ރާއްޖެއާއި ޗައިނާއާއެކު އެކުލަވާލާފައިވާ މިނިވަން ވިޔަފާރީގެ އެއްބަސްވުން އުވާލަން ނިންމާފައިނުވާކަމަށް ފޮރިންގ މިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ.
ފޮރިންގ މިނިސްޓަރީގައި އޮތް ނޫސްވެރިންގެ ބައްދަލުވުމުގައި ޕީއެސްއެމް ނިއުސްއިން ދެންނެވި ސުވާލަކަށް ޖަވާބުދެއްވަމުން ފޮރިންގ މިނިސްޓަރ ވިދާޅުވީ، ޗައިނާއާއިއެކު އެކުލަވާލާފައިވާ މިނިވަން ވިޔަފާރީގެ އެއްބަސްވުން އުވާލަންއުޅޭކަމަށް ދެކެވޭ ވާހަކަތަކަކީ ދޮގު ޚަބަރެއްކަމަށެވެ. ނަމަވެސް އެ އެއްބަސްވުން އެކުލަވާލާފައިވާގޮތް ބައްލަވަމުން ގެންދަވާކަމަށާ، އެއެއްބަސްވުން ކުރީގެ ސަރުކާރުން އެކުލަވާލީ އަވަސްއަރުވާލައިގެންކަމަށް މިނިސްޓަރ ތުހުމަތުކުރެއްވިއެވެ.
އެ އެއްބަސްވުމަކީ އެއްހާސް ޞަފްހާއަށްވުރެ ބޮޑު ޑޮކިއުމެންޓެއްކަމަށާއި، އެ އެއްބަސްވުން ދިރާސާކުރުމަށް ރައްޔިތުންގެ މަޖިލީހުގެ ކޮމިޓީން ނެގީ އެންމެ ފަނަރަވަރަކަށް މިނެޓްކަމަށްވެސް މިނިސްޓަރ ވިދާޅުވިއެވެ. އެހެންކަމުން ކަމާގުޅޭ މާހިރުން މެދުވެރިކޮށް އަލުން ދިރާސާކޮށް ގޮތްތަކެއް ނިންމަވާނެކަމަށްވެސް މިނިސްޓަރ ވިދާޅުވިއެވެ.
"ވަކި ކަންތައްތަކެއް ކުރާނެކަމަށް ބުނެ، އަޅުގަނޑުމެންނާ ނުލާހިކު ގާތް ގުޅުމެއް ބާއްވަމުން އަންނަ، އަދި ދީލަތި އެހީތަކެއް ވަމުން އަންނަ ޤައުމަކާ އެކު އޮތް ގުޅުމަކަށް ބުރޫ އަރާފަދަ އެއްވެސް ކަމެއް ކުރަން ބޭނުމެއްނުވޭ. އަޅުގަނޑުމެންނާ ޗައިނާއާއެކު އޮތީ ވަރަށް ގާތް ރަހްމަތްތެރި ގުޅުމެއް. މި ދިރާސާކުރަމުންދަނީ އެގުޅުން އިތުރަށް ބަދަހިކުރެވޭނެ ގޮތްތައް ހޯދުން."
މިނިސްޓަރ ޝާހިދު ވިދާޅުވިއެވެ.
ރާއްޖެއާއި ޗައިނާއާއެކު މިނިވަން ވިޔަފާރީގެ އެއްބަސްވުމެއް އެކުލްވާލާފައިވަނީ މިދިޔަ އަހަރުގެ ތެރޭގައެވެ.