ރާއްޖޭގައި ކުށަށް އަރައިގަންނަ ޒުވާނުންގެ އަދަދު މަދުކޮށް، މާރާމާރީތައް ހުއްޓުވުމަށްޓަކާ ގޭންގުތަކާ ވާހަކަދެއްކުމަށް ތައްޔާރަށް ހުންނެވިކަމަށް މިނިސްޓަރ އޮފް ޔޫތް، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙްމަދު މަޙްލޫފު ވިދާޅުވެއްޖެއެވެ.
ޔޫތް މިނިސްޓްރީގެ މަސައްކަތްތަކާއި ގުޅޭގޮތުން ނޫސްވެރިންނަށް މަޢުލޫމާތުދެއްވަމުން، މިނިސްޓަރ މަޙްލޫފު ވިދާޅުވީ، ކުޅިވަރުގެ ދާއިރާ ތަރައްޤީކުރުމާއި އެއްވަރަށް ޒުވާނުން ބާރުވެރިކުރުވުމަކީވެސް ސަރުކާރުގެ އަމާޒެއްކަމަށެވެ. އަދި ކިތަންމެ ޤަބޫލުކުރަން ދަތިވިނަމަވެސް، ރާއްޖޭގައި ގޭންގްތައް ހަރަކާތްތެރިވަމުންދާކަމީ ޤަބޫލުކުރަންޖެހޭ ހަޤީޤަތެއްކަމަށާއި، ޒުވާނުން ކުށްކުރާ ރޭޓް ރާއްޖޭގައި ކަންބޮޑުވާ މިންވަރަކަށް އިތުރުވެފައިވާކަމަށެވެ.
މިނިސްޓަރ މަޙްލޫފު ވިދާޅުވީ، ގޭންގް މާރާމާރީތަކަށް ހައްލެއް ގެނެއުމަށްޓަކާ، ރާއްޖޭގައި ޙަރަކާތްތެރިވާ ގޭންގްތަކާއި ވާހަކަދެއްކުމަށް އެމަނިކުފާނު ތައްޔާރަށް ހުންނެވިކަމަށާއި، އެ ފުރުޞަތު އާއްމުކޮށް ހުޅުވާލާކަމަށެވެ. އަދި ކުށްކުރާ ޒުވާނުން ހެޔޮމަގަށް އަޅުވާ، މުޖުތަމަޢުއަށް ބޭނުންހިފޭ ބަޔަކަށް ހެދުމުގެ މަސައްކަތަކީ މި ސަރުކާރުން އަޅާނުލާ ދޫކޮށްލާނެކަމެއް ނޫންކަމަށެވެ.
"ރާއްޖޭގައި ގޭންގްތައް ހަރަކާތްތެރިވާކަމީ ހަޤީގަތެއް.. އަޅުގަނޑުމެން މިއަދު އެބަޖެހޭ މިކަން ޤަބޫލުކުރަން.. އަޅުގަނޑުމެން މިއުޅެނީ މި މައްސަލަ ހައްލުކުރަން.. މިކަން ހައްލުކުރުމުގައި ވާހަކަދައްކަންޏާ އަޅުގަނޑުމިހުރީ ގޭންގުތަކާއި ވާހަކަދައްކަން ތައްޔާރަށް.. ސިއްރުސިއްރުން މިކަމުގައި އުޅޭކަށް އަޅުގަނޑު ބޭނުމެއް ނޫން.. ރައްޔިތުންނަށްވެސް އަންގަން އަޅުގަނޑު ބޭނުން ރައްޔިތުން ގެ މިހާބޮޑު ކަންބޮޑުވުމެއް އޮތްކަމެއްވީމަ އަޅުގަނޑު މިހުރީ ތައްޔާރަށް ގޭންގުތަކާ އެކީގައި ވާހަކަދައްކާ ހައްލެއް ހޯދަން.." މިނިސްޓަރ ވިދާޅުވިއެވެ.
ޔޫތް މިނިސްޓަރ މަޙްލޫފު ވިދާޅުވީ ރާއްޖޭގައި ގޭންގް މާރާމާރީތައް ހުއްޓުވުމަށްޓަކާ ކުރެވިދާނެ މަސައްކަތްތަކާއި ގުޅޭގޮތުން މިހާރުވެސް ކަމާބެހޭ ފަރާތްތަކާއި މަޝްވަރާކޮށް، ޚިޔާލު ހޯދަމުންދާކަމަށެވެ. އެގޮތުން ދާދިފަހުން ހޯމް މިނިސްޓަރާއި ކޮމިޝަނަރ އޮފް ޕޮލިސްއާއި ބައްދަލުކުރައްވާ، މިކަމާގުޅޭ މަޝްވަރާތައް ކުރައްވާފައިވާކަމަށާއި، މިކަމުގައި ރާއްޖޭން ބޭރުގެ ކަމާބެހޭ ފަރާތްތަކުގެ އެހީތެރިކަންވެސް ހޯއްދަވާނެކަމަށް މިނިސްޓަރ ވިދާޅުވިއެވެ.
"މިދިޔަ 5 އަހަރުގެ ތެރޭގައި 35 މަރު ގޭންގް މާރާމާރީތަކުގެ ތެރެއިން ވަނީ ގޮސްފައި.. އެހެންވީމަ ސިއްރުންނެއް ނޫން، ވަރަށް ފާޅުގައި އަޅުގަނޑުމެން މިތިބީ މިކަން ހުއްޓުވަން.. މިކަމުގައި ބޭރުގެ ޤައުމުތަކާއި، ޖަމިއްޔާތަކުގެ އެހީތެރިކަންވެސް ހޯދާނަން.. އެބޭފުޅުންގެ ކޮންސަލްޓޭޝަނާއެކީގައި އަޅުގަނޑުމެން މިކަމުގައި ކުރިއަށްދާނީ.." މިނިސްޓަރ ވިދާޅުވިއެވެ.
ރާއްޖޭގެ އާބާދީގެ 75 އިންސައްތައަކީ 35 އަހަރުން ދަށުގެ ޒުވާނުންކަން ފާހަގަކުރައްވާ، ޔޫތް މިނިސްޓަރ މަޙްލޫފު ވިދާޅުވީ، ޒުވާނުން ކުށުގެ ވެށިން ދުރުކޮށް، އެމީހުންނަކީ ޤައުމަށް ބޭނުންތެރި ބަޔަކަށް ރައީސް ޞާލިޙުގެ ސަރުކާރުން ހައްދަވާނެކަމަށެވެ. އަދި ޒުވާނުނަށް ވަޒީފާގެ ފުރުޞަތުތައް ފަހިކޮށްދީ، ކުރިއަށްދެވޭނެ މަގު މި ސަރުކާރުން ކޮށްޓަވައިދެއްވާނެކަމަށްވެސް މިނިސްޓަރ މަޙްލޫފު ވިދާޅުވިއެވެ.