މާލޭ ރިންގް ރޯޑު ފެހިކުރުމުގެ މަސައްކަތް ފެށުމަށް ތައްޔާރުވަމުންދާކަމަށް އެންވަޔަރަމަންޓް މިނިސްޓްރީން ބުނެފިއެވެ.
މާލޭ ސިޓީއަށް އަންނަމުންދާ ތަރައްޤީއާއި ކުރިއެރުމާ އެއްވަރަށް، މާލޭގެ ފެހިކަން ދަނީ ގެއްލެމުންނެވެ. ފެހިކަން ގަދަ ޖަޒީރާވަންތަ ރަށެއްގެ ސިފަ މަޑުމަޑުން ގެއްލި، މާލޭ ސިޓީ ބޮޑަށް މިހާރު ސިފަކުރެވިގެންދަނީ ކޮންކްރީޓް ޖަންގައްޔެއްގެ ގޮތުގައެވެ. މިކަމަށް ހައްލެއް ގެނެއުމަށް އެކި ފަހަރުގެ މަތިން މާލެ ފެހިކުރުމުގެ މަސައްކަތް ކުރެވުނު ނަމަވެސް، މިއަދާއި ހަމައަށްވެސް މިކަމަށް އެދެވޭ ހައްލެއް ގެނެވިފައެއް ނުވެއެވެ.
މާލޭގެ އާބާދީ އިތުރުވެ، ގޯތިގެދޮރު އިމާރާތް ކުރާ ނިސްބަތް އިތުރުވަމުންދާއިރު މި ކަމަށް އަވަސް ހައްލެއް ނުގެނެވިއްޖެނަމަ މާލެއިން ފެހިކަން ގެއްލުމަކީވެސް އެކަށީގެންވާ ކަމެކެވެ.
މިކަން މިހެން އޮތްއިރު، ސިނަމާލޭ ބްރިޖާ އިންވެގެން މާލޭގެ ބޭރުމަގުގައި ތަރައްޤީކޮށްފައިވާ ރިންގް ރޯޑުގެ މަސައްކަތް ކުރުމަށްޓަކާ ބޭރުމަގުގައި އިންދާފައިވާ ހިޔާ ލިބޭ ބިޔަ ރުއްގަސްތައް ކަނޑާލުމަކީ މާލޭގެ ފެހިކަމަށް އަނެއްކާވެސް ލިބިގެންދިޔަ ބޮޑު ހީނަރުކަމެކެވެ. ރިންގް ރޯޑު ތަރައްޤީކުރުމަށް ކަނޑާލި ރުއްގަސްތަކުގެ ބަދަލުގައި، އައު ގަސް އިންދާނެކަމަށް ކުރީގެ ސަރުކާރުން ބުނިނަމަވެސް، މިހާތަނަށް އައިއިރުވެސް އެކަން ކުރެވިފައެއް ނުވެއެވެ.
އެހެންނަމަވެސް ރައީސް ޞާލީޙުގެ ސަރުކާރުގެ ފުރަތަމަ 100 ދުވަހުގެ ވަޢުދުތަކުގެ ތެރޭގައި ހިމެނޭ މުޅި ރާއްޖެ ފެހިކުރުމުގެ ޤައުމީ ހަރަކާތުގެ ތެރެއިން، މާލޭގެ ފެހިކަން އިތުރުކުރުމުގެ މަސައްކަތް އެންވަޔަރަމަންޓް މިނިސްޓްރީން މިހާރު ވަނީ ފަށާފައެވެ.
ޕީ.އެސް.އެމް ނިއުސްއަށް ދެއްވި އިންޓަރވިއުއެއްގައި އެންވަޔަރަމަންޓް މިނިސްޓްރީގެ ޑިރެކްޓަރ ޖެނެރަލް މުޙައްމަދު ޒާހިރު ވިދާޅުވީ، މާލޭގެ ރިންގް ރޯޑު ޑިޒައިންކޮށްފައިވަނީ މަގުގެ އެއް ފަރާތުގައި ގަސް އިންދާގޮތަށާއި، އަނެއްފަރާތުގައި ޕޮޓުގައި ގަސް އިންދާގޮތަށްކަމަށެވެ. އަދި ދުނިޔޭގެ ކުރިއަރާފައިވާ ބައެއް ޤައުމުތަކުގައި މިފަދަ މަގުތަކުގައި އާއްމުކޮށް އިންދަނީ ކޮން ބާވަތެއްގެ ގަސްތަކެއްތޯ ބަލައި، ރާއްޖޭގެ މާހައުލަށް ފެތޭ، ރިންރޯޑުގައި ފަސޭހައިން ހެއްދޭނެ ބާވަތްތަކުގެ ގަސްތައް ދެނެގަތުމުގެ މަސައްކަތްވެސް މިހާރު ކުރަމުންދާކަމަށް ޒާހިރު ވިދާޅުވިއެވެ.
