ކާރިޘާގެ ކަންކަން ބެލެހެއްޓުމަށާއި، ކާރިޘާތަކުން ލިބޭ ގެއްލުންތަކާއި ނުރައްކާތައް ކުޑަކުރުމަށްޓަކައި، ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީގެ އުފެއްދުމުގެ މަސައްކަތް ކުރައްވަމުން ގެންދަވާކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ނިންމަވައިފިއެވެ.
އެކި ހާދިސާތަކުގައި ހާލުގައިޖެހޭ އާއިލާތަކަށް ވަގުތުން އެހީތެރިކަން ފޯރުކޮށްދެވޭނެ އިންތިޒާމެއް، ކޮންމެ އަތޮޅެއްގައި ޤާއިމްކޮށްދޭނެކަމަށްވެސް ރައީސް ވިދާޅުވިއެވެ. މިކަން ރައީސް އިޢުލާންކުރެއްވީ ދިވެހިންގެ އެއްބައިވަންތަކަމުގެ ދުވަސް ފާހަގަކުރުމަށް ރ.ދުވާފަރުގައި ބޭއްވި ޚާއްޞަ ޖަލްސާގައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވީ، ސުނާމީއަށްފަހު، ދިވެހިން ކުރަންޖެހުނު އެންމެ މުހިންމު ކަމަކީ، ގުދުރަތީ ކާރިޘާތަކުން ލިބިދާނެ ގެއްލުން ކުޑަކުރުމަށް ފިޔަވަޅުއެޅުންކަމަށެވެ. އެގޮތުން، މޯލްޑިވްސް މީޓިއޮރޮލޮޖިކަލް ސަރވިސްގައި ސިސްމޮލޮޖީ ޔުނިޓެއް އުފައްދާފައިވާކަމަށާއި، ދުނިޔޭގެ އެއްވެސް ތަނަކަށް ބިންހެލުމެއް އައިސްފިނަމަ ސުނާމީއެއް އުފެދޭތޯ ބެލުމަށް، 24 ގަޑިއިރު އެ ޔުނިޓްގައި މަސައްކަތް ކުރަމުންދާކަމަށެވެ. އަދި ދިޔަވަރަށް އަންނަ ބަދަލުތައް ދެނެގަތުމަށް، ރާއްޖޭގެ 3 ސަރަޙައްދެއްގައި ޓައިޑްގޭޖް ޤާއިމުކޮށްފައިވާކަން ފާހަގަކުރައްވަމުން ރައީސް ޞާލިޙް ވިދާޅުވީ، ރާއްޖޭގެ ދެސަރަޙައްދެއްގައި ބިންހެލުން މޮނިޓަރ ކުރާ ވަސީލަތްތައް ޤާއިމުކޮށް، ބައިނަލްއަޤްވާމީ ވިޔުގައާ ގުޅާލާފައިވާކަމަށެވެ. އެހެންކަމުން ދުނިޔޭގެ ކޮންމެ ތަނަކަށް ބިންހެލުމެއް އަޔަސް ކުޑަ ވަގުތުކޮޅެއްގެ ތެރޭގައި އެކަން ރާއްޖެއަށް ދެނެގަނެވޭނެކަމަށް ރައީސް ވިދާޅުވިއެވެ.
ރައީސް ވިދާޅުވީ މިފަދަ ނިޒާމުތަކެއް ޤާއިމުކޮށްފައިވީނަމަވެސް، އޭގެ ނަތީޖާ ޙާޞިލުކުރެވޭނީ، އެފަދަ ކަންކަމަށް ހޭލުންތެރިވެ، ކާރިޘާތަކުން ލިބޭ ގެއްލުންތައް ކުޑަކުރުމަށް، ދުރާލައި ތައްޔާރުވި ވަރަކުންކަމަށެވެ. އެހެންކަމުން "ކާރިޘާ އާއި ބެހޭ ކަންކަން ބެލެހެއްޓުމުގެ ޤާނޫނު"ގެ ނަމުގައި 2015 ވަނަ އަހަރު ޤާނޫނެއް ފާސްކޮށްފައިވާކަން ފާހަގަކުރައްވާ ރައީސް ޞާލިޙް ވިދާޅުވީ، އެމަނިކުފާނު ވެރިކަމާ ޙަވާލުވިއިރުވެސް، އެ ޤާނޫނު ތަންފީޒުކުރުމަށް ކުރަންޖެހޭ މުހިންމު ބައެއް ކަންކަން ކޮށްފައި ނުވާކަމަށެވެ.
