ރާއްޖެއިން ބޭރުގައި ދިވެހިން ކުރާ ހޭދައާ ގުޅޭގޮތުން އެމްއެމްއޭއިން ކުރާ ދިރާސާ ފަށައިފިއެވެ.
މި ދިރާސާ ފަށާފައިވަނީ މިއަދު ވެލާނާ އިންޓަނޭޝަނަލް އެއަރޕޯޓްގެ އެރައިވަލް ހޯލުގައެވެ.
އެމް.އެމް.އޭއިން ބުނީ ރާއްޖެއިން ބޭރުގައި ދިވެހި ކުރާ ހޭދައާ ގުޅޭ ދިރާސާއަކީ، ރާއްޖޭގެ ބެލެންސް އޮފް ޕޭމަންޓް ހިސާބުތައް ތައްޔާރުކުރުމަށް ބޭނުންވާ މައުލޫމާތު ހޯދުމުގެ ގޮތުން ރާއްޖެއިން ބޭރުން އަންނަ ދިވެހީންނަށް އަމާޒުކޮށްގެން ކޮންމެ އަހަރަކުވެސް ކުރަމުން އަންނަ ދިރާސާއެއްކަމަށެވެ.
ދިރާސާ ކުރިއަށްގެންދާނީ މިއަދުން ފެށިގެން އަންނަ އާދިއްތަ ދުވަހުގެ ނިޔަލަށެވެ. މި ދިރާސާގައި މައިގަނޑު ގޮތެއްގައި ނެގުމަށް ހަމަޖެހިފައިވާ މައުލޫމާތުތަކުގެ ތެރޭގައި ދިވެހީން ދަތުރުކުރާ މަންޒިލް، ދަތުރުކުރާ ބޭނުން އަދި ކުރާ ހޭދައިގެ މިންވަރު ހިމެނެއެވެ.
އެމް.އެމް.އޭއިން ބުނިގޮތުގައި ދިރާސާ ހިންގާ ދުވަސްކޮޅު އެއޮތޯރިޓީގެ މުވައްޒަފުން އެއަރޕޯޓުގެ އެރައިވަލް ހޯލުގައި ހަރަކާތްތެރިވާނެކަމަށެވެ. އަދި މި ދިރާސާ ހެދުމަށްޓަކާއި މިމުއްދަތުގެ ތެރޭގައި ރާއްޖެއިން ބޭރުން އަންނަ ދިވެހިންގެ އެއްބާރުލުން ބޭނުންވާކަމަށް އެމް.އެމް.އޭ.އިން ބުނެއެވެ.