މަންތާ އެއަރގެ އުނދުހުންތަކުގައި ބޭނުންކުރާ ފުރަތަމަ މަތިންދާ ބޯޓު ރާއްޖެގެނެސްފިއެވެ. ރާއްޖޭގައި އަލަށް ފެށުމަށް ތައްޔާރުވަމުންދާ ޑޮމެސްޓިކް އެއަރލައިނެއްކަމަށްވާ މަންތާ އެއަރއިން ބުނީ، އެ އެއަރލައިންގެ ޚިދުމަތްތައް ފެށުމަށްޓަކާ ވާންޖެހޭ އެންމެފަހުގެ ތައްޔާރީތައް މިހާރު ވަމުންދާކަމަށެވެ.
ރާއްޖޭގައި އަލަށް ފަށާ ޑޮމެސްޓިކް އެއަރލައިނެއްކަމަށްވާ މަންތާ އެއަރގެ އުނދުހުންތަކުގައި ބޭނުންކުރާ ފުރަތަމަ މަތިންދާބޯޓު ވެލާނާ އިންޓަރނޭޝަނަލް އެއަރޕޯޓުގައި ޖައްސާފައިވަނީ ލޯ-ފްލައި ޕާހެއް ދިނުމަށްފަހުގައެވެ. މި ފްލައިޓް ރަންވޭގައި ޖެއްސުމުން އެމް.އެން.ޑީ.އެފްގެ ފަޔަރ އެންޑް ރެސްކިއު ސަރވިސްގެ ފަރާތުން ވަނީ ވޯޓަރ ސެލިއުޓެއް އަރުވާފައެވެ.
މި މަތިންދާބޯޓަކީ ފަރަންސޭސިވިލާތުގެ އެއަރ ކްރާފްޓް އުފައްދާ މަޝްހޫރު ކުންފުންޏެއްކަމަށްވާ އޭޓީއާރުން އުފައްދާފައިވާ ފްލައިޓެކެވެ. އޭ.ޓީ.އާރް 72-600 މަރުކާގެ މި މަތިންދާބޯޓަކީ 68 އާއި 78 އާ ދެމެދުގެ ޢަދަދަކަށް ފަސިންޖަރުން އުފުލޭ ގޮތަށް ފަރުމާކޮށްފައިވާ މަތިންދާބޯޓެކެވެ.
މަންތާ އެއަރގެ ފްލީޓަށް ގެނައި ފުރަތަމަ މަތިންދާބޯޓަށް މަރުޙަބާ ކިޔުމަށްޓަކާ އެއަރޕޯޓުގައި ބޭއްވި ޚާއްސަ ރަސްމިއްޔާތުގައި ވާހަކަފުޅުދައްކަވަމުން އެ އެއަރލައިންގެ ސީ.އީ.އޯ މުޙައްމަދު ޚަލީލް ވިދާޅުވީ، ރާއްޖޭގެ ފަތުރުވެރިކަން ތަރައްޤީވަމުންދާ މިންވަރާ އަޅާބަލާއިރު، އޭވިއޭޝަން ދާއިރާގެ ކެޕެސިޓީ އިތުރުކުރަންޖެހިފައިވާކަމަށެވެ.
އަދި މަންތާ އެއަރ އޮޕަރޭޓްކުރުމުގެ ބޭނުމަކީ ވަކި ބަޔަކާ ޗެލެންޖު ކުރުމުގެ ބަދަލުގައި، ފެންވަރު ރަނގަޅު ޚިދުމަތެއް ފަސިންޖަރުންނަށް ފޯރުކޮށްދިނުންކަމަށެވެ. ޚަލީލް ވިދާޅުވީ، މަންތާ އެއަރގެ އުނދުހުންތައް ފެށުމަށްޓަކާ އިދާރީގޮތުން ވާންޖެހޭ ތައްޔާރީތައް މިހާރު ވަމުންދާކަމަށެވެ. ނަމަވެސް އުނދުހުންތައް ފަށާނެ ސީދާ ތާރީޚެއް އޭނާ ހާމަކޮށްފައެއްނުވެއެވެ.
