އިސްލާމިކް މިނިސްޓްރީގެ 2017 ވަނަ އަހަރުގެ އޮޑިޓް ރިޕޯޓާ ގުޅޭގޮތުން ކުރީގެ އިސްލާމިކް މިނިސްޓަރާއި ހަވާލާދީ ޗެނަލް 13 އިން އާއްމުކޮށްފައިވަނީ ޞައްޙަ މަޢޫލޫމާތުތަކެއް ނޫންކަމަށް އިސްލާމިކް މިނިސްޓްރީން ބުނެފިއެވެ.
އެ މިނިސްޓްރީން މިހެން ބުނެފައިވަނީ އެ މިނިސްޓްރީގެ 2017 ވަނަ އަހަރުގެ އޮޑިޓް ރިޕޯޓުގައި ހިމަނާފައިވަނީ ޞައްޙަ މަޢުލޫމާތު ނޫންކަމަށް ދެއްކުމުގެ ގޮތުން އެ މިނިސްޓްރީގެ ކުރީގެ އިސްވެރިޔަކާ ހަވާލާދީ ޗެނަލް 13 އިން ޚަބަރެއް ލިޔެފައިވާކަމަށްބުނެ އެކަން ކުށްވެރިކޮށް، އާއްމުކޮށްފައިވާ ނޫސްބަޔާނެއްގައެވެ.
މި ބަޔާނުގައި ޗެނަލް 13 އިން ލިޔުނު ޚަބަރުގައި ހިމަނާފައިވާ މަޢުލޫމާތަކީ އޮޑިޓަރ ޖެނެރަލް އޮފީހާމެދު ޢާންމުންގެ އިތުބާރު ގެއްލޭގޮތަށް، ޘާބިތުނުހިފޭ ދޮގު މަޢުލޫމާތުގެ މައްޗަށް ބިނާކޮށް، ކަމާގުޅުން ހުރި އެއްވެސް އޮފީހެއްގެ ބަހެއްނެތި ވަރަށް ޒިންމާދާރުކަން ކުޑަގޮތަކަށް ލިޔެފައިވާ ޚަބަރެއްކަމަށް ބުނެފައިވެއެވެ. އެގޮތުން އިސްލާމިކް މިނިސްޓްރީގެ ވަގުފް ޢިމާރާތް "ދާރުލް އީމާން"އަށް އޯޝަން ބަރަކާ ޕްރައިވެޓް ލިމިޓެޑުން ދައްކަންޖެހޭ ކުލި ބަރާބަރަށް އެގްރީމެންޓާ އެއްގޮތަށް ދައްކަމުން އައިކަމަށް ކުރީގެ އިސްލާމިކް މިނިސްޓަރާއި ޙަވާލާދީ ޗެނަލް 13 އިން ޚަބަރު ލިޔެފައިވަނީ އެކަމުގެ ހަޤީޤަތް ބެލުމެއްނެތި އަދި އޮޑިޓް އޮފީހުގެ ރިޕޯޓަށްވެސް އިޙުތިރާމުކުރުމެއްނެތިކަމަށް އެ ބަޔާނުގައި ބުނެފައިވެއެވެ.
އިސްލާމިކް މިނިސްޓްރީން ބުނީ 2017 ވަނަ އަހަރުގެ އޮޑިޓް ފެށުމާއި ގުޅިގެން "ދާރުލް އީމާން" އާ ގުޅުންހުރި ލިޔުންތައް "ބެކް ޑޭޓަށް" ތައްޔާރުކޮށް ފައިނޭންސް ޔުނިޓަށާއި ކަމާގުޅުންހުރި ސެކްޝަންތަކަށް ފެބްރުއަރީ 2018 ގައި ފޮނުވާފައިވާކަމަށާއި، އެ ހިސާބުން ފެށިގެން ދަޢުލަތުގެ މާލިއްޔަތު ޤަވާއިދާ އެއްގޮތްވާގޮތުގެ މަތިން އަޅަންޖެހޭ ފިޔަވަޅުތައް އަޅާފައިވާނެކަމަށެވެ. އަދި 2017 ވަނަ އަހަރުގެ ޖެނުއަރީ އިން ފެށިގެން މިއަހަރުގެ މަރޗް މަހާ ހަމައަށް އޯޝަން ބަރަކާ ޕްރައިވެޓް ލިމިޓެޑުން ނުދައްކާ ވާ ފައިސާ މިއަހަރުގެ އޭޕްރީލް މަހު ހޯދިފައިވާކަމަށެވެ. މީގެއިތުރުން އެގްރީމެންޓާ އެއްގޮތަށް މިއަހަރުގެ އޭޕްރީލް މަހުގެ ކުލި ނުދައްކާ އޮތުމުން މާލިއްޔަތު ޤަވާއިދުގައި ޢަމަލުކުރުމަށް ކަނޑައަޅާފައިވާ ކަންކަން ފުރިހަމަ ކުރުމަށްފަހުވެސް ފައިސާ ނުލިބިވާތީ، އެ މައްސަލަ ޝަރީޢަތަށް ފޮނުވުމަށް ލީގަލް ސެކްޝަނަށް ފޮނުވުމުން އެކުންފުންޏާއެކު ހަދާފައިވާ އެގްރީމަންޓް ބާޠިލްކުރުމަށް އެ ސެކްޝަނުން ނިންމާފައިވާކަމަށްވެސް އިސްލާމިކް މިނިސްޓްރީން ބުނެއެވެ.
