މޯލްޑިވްސް ބޯޓިން އެވޯޑް އަންނަ އާދިއްތަ ދުވަހުގެރޭ ބޭއްވުމަށް ހަމަޖައްސައިފިއެވެ.
މި އެވޯޑް އިންތިޒާމްކުރާ ލިވަބޯޑް އެސޯސިއޭޝަން އޮފް މޯލްޑިވްސްއިން ބުނީ އެވޯޑް ހަފްލާ އޮންނާނީ ދަރުބާރުގޭ ފާށަނާ މާލަމުގައިކަމަށެވެ. މޯލްޑިވްސް ބޯޓިންގ އެވޯޑަކީ، ފަތުރުވެރިކަމުގެ ސިނާއަތުގައި ހަރަކާތްތެރިވާ ލިވްއަބޯޑްތައް ނުވަތަ ސަފާރީއާއި ޔޮޓްފަދަ އުޅަނދުތަކަށް ޚާއްސަކޮށް ދެވޭ އެވޯޑެކެވެ.
އެވޯޑަށް ހޮވޭ ފަރާތްތައް ކަނޑައަޅާނީ ޖަޖުންގެ މާރކްސްއާއި އޮންލައިން ވޯޓިން އަދި އެސް.އެމް.އެސްއިން ލިބޭ މާކްސްއަށް ބަލައިގެންކަމަށް ލިވަބޯޑް އެސޯސިއޭޝަނުން ބުނެއެވެ.
މޯލްޑިވްސް ބޯޓިން އެވޯޑްސް 2018 އަށް ނަން ހުށައެޅުމުގެ ފުރުސަތު ބަންދުވިއިރު އެވޯޑަށް ގިނަ އަދަދެއްގެ ފަރާތްތަކުން ކުރިމަތިލާފައިވާކަމަށް ލިވަބޯޑް އެސޯސިއޭޝަން އޮފް މޯލްޑިވްސްއިން ބުނެއެވެ. އެވޯޑް ހަފްލާގައި 26 ދާއިރާއަކުން އެވޯޑް ދޭނެއެވެ.
މިދިޔަ އަހަރުގެ ބޯޓިން އެވޯޑް 25 ކެޓެގަރީއަކުން 21 ފަރާތަކަށް ވަނީ ދީފައެވެ. މިއީ ބޯޓިން އެވޯޑް ބާއްވާ 4 ވަނަ އަހަރުއެވެ.