އައްޑޫ ސިޓީ ހިތަދޫ 3 ގެއަކަށް ބަޔަކު ވަދެ ގެއްލުންތަކެއް ދީފިއެވެ.
ޕީއެސްއެމް ނިއުސްއަށް މަޢުލޫމާތު ލިބިފައިވާ ގޮތުގައި އައްޑޫ ސިޓީ ހިތަދޫ 3 ގެޔަކަށް ބަޔަކު ވަދެ، ގޭތެރޭގައި ހުރި ބައެއް ތަކެއްޗަށް ގެއްލުންތަކެއް ވަނީ ދީފައެވެ.
ފުލުހުން ވިދާޅުވީ އައްޑޫ ސިޓީ 3 ގެޔަކަށް ގެއްލުންދިން ކަމުގެ ރިޕޯޓެއް ލިބިފައިނުވާކަމަށާއި ނަމަވެސް އެއް ގެއަށް ގެއްލުންދިންކަމުގެ މަޢުލޫމާތު ލިބިފައިވާކަމަށެވެ. އަދި އެކަމާ ގުޅިގެން 2 މީހަކު ހައްޔަރުކޮށްފައިވާކަމަށްވެސް ފުލުހުން ބުނެއެވެ.
ޕީއެސްއެމް ނިއުސްއަށް މަޢުލޫމާތު ލިބިފައިވާ ގޮތުގައި ގެއްލުންދިން ގެތަކުގެ ތެރެއިން ގެއެއްގެ ކުޑަކުއްޖަކަށް ފިޓު ޖެހިގެން ހިތަދޫ ރީޖިނަލް ހޮސްޕިޓަލުން ދަނީ ފަރުވާ ދެމުންނެވެ. އަދި މިތަނުން ގެއަކާ އިންވެގެން ހުރި ޓިނުން ހަދާފައި ހުރި ބަދިގެއެއްގައި ބަޔަކު ރޯކޮށްލާފައިވާކަމަށްވެސް މަޢުލޫމާތު ލިބިފައިވެއެވެ.
އެމްއެންޑީއެފުން ބުނީ އަލިފާން ރޯވެގެން މިއަދު ހެނދުނު ހައެއް ޖަހަނިކޮށް ރިޕޯޓްކޮށްފައިވާކަމަށެވެ. އަދި ހަގަޑި ތިރީސްކަންހާއިރު އަލިފާންގަނޑު ނިއްވާލާފައިވާކަމަށްވެސް އެމްއެންޑީއެފުން ބުނެއެވެ.
އައްޑޫ ސިޓީ 3 ގެއަކަށް ބަޔަކު ވަދެ ގެއްލުންތަކެއް ދީފައިވާއިރު، ފަހަކަށް އައިސް އައްޑޫ ސިޓީގައި މާރާމާރީއާއި ތަންތަނަށް ގެއްލުންދިނުމުގެ މައްސަލަ ވަނީ އިތުރުވެފައެވެ.