ރައީސް ވިދާޅުވީ އެޤާނޫނުން ލާޒިމްކުރާ އެންމެ މުހިއްމު ކަމަކީ، ކާރިޘާގެ ކަންކަން ބެލެހެއްޓުމާއި، ކާރިޘާތަކުން ލިބޭ ގެއްލުންތަކާއި ނުރައްކާތައް ކުޑަކުރުމަށްޓަކައި، ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ އުފެއްދުންކަމަށް ރައީސް ވިދާޅުވިއެވެ. އެ އޮތޯރިޓީ އުފެއްދުމުގެ މަސައްކަތް ސަކާރުން ފަށާފައިވާކަން އިޢުލާންކުރައްވަމުން ރައީސް ވިދާޅުވީ، އެ ޤާނޫނުގެ ދަށުން، ނޭޝަނަލް ޑީޒާސްޓަރ މެނޭޖްމަންޓް ކައުންސިލެއް އެކުލަވާލައި، އެކައުންސިލްގެ ލަފާގެ މަތިން ނޭޝަނަލް ޑިޒާސްޓަރ މެނޭޖްމަންޓް ސްޓިއަރިން ކޮމިޓީއެއް އުފެއްދުން ލާޒިމްކުރާކަމަށެވެ. އަދި އެކަން ވަރަށް އަވަހަށް ފުރިހަމަކުރައްވާނެކަމަށްވެސް ރައީސް ވިދާޅުވިއެވެ.
"ކާރިޘާތަކުގެ ނުރައްކާ ކުޑަކުރުމަށްޓަކައި، ދުރާލައި އަޅަންޖެހޭ ފިޔަވަޅުތައް ދެނެގަނެ، އެކަންކަން ތަންފީޒުކުރުމަށްޓަކައި އެކުލަވާލަންޖެހޭ، "ނޭޝަނަލް ޑިޒާސްޓަރ މެނޭޖްމަންޓް ޕްލޭން"ގެ ފުރަތަމަ ދެލި ކޮޕީ ވެސް މިހާރުވަނީ ނިމިފައި. ކާރިޘާތަކުން ލިބޭ ގެއްލުން ކުޑަކުރުމަށާއި، ގެއްލުންތަކުން އަރައިގަތުމަށް ކުރަންޖެހޭ ޚަރަދުތަކަށް، ލިބޭ ފައިސާ ޖަމާކުރުމަށް، "ޑިޒާސްޓަރ މެނޭޖްމަންޓް ޓްރަސްޓް ފަންޑް"ގެ ނަމުގައި މިމަހުގެ 16 ވަނަ ދުވަހު ވާނީ ފަންޑެއް ޤާއިމްކޮށްފަ. އެނޫން ކަމަކަށް އެ ފައިސާ ހޭދަނުކުރެވޭނެ ކަން އަޅުގަނޑުމެން ކަށަވަރުކުރާނަން." ރައީސް ވިދާޅުވިއެވެ.
ރައީސްގެ ވާހަކަފުޅުގައި މޫސުމީ ބަދަލުތަކާއި ކޮޅިގަނޑުތަކުން ރަށްރަށަށް ލިބޭ ގެއްލުންތަކަށް، އަވަސް އެހީތެރިކަން ފޯރުކޮށްދިނުމަށް ސަރުކާރުން އިންތިޒާމުތަކެއް ހަމަޖައްސާނެކަމަށް ވިދާޅުވިއެވެ. އަދި އެފަދަ ޙާލަތްތަކުގައި ރަށްރަށަށް ބޭނުންވާ ކާޑުގެ ބާވަތްތަކާއި، ތެލާއި ކައްކާގޭހާއި ބޭސްފަދަ ތަކެތީގެ އެކަށީގެންވާ ސްޓޮކެއް، ރައްކާކުރެވިފައި ހުންނާނޭ އިންތިޒާމް ހަމަޖެހިގެންދާނެކަމަށްވެސް ރައީސް ވިދާޅުވިއެވެ.
" އަލިފާނުގެ ހާދިސާއެއް ފަދަ ނުރައްކަލެއް ކުރިމަތިވެއްޖެނަމަ، ހާލުގައިޖެހޭ އާއިލާތަކަށް ވަގުތުން އެހީތެރިކަން ފޯރުކޮށްދެވޭނެ އިންތިޒާމެއް، ކޮންމެ އަތޮޅެއްގައި ގާއިމްކޮށްދިނުމަކީ ވެސް އަޅުގަނޑުމެން ކުރަން ނިންމާފައިވާ ކަމެއް. މިކަންކަން ތަންފީޒުކުރުމުގައި މާތް ﷲގެ ވާގިފުޅާއެކު، އަޅުގަނޑުމެންނަށް ކާމިޔާބު ލިބިގެންދާނެ." ރައީސް ވިދާޅުވިއެވެ.
ރައީސް އިބްރާހީމް މުޙައްމަދު ޞާލިޙް ވަނީ ސުނާމީގައި ލިބުނު ގެއްލުންތަކުން އަރައިގަތުމަށް، ސަރުކާރާއި އަމިއްލަ ފަރާތްތަކާއި ބައިނަލްއަޤްވާމީ ޖަމްޢިއްޔާ ޖަމާޢަތްތަކުންނާއި، އެކުވެރި ޤައުމުތަކުން ވެދިން އެހީ ފާހަގަކުރައްވާ ޝުކުރު އަދާކުރައްވާފައެވެ.