ރައްޔިތުންގެ މަޖިލީހުގެ ހުސްވެފައިވާ 6 ދާއިރާއެއްގެ ބައި-އިލެކްޝަން ނުބާއްވާގޮތަށް އިލެކްޝަންސް ކޮމިޝަނުން ނިންމައިފިއެވެ.
ރައްޔިތުންގެ މަޖިލީހުގައި ހުސްވެފައިވާ 6 ދާއިރާއަކީ، ހިންނަވަރު ދާއިރާ، ކާށިދޫ ދާއިރާ، މައޗަންގޮޅި އުތުރު ދާއިރާ، ހެންވޭރު ދެކުނު ދާއިރާ، ގަމު ދާއިރާގެ އިތުރުން ގަލޮޅު ދެކުނު ދާއިރާއެވެ. ހިންނަވަރު ދާއިރާއާއި ކާށިދޫ ދާއިރާގެ ގޮނޑި ހުސްވެފައިވަނީ ރައީސް ޞާލިޙާއި ނާއިބުރައީސް ފައިޞަލް މަޤާމުގެ ހުވައި ކުރެއްވުމާ ގުޅިގެންނެވެ.
އަދި ދެންހުރި ދާއިރާތަކުގެ ގޮނޑި ހުސްވެފައިވަނީ ރައީސް ޞާލިޙްގެ ސަރުކާރުގެ ވަޒީރުކަމަށް ވަޑައިގަތުމަށް 4 މަޖިލިސް މެމްބަރަކު އިސްތިއުފާ ދެއްވުމާ ގުޅިގެންނެވެ. އެގޮތުން މައްޗަންގޮޅި ދެކުނު ދާއިރާގެ މެންބަރު މާރިޔާ އަޙްމަދު ދީދީ ޑިފެންސް މިނިސްޓަރުކަމަށް ޢައްޔަންކުރައްވާފައިވާއިރު، ހެންވޭރު އުތުރުދާއިރާގެ މެންބަރު ޢަބްދުﷲ ޝާހިދު ވަނީ ފޮރިން މިނިސްޓަރަކަށް ޢައްޔަންކުރައްވާފައެވެ. އަދި ގަމު ދާއިރާގެ މެންބަރު ފައްޔާޒް އިސްމާޢީލް އިކޮނޮމިކް މިނިސްޓަރަކަށް ޢައްޔަންކުރައްވާފައިވާއިރު، ގަލޮޅު ދެކުނު ދާއިރާގެ މެންބަރު އަޙްމަދު މަޙުލޫފު ވަނީ ޔޫތު މިނިސްޓަރުކަމަށް ޢައްޔަންކުރައްވާފައެވެ.
ޤާނޫނުއަސާސީގެ 78 ވަނަ މާއްދާގައި ބަޔާންކޮށްފައިވާގޮތުން ރައްޔިތުންގެ މަޖިލީހުގެ ގޮނޑި ހުސްވާތާ 60 ދުވަހުގެ ތެރޭގައި ބައި އިލެކްޝަނެއް ބާއްވަން ޖެހެއެވެ. ނަމަވެސް ރައްޔިތުންގެ މަޖިލީހުގެ ގޮނޑި ހުސްވާ ތާރީޚުން ފެށިގެން މަޖިލިސް އިންތިޚާބާ ދެމެދު އޮތީ 6 މަސް ދުވަސް ނުވަތަ އެއަށްވުރެ ކުރު މުއްދަތެއްނަމަ އެ ހުސްވި ގޮނޑިއަށް މެމްބަރަކު އިންތިޚާބު ކޮށްގެން ނުވާނެކަމަށް ޤާނޫނުއަސާސީގައި ބަޔާންކޮށްފައިވެއެވެ.
އިލެކްޝަނސް ކޮމިޝަނުން 6 ދާއިރާގެ ބައި އިލެކްޝަން ނުބާއްވަން ނިންމާފައިވާއިރު އަންނަ އަހަރުގެ ކުރީކޮޅު ރައްޔިތުންގެ މަޖިލީހުގެ އިންތިޚާބު ބާއްވާނެކަން އިލެކްޝަންސް ކޮމިޝަނުން ވަނީ ބުނެފައެވެ.