ކޮންމެ ހަފްތާ ބަންދެއްގައި "ހަފްތާރެސް" ގެ ނަމުގައި ވީކްއެންޑް މާރކެޓެއް ބޭއްވުމަށް ނިންމާފައިވާކަމަށް ޔޫތް މިނިސްޓަރ އަޙްމަދު މަޚްލޫފް ވިދާޅުވެއްޖެއެވެ.
މިނިސްޓަރ އޮފް ޔޫތް، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙްމަދު މަޚްލޫފު ވިދާޅުވީ، "ހަފްތާރެސް" ކުރިއަށްދާނީ މުނިފޫހި ފިލުވުމާއި، ޒުވާނުންނަށް ބޭނުންވާ އެކި ކަހަލަ މަޢުލޫމާތު ލިބޭ ސްޓޯލްތަކުގެ އިތުރުން ވިޔަފާރި ސްޓޯލްތައްވެސް ހިމެނޭހެންކަމަށެވެ. އަދި މި ހަރަކާތް ކުރިއަށްގެންދިއުމަށް ނިންމާފައިވަނީ ކޮންމެ ހުކުރު އަދި ހޮނިހިރު ދުވަހެއްގެ ހަވީރު 4 އިން ފެށިގެން ރޭގަނޑު 12 ޖެހުމާ ހަމައަށްކަމަށް މިނިސްޓަރ ވިދާޅުވިއެވެ. ހަފްތާރެސްއަކީ ދިވެހިންގެ މެދުގައި އޮތް އެއްބައިވަންތަކަން އިތުރުކުރުމުގެ މަޤްޞަދުގައި ފެށުމަށް ނިންމާފައިވާ ހަރަކާތެއްކަމަށް ޔޫތް މިނިސްޓަރ ވިދާޅުވިއެވެ. ނަމަވެސް މި ހަރަކާތް ފަށާނެ ވަކި ތާރީޚެއް މިނިސްޓަރ ހާމަކުރައްވާފައެއް ނުވެއެވެ.
"ވީކެންޑް މާރކެޓެއްގެ ގޮތުގައި ކޮންމެ ހަފްތާ ބަންދެއްގައިވެސް މި ހަރަކާތްކުރިއަށްގެންދިއުމަށް ރާވާފައިވަނީ. ކޮންމެ ރެއަކުވެސް މިއުޒިކް ޝޯވއެއް އޮންނާނެ. ރާއްޖޭގައި ތިބި އެންމެ ފުންނާބު އުސް ފަންނާނުގެ ހުށަހެޅުންތައް ފެނިގެންދާނެ. އަދި ޒުވާނުންގެ ތެރެއިން އަލަށް މިކަންކަމަށް ނުކުންނަށް ފަރާތްތަކަށްވެސް ފުރުޞަތު ހޯދައިދޭނަން. އުއްމީދަކީ ގިނަ އަދަދެއްގެ ސްޓޯލްތަކެއް ބެހެއްޓުން. މިއީ ޒުވާނުން ބާރުވެރިކުރުވާ، އަލަށް ވިޔަފާރިއަށް ވަންނަން ބޭނުންވާ ފަރާތްތަކަށް އެހީތެރިކަން ފޯރުކޮށްދިނުމުގެ ބޭނުމުގައި ބާއްވާ ހަރަކާތެއް." ޔޫތް މިނިސްޓަރ އަޙްމަދު މަޚްލޫފް ވިދާޅުވިއެވެ.
"ހަފްތާރެސް" ހަރަކާތުގެ ތެރެއިން ޒުވާން ފަންނާނުންނަށް އެމީހުންގެ ފަންނު ކުރިއަރުވައި ހުނަރު ދައްކާލުމުގެ ފުރުޞަތު ލިބިގެންދާއިރު، ވިޔަފާރީގެ ދާއިރާގައި ހަރަކާތްތެރިވާ ޒުވާނުންނާއި، އެ ދާއިރާއަށް އަލަށް ވަންނަން ބޭނުންވާ ޒުވާނުންނަށް އެމީހުންގެ ވިޔަފާރި ކުރިއެރުވުމުގެ ފުރުޞަތު ލިބިގެންދާނެކަމަށް ޔޫތް މިނިސްޓަރ އަޙްމަދު މަޚްލޫފު ވިދާޅުވިއެވެ. އަދި ތަފާތު އުފެއްދުންތައް އުފައްދާ ފަރާތްތަކަށް އެމީހުންގެ އުފެއްދުންތައް މާކެޓް ކުރުމުގެ އިތުރުން، އެކި ރޮނގުރޮނގުން ފާހަގަކޮށްލެވޭ ޒުވާނުންނަށް އެމީހުންގެ ހުނަރު ދައްކާލުމުގެ ފުރުޞަތުވެސް ލިބިގެންދާނެކަމަށް މިނިސްޓަރ ވިދާޅުވިއެވެ.