އެއްވެސް ދައްޗަކާއި ނުލައި ކާބޯތަކެތި ލިބޭނެކަން ޔަޤީންކުރުމަށް ގިނަ މަޝްރޫޢުތަކެއް ހިންގުމަށް އެސްޓީއޯއިން ނިންމާފައިވާކަމަށް އެސްޓީއޯގެ މެނޭޖިންގ ޑިރެކްޓަރ ހުސައިން އަމްރު ވިދާޅުވެއްޖެއެވެ.
ރާއްޖޭގައި ފުރަތަމަ ފަހަރަށް ބޭއްވި "މޯލްޑިވްސް ބިޒްނަސް އެވޯޑްސް" ގައި ވާހަކަދައްކަވަމުން އަމްރު ވިދާޅުވީ، ދިވެހިންގެ ދިރިއުޅުމުގެ ހުރިހާކަމެއް ބަރޯސާވެފައިއޮތީ ބޭރު ޤައުމުތަކުން އިމްޕޯޓްކުރާ މުދަލަށްކަމަށްވާއިރު، އަމިއްލަ ފުދުންތެރިކަން އިތުރުކުރުމަށް ގިނަ މަސައްކަތްތަކެއް ކުރަން ޖެހިފައިވާކަމަށެވެ. މިގޮތުން ރާއްޖޭގައި ގޮވާމުގެ ބާވަތްތައް ހެދޭނެ ގޮތްތައް ބަލާ، އިތުރު ބާވަތްތައް އުފެއްދުމުގެ މުހިއްމުކަން އަމްރު ފާހަގަކުރެއްވިއެވެ.
"ސެލްފް ސަސްޓެއިނަބިލިޓީއަކީ މުޅި ޤައުމުގެ ތަރައްޤީގެ ލަނޑުދަނޑިކަމުގައި އަޅުގަނޑުމެން ހަދަން އެބަޖެހޭ. މިމަސައްކަތަށް އެއްބާރުލުން ދިނުމުގެ ގޮތުން އެސްޓީއޯއިން އިސްނަގައިގެން ކުރިއަށްއޮތް މުސްތަޤްބަލުގައި ރާއްޖޭގައި ފުޑް ސެކިއުރިޓީ ޔަޤީންކުރުމުގެ މަޝްރޫޢުތަށް ކުރިއަށްގެންދާނެ ވާހަކަ އުފަލާއިއެކު ފާހަގަކުރަން." ހުސައިން އަމްރު ވިދާޅުވިއެވެ.
އަމްރު ވިދާޅުވީ ދެމެހެއްޓެނިވި ތަރައްގީއާއި ތިމާވެއްޓާއި މޫސުމަށް އަންނަ ބަދަލުތަކަށް ބެލިކަމުގައި ވިޔަސް ރާއްޖޭގައި ތެލަށް ބަރޯސާވާ މިންވަރަކީ ކަންބޮޑުވާންޖެހޭ ކަމެކެވެ. އެގޮތުން ރާއްޖޭގައި ތެލަށް ބަރޯސާވާ މިންވަރު ދަށްކުރުމުގެ ގޮތުން އިއާދަކުރަނިވި ހަކަތައަށް އިންވެސްޓްކުރުމަކީ އެސްޓީއޯގެ އަމާޒެއްކަމަށެވެ.
އަމްރުގެ ވާހަކަފުޅުގައި ރާއްޖޭގައި ކާޑުގެ ބާވަތްތައް ހުންނަނީ 2 މަސްދުވަހަށް ބޭނުންވާ މިންވަރަށްކަމަށާއި، ގުދުރަތީ ކާރިސާއެއް ކުރިމަތިވެއްޖެނަމަ އެކަމުގެ ސަބަބުން ދަތިތަކެއް ކުރިމަތިވާނޭކަން ފާހަގަކުރެއްވިއެވެ.