"ރިންގް ރޯޑުގައި ބޮޑެއްޗަށް އިންދާ ގަސްތަކުގެ ތެރޭގައި މި ބަލަނީ ހިތިގަހާއި، ގޯލްޑަންޝަވަރ ނުވަތަ އަންމަލްތާސް އޭ އަޅުގަނޑުމެން މިކިޔާ ވައްތަރުގެ ގަހާއި، ބޮޑުޖަވާހިރާއި، ގިނިމާ.. މި 4 ވައްތަރަށް އަޅުގަނޑުމެން ޓާގެޓްކޮށްގެން މިއުޅެނީ.. އަޅުގަނޑުމެންނަށް ތަޖުރިބާކުރެވިފައި ހުރި ގޮތުގައި އެންމެ ރަނގަޅަށް އެ މަގުގައި ހެއްދޭނެ ބޮޑެތި ގަސްތަކަކީ މިއީ.. ކުދި ގަސްތަކުގެ ގޮތުގައި މާލޭގައި މިވަގުތު ފެންނަން ނެތް އެކި ބާވަތް ބާވަތުގެ މާ އަޅާ ގަސްތައްވެސް އިންދާނަން.." ޒާހިރު ވިދާޅުވިއެވެ.
ޒާހިރު ވިދާޅުވީ، ރިންގް ރޯޑަށް ބޭނުންވާ ގަސްތައް ރާއްޖެ ގެނެސްދޭނެ ފަރާތެއް ހޯދުމަށް އިޢުލާންކޮށް، ބިޑް ކާމިޔާބު ކުރި ފަރާތާއެކު އެއްބަސްވުމުގައި ސޮއިކުރުމަށް ތައްޔާރުވަމުންދާކަމަށެވެ. ނަމަވެސް ރިންގް ރޯޑުގައި ގަސް އިންދުމުގެ މަސައްކަތް ފަށާނޭ ސީދާ ވަކި ތާރީޚެއް މިނިސްޓްރީން އަދި ހާމަކޮށްފައެއް ނުވެއެވެ.
"ރިންގް ރޯޑަކީ ޒަމާނާ އެއްގޮތަށް ތައްޔާރުކުރެވިފައި އޮތް މަގެއް.. އެމަގުގައި ކޮންމެކޮންމެ ވައްތަރެއްގެ ގަސްތަކެއް ނުއެއް އިންދޭނެ.. އެހެންވީމަ އެތަނަށް ބޭނުންވާ ގަސްތައް މި ގެންނަނީ ސީދާ ރާއްޖޭން ބޭރުން. އެ ގަސްތައް ހޯދުމުގެ މަސައްކަތް މިއަންނަނީ ކުރަމުން.. ރޯޑުސައިޑަށް ޑިޒައިންކޮށްފައި ހުރި ޕްލާންޓްތައް އަޅުގަނޑުމެން ގެންނާނީ.. މިހާރު ގަސްތައް ހޯދުމަށްޓަކާ އިޢުލާންކުރެވި، ބިޑް ކާމިޔާބުކޮށް އަޅުގަނޑުމެން ކޮންޓްރެކްޓުގައި ސޮއިކުރާ ހިސާބުގައި މިހާރު އޮތީ.." ޒާހިރު ވިދާޅުވިއެވެ.
މާލެތެރެ ފެހިކުރުމުގެ މަސައްކަތުގެ ދަށުން ރިންގް ރޯޑުގެ އިތުރުން، މާލޭގެ ބޮޑެތި ބައެއް މަގުތަކާއި، ޕާކު ފަދަ އާއްމު ތަންތާނގައިވެސް ގަސް އިންދުމަށް ވިސްނާފައިވާކަމަށް އެންވަޔަރަމަންޓް މިނިސްޓްރީން ބުނެއެވެ. ގަސް އިންދުމަކީ އަބަދުވެސް މިނިސްޓްރީން މަރުޚަބާ ކިޔާ ކަމެއްކަމަށާއި، ނަމަވެސް ގަސް އިންދުމަށްޓަކާ އެއް ތަނުން އަނެއްތަނަށް ގަސް ކަނޑައިގެން ގެންދިއުމަކީ އެއްވެސް ވަރަކަށް އެ މިނިސްޓްރީން ތަރުހީބުދޭ ކަމެއް ނޫންކަމަށްވެސް އެންވަޔަރަމަންޓް މިނިސްޓްރީން ބުނެއެވެ.