ކ. ގާފަރު ކައިރިން ދަތުރުކުރަމުންދިޔަ ދޯންޏެއް ބަންޑުން ޖަހާލައިފިއެވެ.
މި ޙާދިސާ ހިނގި ވަގުތު އެދޯނީގައި 4 ބިދޭސީންނާއި، ދިވެއްސަކު ހުރިކަމަށް އެމް.އެން.ޑީ.އެފުން މަޢުލޫމާތު ދެއެވެ. އަދި މި މީހުން މިހާރު ގާފަރުގެ ލޯންޗަކުން އެ ރަށަށް ގެންގޮސް ހެލްތް ސެންޓަރުގައި ފަރުވާދެމުންދާކަމަށްވެސް އެމްއެންޑީއެފުން ބުނެއެވެ.
ގާފަރު ކައިރިއަށް ބަންޑުން ޖަހާލީ މާލެއިން ގަސްކާނާ ހިފައިގެން ކ. ކާށިދޫއަށް ދަތުރުކުރި "ގެޓަނޯ 2" ނަމަކަށް ކިޔާ ދޯންޏެއްކަމަށާއި، މި ޙާދިސާގެ މަޢުލޫމާތު އެމް.އެން.ޑީއެފަށް ލިބުނީ މިއަދު މެންދުރު 14:33 ގައިކަމަށް އެމް.އެން.ޑީ.އެފުން ބުނެއެވެ.
ގާފަރު ކައިރިއަށް ދޯންޏެއް ބަންޑުން ޖަހާލުމާގުޅިގެން، އެ ސަރަޙައްދުގައި އެމް.އެން.ޑީ.އެފްގެ މާލޭ އޭރިއާގެ ކޯސްޓްގާޑް ސްކޮޑްރަންއިން ހަރަކާތްތެރިވާން ފަށާފައިވާއިރު، ދޯނީގައި ތިބި މީހުން މިހާރު ތިބީ ފަރުމަތީގައިކަމަށާއި، ގާފަރު ކައުންސިލްގެ ފަރާތުން އެމީހުންނަށް ބޭނުންވާ އެހީތެރިކަން ފޯރުކޮށްދެމުންދާކަމަށްވެސް އެމް.އެން.ޑީ.އެފުން ބުނެއެވެ.
މާލެއިން ކ. ކާށިދޫއަށް ދަތުރުކުރަމުންދަނިކޮށް ގާފަރު ކައިރިއަށް ބަންޑުން ޖަހާލި "ގެޓަނޯ 2" ދޯނީގެ ދިގުމިނުގައި 85 ފޫޓް ހުރެއެވެ.