ހަފްތާ ބަންދާ ދިމާކޮށް ބާއްވާ ވީކެންޑް މާކެޓް "ހަފްތާރެސް" ބާއްވާނީ މުޅި މުޖުތަމަޢުގެ މަސްލަހަތަށް ބަލައި، އާންމު އިޖްތިމާއީ މިންގަނޑުން ބޭރުނުވާގޮތަށްކަމަށް ޔޫތް މިނިސްޓަރ ވިދާޅުވެއްޖެއެވެ.
"ހަފްތާރެސް" އަކީ ވީކްއެންޑް މާކެޓަކާއި، ފަންނާނުންގެ ހުނަރުތައް ދައްކާލުމުގެ ހަރަކާތްތަކާއެކު ކޮންމެ ހަފްތާ ބަންދެއްގައި ކުރިއަށްގެންދިއުމަށް ނިންމާފައިވާ ހަރަކާތެކެވެ. އެގޮތުން ހަފްތާރެސްގެ ފުރަތަމަ މާރކެޓް އަންނަ ހުކުރު ދުވަހު ބޭއްވުމަށް މިހާރު ތައްޔާރުވަމުންދާއިރު، މި ހަރަކާތުގައި މިއުޒިކާއި، މުނިފޫހިފިލުވުމުގެ ކަންކަން ހިމަނާފައިވާތީ، ބައެއް ދީނީ ޢިލްމުވެރިން އަންނަނީ ސޯޝަލް މީޑިއާގައި އެކަމުގެ ކަންބޮޑުވުން ފާޅުކުރަމުންނެވެ.
އެކަމާ ގުޅިގެން ކުރެއްވި ޓްވީޓެއްގައި މިނިސްޓަރ އޮފް ޔޫތް، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙްމަދު މަޙްލޫފް ވިދާޅުވީ، ހަފްތާރެސްއަކީ ހަފްތާ ބަންދާ ދިމާކޮށް ބާއްވާ މަގުމަތީ ބާޒާރެއްކަމަށާއި، މުޅި މި ހަރަކާތުގެ މައިގަނޑު މަޤްޞަދަކީ ޒުވާނުންނަށް ވިޔަފާރީގެ ފުރުޞަތުތައް ފަހިކޮށްދިނުންކަމަށެވެ. އަދި މި ހަރަކާތުގެ ތެރޭގައި ހިމެނޭ މުނިފޫހިފިލުވުމުގެ ބަޔާ ގުޅޭގޮތުން ދީނީ ޢިލްމުވެރިން ދެއްވާ ނަސޭހަތް ބަލައިގަންނަކަމަށާއި، މި ހަރަކާތް ކުރިއަށްދާނީ ހައްދުން ނުނެއްޓި، މުޅި މުޖުތަމަޢުގެ މަސްލަޙަތަށް ބަލައިގެންކަމަށް މިނިސްޓަރ ވިދާޅުވިއެވެ.
ކުލަގަދަ ހަރަކާތްތަކަކާއެކު "ހަފްތާރެސް" މިއަންނަ ހުކުރު ދުވަހު ފެށުމަށް ސަރުކާރުން މިހާރު އަންނަނީ ތައްޔާރުވަމުންނެވެ. އެގޮތުން ހުކުރު ދުވަހުގެ މާރކެޓުގައި 68 ސްޓޯލެއް ހުންނާނެކަމަށާއި، މި ސްޓޯލްތައް ދޫކުރުމުގައި އެންމެ ބޮޑު އިސްކަމެއްދީފައިވާނީ އަލަށް ވިޔަފާރީގެ ދާއިރާއަށް ވަންނަ ޒުވާނުންނަށާއި، ކަނބަލުންނާއި ޚާއްޞަ އެހީއަށް ބޭނުންވާ ފަރާތްތަކަށްކަމަށް ޔޫތް މިނިސްޓްރީން ބުނެއެވެ.