ޕްރައިމަރީއަކާ ނުލައި 12 މެންބަރުނަށް ޓިކެޓްދިނުމަށް ނިންމި ނިންމުމުގައި ދެމިހުންނާނަން - މައުމޫން
ރައްޔިތުންގެ މަޖިލީހުގެ ކުރިއަށް އޮތް އިންތިޚާބުގެ ޓިކެޓް ޕްރައިމަރީއަކާ ނުލައި 12 މެންބަރުނަށް ދިނުމަށް ކޯލިޝަނުން ނިންމި ނިންމުމުގެމަތީގައި ދެމިހުންނަވާނެކަމަށް ކުރީގެ ރައީސް މައުމޫން ޢަބްދުލްޤައްޔޫމް ވިދާޅުވެއްޖެއެވެ.
ރައީސް ޔާމީންގެ ވެރިކަމުގައި ރައްޔިތުންގެ މަޖިލީހުގެ ޕީޕީއެމް ޕާލިމަންޓްރީ ގްރޫޕްގައި ހިމެނިވަޑައިގެންނެވި 12 މެންބަރަކު ވަނީ އެޕާޓިން ވަކިވެ އިދިކޮޅު ކޯލިޝަނާއެކު މަސައްކަތްކުރައްވަން ފަށްޓަވާފައެވެ. އަދި އެ މެންބަރުންގެ ގޮނޑި ގެއްލިފައިވާކަަމަށް ކުރިން އިލެކްޝަންސް ކޮމިޝަނުން ނިންމުމުން އެމައްސަލާގައި އެ ބާރަ މެންބަރުންގެ ގޮނޑި ނުގެއްލޭކަމަށް ސުޕްރީމްކޯޓުން ފަހުން ވަނީ ކަނޑައަޅާފައެވެ.
ކޯލިޝަންގައި ހިމެނޭ ލީޑަރުންގެތެރެއިން ކުރީގެ ރައީސް މައުމޫން ޢަބްދުލްޤައްޔޫމް މިއަދު ކުރެއްވި ޓްވީޓެއްގައި ވިދާޅުވެފައިވަނީ، ކުރީގެ ސަރުކާރުގެ އަނިޔާވެރިކަން ހުއްޓުމަކަށް ގެނައުމަށާ އިސްލާޙަށް މަސައްކަތްކުރާނެ ކޯލިޝަން ސަރުކާރެއް ޤާއިމްކުރުމަށްޓަކައި 12 މެންބަރުން ކުރެއްވި ބުރަ މަސައްކަތާއި ވެވަޑައިގެންނެވި ޤުރުބާނީގެ އަގުވަޒަންކޮށް ޕްރައިމަރީއަކާއި ނުލައި އެ 12 މެންބަރުން މަޖިލީހުގެ އަންނަ އިންތިޚާބަށް ކުރިމަތިލެއްވުމަށް ޓިކެޓް ދިނުމަށް ލީޑަރުން އެއްބަސް ވެވަޑައިގެފައިވާކަމަށެވެ. އަދި ލީޑަރުން ވަޢުދުވިގޮތުގެ މަތީގައި އެމަނިކުފާނު ދެމިހުންނަވާނެކަމަށްވެސް މައުމޫން ވިދާޅުވެފައިވެއެވެ.
ރައީސް މައުމޫން މިހެން ވިދާޅުވެފައިވާއިރު، އިލެކްޝަންސް ކޮމިޝަނުން ގޮނޑި ގެއްލުނުކަމަށް ކުރިން ކަނޑައެޅި މަޖިލީހުގެ 12 މެންބަރުންނަށް އެމެންބަރުން މިހާރު ތަމްސީލް ކުރައްވަމުން ގެންދަވާ ދާއިރާތަކުގެ ޓިކެޓް އެއްވެސް ޕްރައިމަރީއަކާ ނުލައި ކޯލިޝަނުން ދޭން ނިންމާފައިވާކަމަށް އެމްޑީޕީގެ ރައީސް އަދި ކުރީގެ ރައީސް މުޙައްމަދު ނަޝިދުވެސް ވިދާޅުވުމުން ސޯޝަލް މީޑިއާގައި އަމާޒުވި ފާޑުކިއުންތަކަށްފަހު ފަހުން ވަނީ އެގޮތަށް އެއްބަސް ނުވާނެކަމަށް ވިދާޅުވެފައެވެ.
ޕްރައިމަރީއަކާއި ނުލައި 12 މެންބަރުންނަށް އަންނަ އިންތިޚާބުގައި ވާދަކުރުމަށް ޓިކެޓް ދިނުމަށް ނިންމާފައިވާ ނިންމުމަށް ކޯލިޝަންތެރޭގައިވަނީ ޚިޔާލުތަފާތުވުން އުފެދިފައެވެ.