ކީރިތި ޤުރުއާން ހިތުދަސްކޮށްދޭ ބައެއް ޕްރޮގްރާމުތައް ހިލޭ ކިޔަވައިދޭ ގޮތަށް އައި.ޔޫ.އެމުން ނިންމައިފި

ދިވެހިރާއްޖޭގެ އިސްލާމީ ޔުނިވަރސިޓީން ކުރިއަށްގެންދާ ކީރިތި ޤުރުއާން ހިތުދަސްކޮށްދިނުމުގެ ބައެއް ޕްރޮގްރާމުތަކުގެ ކޯސްފީ މަޢާފުކޮށްދީ، އެ ކޯސްތައް މުޅިން ހިލޭ ކިޔަވައިދޭ ގޮތަށް ހަމަޖައްސައިފިއެވެ.

އައިޔޫއެމުން މުޅިން ހިލޭ ކިޔަވައިދިނުމަށް ނިންމާފައިވާ ޕްރޮގްރާމުތަކުގެ ތެރޭގައި ޤުރުއާން ހިތުދަސްކުރުމުގެ ސެޓްފިކެޓް ލެވެލް 1، 2، 3 އަދި އެޑްވާންސް ސެޓްފިކެޓް ލެވެލްގެ ޕްރޮގްރާމް ހިމެނެއެވެ.

ޕީ.އެސް.އެމް ނިއުސްއަށް މަޢުލޫމާތުދެއްވަމުން އިސްލާމިކް ޔުނިވަރސިޓީން ބުނީ އެ ޔުނިވަރސިޓީން ޤުރުޢާން ހިތުދަސްކޮށްދިނުމާއި ގުޅޭ 4 ޕްރޮގްރާމެއްގެ ކޯސް ފީ މިހާރު މަޢާފުކޮށްދީފައިވާކަމަށާއި، މި ޕްރޮގްރާމުތަކާއި އަލަށް ގުޅޭ ދަރިވަރުންގެ އަތުން ފީ ނުނަގާނެކަމަށެވެ. އަދި މިހާރު މި ޕްރޮގްރާމުތައް ފުރިހަމަ ކުރަމުންދާ ދަރިވަރުންނަށްވެސް އަންނަ އަހަރުން ފެށިގެން ކިޔަވައިދޭނީ މުޅިން ހިލޭ ކަމަށް އައިޔޫއެމުން ބުނެއެވެ.

ކޯސް ފީ މުޅިން ހިލޭ ކޮށްދިން 4 ޕްރޮގްރާމުގެ ޖުމްލަ އަގު 16،530 ރުފިޔާއަށް އަރާއިރު، އިސްލާމީ ޔުނިވަރސިޓީން ގެނައި ބަދަލާއެކު މިހާރު މި ޕްރޮގްރާމުތައް ފުރިހަމަ ކުރާ ދަރިވަރުން ދައްކަންޖެހޭނީ ހަމައެކަނި އެޑްމިޝަން ފީގެ ގޮތުގައި ނަގާ 1،200 ރުފިޔާ އެކަންޏެވެ.

އައިޔޫއެމުން ބުނީ މިފަދަ ބަދަލެއް ގެނައުމުގެ އެންމެ ބޮޑު ބޭނުމަކީ އެކި އުމުރުފުރާގެ ފަރާތްތަކުގެ ހިތްތަކުގައި ކީރިތި ޤުރުޢާން ހިތުދަސްކުރުމަށް އޮންނަ ޝައުޤުވެރިކަން އިތުރުކޮށް، ޤުރުއާން ހިތުދަސްކުރަން ބޭނުންވާ ފަރާތްތަކަށް ވިހާވެސް ފަސޭހައިން އެ ފުރުޞަތު ފަހިކޮށްދިނުމެވެ. އަދި މިއީ ޤުރުއާނުގެ ޢިލްމު ފެތުރުވުމަށް ކުރާ މަސައްކަތް ހިލޭ ސާބަހަށް ކޮށްދިނުމަށް އެ ޔުނިވަރސިޓީން ގެންގުޅޭ ވިސްނުމުގެ ދަށުން ނިންމި ނިންމުމެއްކަމަށްވެސް އެ ޔުނިވަރސިޓީން ބުނެއެވެ.

އައިޔޫއެމުން ކޯސް ފީ މަޢާފުކޮށްދިން 4 ޕްރޮގްރާމުގައި މިހާރުވެސް 150 އެއްހާ ދަރިވަރުން ކިޔަވަމުންދާކަމަށް އެ ޔުނިވަރިސިޓީން ބުނެއެވެ.