ހިމެނެއެވެ. ސިއްޙީ ދާއިރާއިން ހޯއްދަވާފައިވާ ފާހަގަކޮށްލެވޭ ކާމިޔާބީތަކުގެ ތެރޭގައި، އާސަންދައިގެ ތެރޭގައި ތަފާތު ތެރަޕީ ފަރުވާތައް ހިމެނުމާއި، އައި.ޑީ. ކާޑު މުއްދަތު ހަމަވެފައިވީ ނަމަވެސް އާސަންދައިގެ ޚިދުމަތް ހޯދުމަށް މަގުފަހި ކޮށްދެއްވުން ހިމެނޭކަމަށް ރައީސް އޮފީހުން މަޢުލޫމާތުދެއްވައެވެ.
ކުރު މުއްދަތެއްގެ ތެރޭގައި ސަރުކާރުން ހާސިލްކޮށްފައިވާ ބޮޑެތި ކާމިޔާބީތަކާ މެދު ވަރަށް ހިތްޕުޅު ހަމަޖެހިވަޑައިގަންނަވާކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ ވިދާޅުވެފައެވެ. އަދި މިއީ ކުރިއަށް އޮތްތާގައި ސަރުކާރުން ކުރަންހުރި ކަންކަމުގެ ތެރެއިން މަދު މިންވަރެއް ކަމަށާއި، މިހާތަނަށް ހާސިލްކުރެވުނު ކަންކަމަކީ، ސަރުކާރުގެ އަމާޒަށް ވާސިލުވުމަށް ލިބިވަޑައިގެންނެވި އިތުރު ހިތްވަރެއްކަމުގައި ރައީސުލްޖުމްހޫރިއްޔާ ސިފަކުރައްވާފައިވެއެވެ.
މީގެއިތުރުން އިޤްތިޞާދީ ކުރިއެރުމާއި ޤައުމީ ތަރައްޤީއާއެކު ސަރުކާރު ހިންގުމުގައި ރައްޔިތުންގެ ބައިވެރިވުން އިތުރުކޮށް ރައްޔިތުންގެ ޑިމޮކްރެޓިކް ޙައްޤުތައް ކަށަވަރުކޮށްދިނުމަށް ސަރުކާރުން ވައުދުވެފައިވާ ކަންކަން ފުރިހަމަ ކުރެއްވުމުގައި އިތުރު ބާރަކަށް އެކަންކަން ވެގެން ހިނގައްޖެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
ސަރުކާރުގެ ފުރަތަމަ 100 މަސައްކަތު ދުވަސް ހަމަވާނީ މިއަހަރުގެ މާރޗް މަހުގެ 27 ވަނަ ދުވަހުއެވެ. އޭގެ ސަތޭކަ ދުވަހުގެ ތެރޭގައި 21 މިނިސްޓްރީއަކާ ގުޅޭ 161 ވައުދެއް ފުއްދެވުމަށް ވަނީ ކަނޑައަޅުއްވައިފައެވެ.