ރާއްޖޭގެ ތިމާވެއްޓާ ގުޅުންހުރި މަޢުލޫމާތު ވަޒީރުންނަށް މިއަދު އަރުވައިފިއެވެ.
މިއީ ސަރުކާރުގެ ފުރަތަމަ 100 ދުވަހުގެ ތެރޭގައި ފުއްދުމަށް ކަނޑައަޅާފައިވާ ވަޢުދުތަކުގެ ތެރޭގައި ހިމެނޭ މުހިއްމުކަމެކެވެ.
މިނިސްޓްރީ އޮފް އެންވަޔަރަންމަންޓުން އިސްނަންގަވައިގެން ކުރިއަށް ގެންދިޔަ މި ސެޝަނަކީ ހުރިހާ އިންތިޚާބީ އަދި އައްޔަނު ކުރެވޭ މަޤާމުތަކަށް ވަޑައިގަންނަވާ ފަރާތްތަކަށް އަމާޒުކޮށްގެން، ސަރުކާރުގެ ފުރަތަމަ 100 ދުވަހުގެ ތެރޭގައި ފުއްދުމަށް ކަނޑައަޅާފައިވާ ވަޢުދުތަކުގެ ތެރޭގައި ހިމެނޭ ތިމާވެށި ރައްކާތެރި ކުރުމާ ގުޅޭ ޕްރޮގްރާމްތައް ހިންގުމުގެ ވައުދާ ގުޅިގެން ކުރިއަށް ގެންދެވި ސެޝަނެކެވެ.
ރައީސުލްޖުމްހޫރިއްޔާގެ އޮފީހުގައި އޮތް މި ސެޝަންގައި، ދައުލަތުގެ ވަޒީރުންގެ އިތުރުން ރައީސުލްޖުމްހޫރިއްޔާގެ އޮފީހުގެ އެންމެ އިސް މަޤާމުތަކަށް ރައީސުލްޖުމްހޫރިއްޔާ އައްޔަނު ކުރައްވާފައިވާ ބޭފުޅުންވެސް ބައިވެރިވެވަޑައިގެންނެވިއެވެ.
މިބައްދަލުކުރެއްވުމުގައި، ރާއްޖޭގެ ތިމާވެށީގެ މިހާރުގެ ހާލަތާއި، ރާއްޖޭގެ ތިމާވެށީގައި ހިއްސާވާ އެކިއެކި ދިރުންތަކާއި، ހިމާޔަތްކޮށްފައިވާ ސަރަހައްދުތަކާއި ދިރުންތަކާއި، ތިމާވެއްޓަށް ކުރިމަތިވާ ނުރައްކަލާއި، އެކަންކަމުގެ ސަބަބުން ކުރާ ނޭދެވޭ އަސަރާ ބެހޭ މަޢުލޫމާތު ހިއްސާ ކުރައްވާފައިވެއެވެ.