މާލޭގައި ހުންނަ މައިނަރ ފުޑް ގުރޫޕްގެ އައުޓްލެޓްތަކުން ޚިދުމަތް ހޯދާ ފަރާތްތަކަށް އެމް-ފައިސާ މެދުވެރިކޮށް ފައިސާ ދެއްކޭނެ އިންތިޒާމް އުރީދޫއިން ހަމަޖައްސައިފިއެވެ.
އުރީދޫއިން ބުނީ އެމް-ފައިސާ ބޭނުންކުރާ ކަސްޓަމަރުންނަށް މައިނަރ ފުޑް އައުޓްލެޓްތަކުގެ ތެރެއިން ދަ ޕިއްޒާ ކޮމްޕެނީ، ދަ ކޮފީ ކްލަބް އަދި ބާގަރ ކިންގްގެ ބިލުތަކަށް އެމް-ފައިސާ ވޮލެޓް މެދުވެރިކޮށް މިހާރު ފަސޭހަކަމާއެކު ފައިސާ ދައްކާލެވޭނެކަމަށެވެ. އަދި ކައިރި މުސްތަޤުބަލެއްގައި ވެލާނާ އިންޓަނޭޝަނަލް އެއާޕޯޓުގެ މައިނަރ ފުޑް އައުޓްލެޓް ތަކުންވެސް މިޚިދުމަތް ލިބިގެންދާނެކަމަށް އުރީދޫއިން ބުނެއެވެ.
މި ޚިދުމަތް ތަޢާރަފް ކުރުމާއި ގުޅިގެން ޚާއްޞަ އޮފަރއެއްގެ ގޮތުގައި މައިނަރ ފުޑް އައުޓްލެޓްތަކުގެ ބިލުން އެމް-ފައިސާ މެދުވެރިކޮށް ފައިސާ ދައްކާ ކަސްޓަމަރުންނަށް 15 އިންސައްތައިގެ ޑިސްކައުންޓެއް ލިބޭނެކަމަށްވެސް އުރީދޫއިން ބުނެއެވެ.
އުރީދޫއިން ބުނީ، މައިނަރ ފުޑް ގްރޫޕާއި ގުޅިގެން ތަޢާރަފްކުރި ޚިދުމަތުގެ ސަބަބުން ކަސްޓަމަރުންނަށް ފަސޭހަކަމާއި ރައްކާތެރިކަމާއެކު ޚިދުމަތް ލިބިގަތުމުގެ މަގު ފަހިވެގެންދާނެކަމަށެވެ.
މައިނަރ ފުޑް ގްރޫޕުން މާލެ، އަދި ވެލާނާ އިންޓަނޭޝަނަލް އެއާޕޯޓުގައި ބައިނަލްއަޤްވާމީ 5 ފުޑްޗެއިން އޮޕަރޭޓްކުރެއެވެ. މީގެ ތެރޭގައި ދަ ޕިއްޒާ ކޮމްޕެނީ، ދަ ކޮފީ ކްލަބް، ބާގަރ ކިންގް، ތައި އެކްސްޕްރެސް އަދި ޑެއިރީ ކުއީން ހިމެނެއެވެ.