ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު، ކ. ގިރިފުށީ ޓްރެއިނިންގ ސެންޓަރަށް ޒިޔާރަތްކުރައްވާ، އެތަނުގައި ކުރިއަށްދާ 20 ވަނަ ޤައުމީ ކެޑޭޓް ކޭމްޕުގެ ޙަރަކާތްތައް ބައްލަވައިލައްވައިފިއެވެ.
ދިވެހިރާއްޖޭގެ ޤައުމީ ދިފާއީ ބާރުން ކ. ގިރިފުށީ ޓްރެއިނިންގ ސެންޓަރުގައި ކުރިއަށްގެންދާ "20 ވަނަ ޤައުމީ ކެޑޭޓް ކޭމްޕް"ގެ ޙަރަކާތްތައް ބައްލަވާލެއްވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ކ. ގިރިފުށްޓަށް ވަޑައިގަތުމުން އެމަނިކުފާނަށް މަރުޙަބާ ދެންނެވީ ޑިފެންސް މިނިސްޓަރ އަލްއުސްތާޛާ މާރިޔާ އަޙްމަދު ދީދީއާއި ޗީފް އޮފް ޑިފެންސް ފޯސް މޭޖަރ ޖެނެރަލް އަޙްމަދު ޝިޔާމްގެ އިތުރުން، ޤައުމީ ދިފާޢީ ބާރުގެ އިސްވެރިންނާއި، ޤައުމީ ކެޑޭޓް ކޯރގެ އިސް ފަރާތްތަކެވެ.
ޤައުމީ ކެޑޭޓް ކޭމްޕަކީ އެމް.އެން.ޑީ.އެފްގެ ފަރާތުން ދިވެހިރާއްޖޭގެ ޤައުމީ ކެޑޭޓް ކޯރގައި ހިމެނޭ ސްކޫލް ކެޑޭޓް ކޯރތަކުން ހޮވާލެވޭ ކެޑޭޓުންނާއި ބޭންޑް ކެޑޭޓުންނަށް އަމާޒުކޮށްގެން 1992 ވަނަ އަހަރުން ފެށިގެން ކުރިގެންދާ ކޭމްޕެކެވެ.
ރައީސް ޞާލިޙު ގިރިފުށްޓަށް ކުރެއްވި މި ދަތުރުފުޅުގައި އެންމެ ފުރަތަމަ ވަޑައިގަތީ އެމް.އެން.ޑީ.އެފްގެ ނޮން ކޮމިޝަންޑް އޮފިސަރސް އެކެޑަމީއަށެވެ. މިދަތުރުފުޅުގައި ބައިވެރިވެވަޑައިގެންނެވި އިއްޒަތްތެރިންނަށް އެމް.އެން.ޑީ.އެފްގެ ފަރާތުން ވަނީ ޤައުމީ ކެޑޭޓް ކޭމްޕާ ގުޅޭގޮތުން ޙާއްސަ ބްރީފިންގއެއް އަރުވާފައެވެ. އަދި މެހެމާނުން ސޮއިކުރައްވާ ފޮތުގައި ރައީސުލްޖުމްހޫރިއްޔާ ސޮއިކުރެއްވިއެވެ.
އެއަށްފަހު ރައީސް ޞާލިޙު ވަނީ މި ކޭމްޕުގެ ތެރެއިން ކުރިއަށްގެންދާ ތަފާތު ކްލާސްތައް ކުރިއަށްދާގޮތް ބައްލަވާލައްވާފައެވެ.
