ރާއްޖޭގެ ބަޖެޓްގެ ދަތިކަން ހައްލުކުރުމަށް 250އާއި 300 މިލިއަން ޑޮލަރާ ދެމެދުގެ ބޭރުގެ އެހީ މިހާރުންމިހާރަށް ބޭނުންވާކަމަށް ފޮރިންގ މިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ.
އެމަނިކުފާނު މިހެން ވިދަޅުވީ، މިހާރު އިންޑިއާއަށް ކުރައްވަމުންގެންދަވާ ރަސްމީ ދަތުރުފުޅުގައި އިންޑިއާގެ ނޫހެއްކަމަށްވާ، ސްޓްރަޓެޖިކް ނިއުސް އިންޓަރނޭޝަނަލަށް ދެއްވި އިންޓަރވިއުއެއްގައެވެ.
ފޮރިންގ މިނިސްޓަރ ވިދާޅުވީ، ބަޖެޓްގައި ތާށިކަމެއް އުޅޭކަމަށާއި، އެހެންކަމުން 250އާއި 300 މިލިއަން ޑޮލަރާ ދެމެދުގެ އެހީއެއް ބޭނުންވަނީ ރަށްރަށުގެ ރައްޔިތުންނަށް ބޭނުންވާ ވަސީލަތްތައް ފޯރުކޮށްދިނުމަށް ހުރި ދަތިކަން ހައްލުކުރުމަށްކަމަށެވެ. މިކަމާ ގުޅޭގޮތުން އިންޑިއާގެ ބޮޑުވަޒީރު ނަރެންދުރަ މޯދީ، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ހުވާކުރެއްވުމުގެ ރަސްމިއްޔާތުގައި ބައިވެރިވެވަޑައިގަތުމަށް ރާއްޖެއަށް ކުރެއްވި ދަތުރުފުޅުގައިވެސް އެވާހަކަ ހިއްސާކުރައްވާފައިވާނެކަމަށާއި، އިންޑިއާއި އެހީތެރިކަން ލިބޭނެކަމަށް އުއްމީދުކުރައްވާކަމަށެވެ.
ފޮރިންގ މިނިސްޓަރގެ ވާހަކަފުޅުގައި، އިންޑިއާ، ސައުދިއަރަބިޔާ، ޔޫއޭއީ، އަދި ޗައިނާފަދަ ޤައުމުތަކަކީ މިހާރުވެސް ރާއްޖެއަށް އެހީތެރިކަން ފޯރުކޮށްދޭ ޤައުމުތައްކަމަށާއި، އިންޑިއާގެ އިތުރުން އެހެން ޤައުމުތަކަށް ދަތުރުކުރެއްވުމަށް ހަމަޖެހިފައިވާކަމަށެވެ.
މީގެ އިތުރުން ފޮރިނގް މިނިސްޓަރ ވަނީ، ރައީސް އިބްރާހީމް މުޙައްމަދު ޞާލިހު ބޭރު ޤައުމަކަށް ކުރައްވާ ފުރަތަމަ ދަތުރުފުޅު ކުރައްވާނީ އިންޑިއާއަށްކަމަށްވެސް ވިދާޅުވެފައެވެ. ރާއްޖޭގެ މާލީ ޙާލަތާގުޅޭގޮތުން މަޝްވަރާކޮށް، ގުޅުން ބަދަހިކުރުމަށް ފޮރިންގ މިނިސްޓަރ އިންޑިއާއަށް ކުރައްވާ މި ދަތުރުފުޅުގައި އިންޑިއާގެ ބޮޑުވަޒީރު ނަރެންދުރަ މޯދީއާއި ޚާރިޖީވަޒީރު ސުޝްމާ ސުވަރާޖާއި އިންޑިއާގެ އެހެނިހެން އިސް ބައެއް ބޭފުޅުންނާ ބައްދަލުކުރެއްވުމަށްވަނީ ހަމަޖެހިފައެވެ. ފޮރިން މިނިސްޓަރ އިންޑިއާއަށް ކުރައްވާ މި ދަތުރުފުޅުގައި ފިނޭންސް މިނިސްޓަރ އިބްރާހީމް އަމީރާއި، އިކޮނޮމިކް މިނިސްޓަރ ފައްޔާޒް އިސްމާޢީލްވެސް ބައިވެރިވެވަޑައިގަންނަވައެވެ.
ތިން ވަޒީރުން އިންޑިއާއަށް ކުރައްވާ ރަސްމީ މިދަތުރުފުޅަކީ، ރާއްޖޭގެ މާލީ ޙާލަތާ ގުޅޭގޮތުން މަޝްވަރާކޮށް، ރާއްޖޭގެ އެކި މަޝްރޫޢޫތަކަށް ބޭރުގެ އެކި ޤައުމުތަކުން ނަގާފައިވާ ދަރަނި އަދާކުރެވޭނެ ގޮތްތަކާ ގުޅޭގޮތުނާއި، ރާއްޖެއާއި އިންޑިއާގެ ގުޅުން އިތުރަށް ބަދަހިކުރުމާއި ގުޅޭގޮތުން މަޝްވަރާކުރުމަށް ކުރައްވާ ދަތުރުފުޅެކެވެ.
މިހާރު އިންޑިއާއަށް ކުރައްވާ މި ދަތުރުފުޅުގައި ފޮރިންގ މިނިސްޓަރ ވަނީ އިންޑިއާގެ ދިއްލީގައި ހުންނަ ރާއްޖޭގެ އެމްބަސީއަށް ޒިޔާރަތްކުރައްވާފައެވެ. އަދި އެމްބަސީގެ މަސައްކަތްތައް ހިނގާގޮތް ބައްލަވާލައްވައި، އެތަނުގައި މަސައްކަތްކުރާ މުވައްޒަފުންނާއި ބައްދަލުކުރައްވާފައިވެއެވެ.