ނަމަވެސް ސަރުކާރު ބަދަލުވުމާހަމައަށް އެގްރިމަންޓް ބާޠިލުކުރުމާމެދު ގޮތެއް ނިންމާފައިނުވިނަމަވެސް، މިހާރު އެ އެގްރީމަންޓް ބާޠިލުކުރުމުގެ މަސައްކަތް ކުރަމުންދާކަމަށާއި، މިއަހަރުގެ އޭޕްރީލް މަހުން ފެށިގެން މިހާތަނަށް އޯޝަން ބަރަކާއިން އެ މިނިސްޓްރީއަށް ލިބެންޖެހޭ ކުލި ލިބިފައި ނުވާކަމަށްވެސް އިސްލާމިކް މިނިސްޓްރީން ނެރެފައިވާ ބަޔާނުގައި ބުނެފައިވެއެވެ.
މީގެ އިތުރުން ކީރިތި ޤުރުއާނާބެހޭ މަރުކަޒުގެ ދާއިމީ މުވައްޒަފުންނަށްވުރެ ބޮޑު މުސާރައެއް، ބޭރު ޓީޗަރުންނަށް ޒަކާތު ފަންޑުން ޚަރަދުކޮށްގެން ދެމުން ދާކަމަށް، ޗެނަލް 13 ގެ ޚަބަރުގައި ލިޔެފައިވާ ކަމަށްބުނެ އިސްލާމިކް މިނިސްޓްރީންވަނީ އެކަންވެސް ދޮގުކޮށްފައެވެ. އެގޮތުން އޮޑިޓް ރިޕޯޓުގައި ފާހަގަކޮށްފައިވަނީ ލެކްޗަރަރއިންގެ ގޮތުގައި ތިބޭ މުވައްޒަފުންގެ ވާހަކަ ނޫންކަމަށާއި، އެ މުވައްޒަފުންނަކީ އެކިއެކި އިދާރީ މަސައްކަތްކުރުމަށް ވޭޖް އުސޫލުން ނަގާފައިވާ އިދާރީ 8 މުވައްޒަފުން ކަމަށްވެސް އެ މިނިސްޓްރީން ބުނެއެވެ.
އިސްލާމިކް މިނިސްޓްރީން ބުނީ އޮޑިޓް ރިޕޯޓުގައި ފާހަގަކޮށްފައިވާ ކަންތައްތަކާ ގުޅިގެން ޖަވާބުދާރީވާންޖެހޭ ފަރާތްތަކަށް ޖަވާބުދާރީވެ، އަޅަންޖެހޭ ފިޔަވަޅު އަޅާ، އިސްލާޙުކުރަންޖެހޭ ކަންކަން އިސްލާޙުކުރުމުގެ މަސައްކަތް ކުރަމުންދާކަމަށެވެ. އެހެންކަމުން މިފަދަ ޞައްޙަނޫން ޚަބަރުތަކަކީ އިސްލާމިކް މިނިސްޓްރީއާއި، އޮޑިޓް އޮފީސް ފަދަ ސަރުކާރުގެ މުއައްސަސާތަކަށް ރައްޔިތުން ކުރާ އިތުބާރު ކުޑަވާނެފަދަ ޚަބަރަކަށްވާތީ، މިފަދަ ޚަބަރުތައް މީޑިއާގައި ޝާއިޢުކުރުމުގެ ކުރިން ކަމާގުޅޭ މުއައްސަސާތަކުން އެމަޢުލޫމާތު ސާފުކުރުމަށްފަހު ނޫނީ، މީޑިއާގައި ޝާއިޢުނުކުރުމަށްވެސް އެ މިނިސްޓްރީން ވަނީ އިލްތިމާސްކޮށްފައެވެ.