27 ނޮވެމްބަރ 2018 އިން ފެށިގެން 8 ޑިސެމްބަރު 2018 ގެ ނިޔަލަށް ކުރިއަށްގެންދާ މި ކޭމްޕުގައި މާލޭގެ 13 ސްކޫލަކާއި، އެކި ރަށްރަށުން 14 ސްކޫލެއްގެ ދަރިވަރުން ހިމެނޭހެން ޖުމްލަ 120 ދަރިވަރުން ބައިވެރިވެއެވެ. މީގެ ތެރޭގައި 90 ފިރިހެން އަދި 30 އަންހެން ދަރިވަރުން ހިމެނެއެވެ. މީގެ އިތުރުން، ޔޫތް އެކްސްޗޭންޖް ޕްރޮގްރާމްގެ ދަށުން ސާރކް ސަރަޙައްދުގެ 4 ޤައުމެއްގެ 16 ކެޑޭޓުންނާއި 5 އޮފިސަރުންވެސް މިފަހަރުގެ ކޭމްޕުގައި ބައިވެރިވެއެވެ.
މިއީ ކޮންމެ ކެޑޭޓަކީވެސް މުޖުތަމަޢުއަށް ފައިދާހުރި އަދި ދިމާވާ އެކިއެކި ޙާދިސާތަކުގައި ރޭވުންތެރިކަމާއެކު އެހީތެރިކަން ފޯރުކޮށްދިނުމުގެ ޤާބިލުކަން ހުރި ޒިންމާދާރު ރައްޔިތަކަށް ހެދުމުގެ މަޤްޞަދުގައި ކުރިއަށްގެންދާ ކޭމްޕެކެވެ. އަދި ކެޑޭޓުންގެ މެދުގައި ދީނީ އަދި އަޙުލާޤީ ރޫޙު އާލާކޮށް، އެކުވެރިކަމާއި އެއްބައިވަންތަކަން ޢާލާކުރުމަކީވެސް މިފަދަ ކޭމްޕެއް ބޭއްވުމުގެ މަޤްޞަދެއްކަމަށް އެމް.އެން.ޑީ.އެފުން ބުނެއެވެ.
މި ކޭމްޕުގެ ތެރެއިން އަޙުލާޤީ ރިވެތި ސުލޫކާއި، ފަސްޓް އެއިޑާއި، އަސްކަރީ ބައެއް ހުނަރުތަކުގެ އިތުރުން ދިވެހި އަސްކަރިއްޔާގެ ވެއްޓެއްގައި ނަފްސު ތަރުބިއްޔަތު ކުރުމުގެ ފުރުޞަތު ކެޑޭޓުންނަށް ފަހިކޮށްދެވޭނެއެވެ. އެގޮތުން ތަފާތު 3 ދާއިރާއަކުން ގެސްޓް ލެކްޗަރއާއި، 11 މާއްދާއެއްގެ ކިޔަވައިދިނުމުގެ އިތުރުން އަމަލީ ތަޖުރިބާގެ ފުރުޞަތާއި، ވާދަވެރިކަމުގެ 3 މުބާރާތް ބޭއްވުމަށްވެސް ހަމަޖެހިފައިވެއެވެ. އަދި މުޅި ކޭމްޕުގެ އެންމެ މޮޅު އަންހެން ކެޑޭޓާއި، އެންމެ މޮޅު ފިރިހެން ކެޑޭޓުގެ އިތުރުން، ކިޔަވައިދެވުނު އެކެޑަމިކް މާއްދާތަކުން އެންމެ މޮޅު ދަރިވަރާއި، އެންމެ މޮޅު ޕްލެޓޫން އަދި ކޭމްޕުގެ އެންމެ މޮޅު 10 ދަރިވަރުން ހޮވާނެއެވެ.
ރައީސް ޞާލިޙު، 20 ވަނަ ޤައުމީ ކެޑޭޓް ކޭމްޕުގެ ޙަރަކާތްތައް ބައްލަވައިލެއްވުމަށް ގިރިފުށީ ޓްރެއިނިންގ ސެންޓަރަށް ކުރެއްވި މި ޒިޔާރަތުގައި، އެމަނިކުފާނުގެ އަރިހުގައި ކެބިނެޓުގެ ބައެއް ވަޒީރުންވެސް ބައިވެރިވެވަޑައިގަތެވެ.