"އަޅުގަނޑުމެންގެ ހުރިހާ ޕޭޕަރވޯކްސްތަކެއް ނިމިއްޖެ. ސިވިލް އޭވިއޭޝަންގެ ގޯ-ހެޑް ލިބުނުހާ އަވަހަކަށް އަޅުގަނޑުމެން މިތިބީ ފަށަން ތައްޔާރުވެފައި. އަޅުގަނޑުމެންގެ 2ވަނަ އެއަރކްރާފްޓް އެންމެ ލަސްވެގެން އަންނަމަހުގެ 10ގެ ކުރިން ރާއްޖެގެނެވޭނެ. އަޅުގަނޑުމެންގެ ކްރޫއިންވެސް، ޓީމުވެސް މިއޮތީ ފުލީ އޮންބޯޑުވެފައި. އަޅުގަނޑުމެންގެ އިންޖިނިއަރުންގެ ޓީމާއި، ޕައިލަޓުންވެސް އޮންބޯޑުގައި ތިބޭތާވެސް މިހާރު 2 މަސްވަރުވެއްޖެ"
މުޙައްމަދު ޚަލީލް ވިދާޅުވިއެވެ.
އެތެރޭގެ އުނދުހުންތަކަށް ޚާއްސަކޮށްގެން އޮޕަރޭޓްކުރާ މަންތާ އެއަރގެ ދަތުރުތައް ފަށާނީ ދިވެހިންނަށް ޚާއްސަ ފެއަރއަކާއެކު ކަމަށާއި، ފަސިންޖަރުންނަށް ޕްރީ-ބުކިންގެ ޚިދުމަތްވެސް ލިބިގެންދާނެކަމަށް އެ އެއަރލައިނުން ބުނެއެވެ. ޚަލީލް ވިދާޅުވީ، މަންތާގެ އުނދުހުންތަކާއެކު، އޭވިއޭޝަން ދާއިރާގެ ވާދަވެރިކަން އިތުރުވެ، އަގުތަކަށް ރަނގަޅު ބަދަލުތަކެއް އައުމަކީ އެ އައަރލައިނުން އެދޭ ކަމެއްކަމަށެވެ.
"ހަމަސް ދުވަސް ކުރިން މީހަކު ޓިކެޓް ބުކް ކުރަން ބޭނުންވިޔަސް، އެ ދުވަހަކަށް ސީޓު ލިބޭނަމަ ޓިކެޓް ކޮންފަމޭޝަން ހަދާ، ފްލައިޓުގެ ގަޑިއާއި އެއްޗެހިވެސް ލިބިގެންދާނެ. އަޅުގަނޑުމެންގެ ޝެޑިއުލްތައް މި ރާވަނީ ކޮންމެ 6 މަހަކުން 6 މަހަކުން އާއްމުކުރާގޮތަށް. އަޅުގަނޑުމެންގެ އޮޕަރޭޝަންތަކުން ފަސިންޖަރުންނަށް ތަފާތުތަކެއް ފެނިގެންދާނެ. އަޅުގަނޑުމެން ބޭނުންވޭ މޮނޮޕޮލީ ނައްތާލާފައި، ކޮމްޕެޓިޝަނެއްވެސް އުފައްދަން. އޭރުން އުނދުހުންތަކުގެ އަގުތަކަށް ހެޔޮ ބަދަލުތަކެއް އަތުވެގެންދާނެކަމަށް ޤަބޫލުކުރަނީ."
މުޙައްމަދު ޚަލީލް ވިދާޅުވިއެވެ.
މަންތާ އެއަރގެ ދަތުރުތައް އެންމެ ފުރަތަމަ ކުރުމަށް ހަމަޖެހިފައިވަނީ ހަމައެކަނި ދ.ކުޑަހުވަދުއަށެވެ. އެހެންނަމަވެސް ފްލީޓަށް މަތިންދާބޯޓު އިތުރުވަމުންދާ މިންވަރަކުން އިތުރު ސަރަޙައްދުތަކަށްވެސް ދަތުރުކުރާނެކަމަށް މަންތާ އެއަރއިން ބުނެއެވެ. ޑޮމެސްޓިކް ދަތުރުތަކުގެ އިތުރުން، ސީ-ޕްލޭންގެ އުދުހުންތައް ފެށުމަށްޓަކާވެސް މަންތާ އެއަރއިން އަންނަނީ ތައްޔާރުވަމުންނެވެ. އެގޮތުން 6 ސީޕްލޭނާއެކު ފަށާ މި ޙިދުތަމަށް ބޭނުންވާ 4 ސީ-ޕްލޭން މިހާރު ގަނެފައިވާއިރު، މިއަހަރުގެ ފަހުކޮޅު ނުވަތަ އަންނަ އަހަރުގެ ކުރީ ކޮޅު ސީޕްލޭން ދަތުރުތައްވެސް ފެށިގެންދާނެކަމަށް މަންތާ އެއަރއިން ބުނެއެވެ.