އަންނަ ހޮނިހިރުދުވަހު ފަށާ ގެސްޓު ހައުސް މަހާސިންތާގެ ޝިޢާރު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް އިފްތިތާޙުކޮށްދެއްވައިފިއެވެ.
ގެސްޓު ހައުސް މަހާސިންތާގެ ޝިޢާރު ރައީސް ޞާލިޙް އިފްތިތާޙުކޮށްދެއްވީ ރައީސް އޮފީހުގައި ބޭއްވެވި ޚާއްޞަ ރަސްމިއްޔާތެއްގައެވެ. މިއަހަރުގެ ޝިއާރަކަށް ހަމަޖައްސާފައިވަނީ "ޓުވަރޑްސް ސަސްޓެއިނަބަލް ޓުއަރިޒަމް" ނުވަތަ ދެމެހެއްޓެނިވި ފަތުރުވެރިކަމަކާ ދިމާލަށް، މިޝިޢާރެވެ.
ގެސްޓް ހައުސްތަކަށް ހުރި ގޮންޖެހުންތައް ދެނެގަތުމަށްޓަކާ ބާއްވާ "ގެސްޓްހައުސްތަކުގެ މަހާސިންތާ" ފެށުމަށް ހަމަޖެހިފައިވަނީ އަންނަ ހޮނިހިރުދުވަހު، ދަރުބާރުގޭގައެވެ.
މި މަހާސިންތާގެ ތެރެއިން ގެސްޓް ހައުސް ވިޔަފާރި އިތުރަށް ފުޅާކޮށް، މިދާއިރާގައި ކުރިމަތިވާ ގޮންޖެހުންތައް ހައްލުކުރުމަށް ކުރެވިދާނެ ކަންތައްތަކާ ގުޅޭގޮތުން މަޝްވަރާކުރާނެއެވެ. އޭގެތެރޭގައި ގެސްޓްހައުސް މާކެޓްކޮށް ޕްރޮމޯޓްކުރުމާއި ގެސްޓްހައުސްތަކުން ލިބޭ އިޤްތިޞާދީ އަދި އިޖްތިމާޢީ ފައިދާއާއި، ގެސްޓްހައުސް ހިންގުމުގައި ރާއްޖޭގެ ތަރިކަ ހިމާޔަތްކުރުމާއި، ގެސްޓްހައުސް ހިންގުމުގެ ޤާނޫނީ އޮނިގަނޑަށް ގެސްޓްހައުސް ހިންގާ ފަރާތްތައް އަހުލުވެރިކުރުވުން ހިމެނޭކަމަށް ޓޫރިޒަމް މިނިސްޓްރީން ބުނެއެވެ.
މި މަހާސިންތާގައި ބައިވެރިވުމުގެ ފުރުޞަތު ޓޫރިޒަމް މިނިސްޓްރީން ވަނީ ރާއްޖޭގެ ހުރިހާ ގެސްޓް ހައުސްތަކަކަށް ހުޅުވާލާފައެވެ. ސަރުކާރުގެ އަމާޒަކީ ފަތުވެރިކަމުގެ ދާއިރާ ކުރިއެރުވުމުގައި އަތޮޅުތަކާއި، ރަށްތައް އަދި ކައުންސިލްތަކަށްވެސް ބާރުތައް ދީގެން ކުރިޔަށް ދިއުމާއި، ރާއްޖެއަކީ ހުރިހާ ބާވަތެއްގެ ފަތުރުވެރިކަންވެސް ކުރާ ޤައުމެއްގެ ގޮތުގައި ކުރިއެރުވުންކަމަށް ޓޫރިޒަމް މިނިސްޓްރީން ބުނެއެވެ.
ޤައުމީ ފެންވަރުގައި ބާއްވާ ގެސްޓް ހައުސްތަކުގެ މަހާސިންތާއަކީ ރައީސް އިބްރާހިމް މުހައްމަދު ސާލިހުގެ ސަރުކާރުގެ ތިރީސް ދުވަހުގެ ތެރޭގައި ކުރުމަށް ނިންމަން ވަޢުދުވެފައިވާ ވަޢުދުތަކުގެ ތެރެއިން ވަޢުދެކެވެ.