އިލެކްޝަންސް ކޮމިޝަންގައި މިއަދު ރަޖިސްޓްރީކުރި މޯލްޑިވިއަން ތާރޑްވޭ ޑިމޮކްރެޓްސްގެ ސީނިއަރ ނާއިބު ރައީސަކަށް އިސްމާޢީލް އާސިފް އަދި ނާއިބު ރައީސަކަށް ވެލިދޫ ދާއިރާގެ މެންބަރު ޢަބްދުﷲ ޔާމީންހަމަޖައްސައިފިއެވެ.
އެމްޓީޑީން އާސިފާއި، މެންބަރު ޔާމީން އެ މަޤާމުތަކަށް ޢައްޔަންކޮށްފައިވަނީ މިއަދު ބޭއްވި އެޕާޓިގެ އިންތިޤާލީ ކައުންސިލްގެ ފުރަތަމަ ބައްދަލުވުމުގައެވެ. އިސްމާޢީލް އާސިފަކީ އެމްޓީޑީ އުފެއްދުމުގައި އެންމެ އިސްކޮށް އުޅުއްވި ބޭފުޅާއެވެ. އަދި އިލެކްޝަނސް ކޮމިޝަނުން އެޕާޓީ ރަޖިސްޓްރީ ކޮށްދެއްވާފައިވަނީވެސް އާސިފަށެވެ.
ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު ޢަބްދުﷲ ޔާމީން ރަޝީދު ޕީޕިއެމުން ވަކިވެ އަލަށް އުފައްދާ މޯލްޑިވްސް ތާޑްވޭ ޑިމޮކްރެޓްސް، އެމްޓީޑީއަށް ސޮއިކޮށްފައިވަނީ މިމަހުގެ 12 ވަނަ ދުވަހުއެވެ. ޔާމީން ޕީޕީއެމުން ވަކިވެފައިވަނީ ވަނީ އަންނަ މަޖިލިސް އިންތިހާބުގައި ވެލިދޫ ދާއިރާގައި ވާދަކުރުމަށް ޕްރައިމެރިއަކާއި ނުލާ ޕީޕީއެމްގެ ޓިކެޓް ދީފައިވަނިކޮށެވެ. ޔާމީން ވިދާޅުވީ އެމްޓީޑީއާއި އޭނާ ގުޅިވަޑައިގަތީ ޕީޕީއެމްގެ މުސްތަގުބަލެއް އޮތްކަމަށް ޤަބޫލުނުކުރެވޭތީ ކަމަށެވެ.
ޔާމީން ރައްޔިތުން މަޖިލީހުގެ ވެލިދޫ ގޮނޑި ކާމިޔާބުކުރެއްވީ އެމްޑީޕީ ޓިކެޓްގައެވެ. އަދި އޭގެ ފަހުން ޕީޕީއެމްއާއި ގުޅިވަޑައިގަތީ 2015 އަހަރުއެވެ.