މޯލްޑިވްސް އެއާޕޯޓްސް ކޮމްޕެނީ ލިމިޓެޑް، އެމް.އޭ.ސީ.އެލްއިން ވިއްކާ ޖެޓް ފިއުލްގެ އަގު އަންނަ އަންގާރަ ދުވަހުން ފެށިގެން ހެޔޮވާނެކަމަށް އެ ކުންފުނިން ބުނެފިއެވެ.
އެމް.އޭ.ސީ.އެލްއިން ބުނީ މި ބަދަލާއެކު އިންޓަނޭޝަނަލް ބޯޓުތަކަށް ޖެޓް ފިއުލް ލީޓަރެއް ވިއްކާނީ 0.91 ޑޮލަރު ނުވަތަ 14 ރުފިޔާއަށްކަމަށެވެ. މިއީ 6.91 އިންސައްތައިގެ ކުޑަވުމެކެވެ. އަދި ޑޮމެސްޓިކް ބޯޓުތަކަށް ޖެޓް ފިއުލް ލީޓަރެއް 0.92 ޑޮލަރު ނުވަތަ 14.1 ރުފިޔާއަށް ވިއްކާއިރު މިއީ 7.50 އިންސައްތައިގެ ކުޑަވުމެކެވެ.
އެމް.އޭ.ސީ.އެލްއިން ބުނީ މިދުވަސްވަރު އެއަރލައިންތަކުގެ ފްލައިޓްތައް އިތުރުވެފައިވާއިރު ޖެޓް ފިއުލްގެ އަގުހެޔޮކުރުމުން އެއާލައިންތަކަށް އެކަމުގެ ފައިދާކުރާނެކަމަށެވެ.
އެމްއޭސީއެލްއިން ބުނީ އެ ކުންފުނީގެ އަމާޒަކީ ރާއްޖެއަށް ގިނަ އެއަރލައިންތައް ގެނެސް، ރާއްޖޭގެ ފަތުރުވެރިކަން ކުރިއެރުވުންކަމަށެވެ.